ສູດຢາດີປົວປະດົງຈາກຊາຍທໍາມະດາ

0
33

ທ່ານ ສິງຄຳ ອາລຸນ ເປັນອີກຄົນໜຶ່ງທີ່ມັກເດີນທາງໄປຕ່າງແຂວງເປັນປະຈຳເຖິງວ່າເພິ່ນຈະບໍ່ແມ່ນໝໍຢາ ແຕ່ການໄປແຕ່ລະຄັ້ງເພິ່ນກໍ່ມັກຊອກຫາສິ່ງທີ່ດີໆໃຫ້ກັບຕົວເອງ ນັ້ນກໍ່ຄືສູດຢາປົວປະດົງ ເຊິ່ງໃນໄລຍະຜ່ານມາເພິ່ນໄດ້ບອກສູດຢາປົວປະດົງໃຫ້ກັບໝູ່ ແລະ ຍາດຕິພີ່ນ້ອງຂອງເພິ່ນປະມານ 40 – 50 ຄົນ ເຊິ່ງທຸກຄົນທີ່ໄດ້ກິນຢາສູດນີ້ກໍ່ເຊົາເປັນປະດົງ.
ສ່ວນປະກອບຂອງສູດຢາປົວປະດົງຂອງ ທ່ານ ສິງຄຳ ແມ່ນ: ນຳເອົາໃບໝາກຍໍ ແລະ ໃບໝາກຍົມສົ້ມແນວລະ 1 ກຳມາລ້າງໃຫ້ສະອາດ. ຈາກນັ້ນ, ມາຕົ້ມໃສ່ກັບນໍ້າ 3 ລິດ ແລະ ຕົ້ມຂ້ຽວໃຫ້ແຫ້ງເຫຼືອ 1.5 ລິດ ຫຼື 1 ລິດຍິ່ງດີ ແລ້ວຕອງເອົາແຕ່ນໍ້າໄວ້ດື່ມ ( ຕົ້ມ 1 ຊຸດຕໍ່ 1 ມື້ ).

ທ່ານ ສິງຄຳ ອາລຸນ

ສຳລັບວິທີກິນຢາສູດນີ້ແມ່ນຈະບໍ່ໃຫ້ກິນຕອນທີ່ກຳລັງປວດປະດົງ ເຊິ່ງເພິ່ນແນະນຳໃຫ້ກິນຢາຫຼວງເພື່ອບັນເທົາອາການປວດລົງກ່ອນຈຶ່ງຄ່ອຍກິນຢາຕົ້ມໃສ່ ເຫດຜົນກໍ່ເພາະວ່າ ຢາຫຼວງກັບຢາພື້ນເມືອງບາງອັນມັນຈະຕ້ານກັນ, ສຳລັບຜູ້ທີ່ປວດປະດົງແຮງແມ່ນແນະນຳໃຫ້ຕົ້ມກິນທຸກໆມື້ອາການເຈັບປວດກໍ່ຈະຄ່ອຍໆທຸເລົາລົງ ແລະ ອາດຈະເຊົາຂາດໄດ້.
ທ່ານ ຈັນ ເຊິ່ງເປັນໝູ່ຂອງ ທ່ານ ສິງຄຳ ເຈັບປວດທໍລະມານກັບການເປັນປະດົງມາຫຼາຍປີກິນຢາມາຫຼາຍຊະນິດແຕ່ກໍ່ຍັງບໍ່ເຊົາ ພາຍຫຼັງທີ່ ທ່ານ ສິງຄຳ ບອກສູດຢາປົວປະດົງນີ້ໃຫ້ ລູກສາວຂອງເພິ່ນກໍ່ຕົ້ມໃຫ້ກິນທຸກມື້ອາການເຈັບປວດກໍ່ຫາຍໄປຈົນລືມໄປວ່າເຄີຍເປັນປະດົງມາກ່ອນ.

“ ຂ້ອຍເຄີຍເຈັບປວດຍ້ອນເປັນປະດົງມາຫຼາຍປີກິນຢາຫຼວງກໍ່ພໍແຕ່ເຊົາປວດ ເມື່ອກິນອາຫານຜິດອາການປວດກໍ່ເພີ່ມທະວີຂຶ້ນ, ຂາໃຄ່ບວມໄປໝົດ ຈົນໄດ້ມາກິນຢາສູດນີ້ທີ່ໝູ່ແນະນຳອາການກໍ່ເຊົາເປັນປົກກະຕິຢ່າວ່າແຕ່ກິນ ໄກ່ – ຂອງດອງ ປັດຈຸບັນກໍ່ດື່ມເບຍໄດ້ສະບາຍ ” ທ່ານ ຈັນ ກ່າວດ້ວຍໃບໜ້າຍິ້ມແຍ້ມ.
ທ່ານ ສິງຄຳ ບອກວ່າ: ເຖິງວ່າຕົວເອງຈະບໍ່ໄດ້ປ່ວຍເປັນໂລກປະດົງກໍ່ຕາມແຕ່ການທີ່ໄດ້ແນະນຳສິ່ງທີ່ດີໆໃຫ້ກັບໝູ່ຄູ່ ແລະ ຄົນອ້ອມຂ້າງແລ້ວ ຖືວ່າເປັນສິ່ງທີ່ເຮັດໃຫ້ເພິ່ນມີຄວາມສຸກທີ່ໄດ້ເຫັນຄົນເຫຼົ່ານັ້ນກັບມາແຂງແຮງອີກຄັ້ງ.
ຖ້າທ່ານໃດຢາກຮູ້ລາຍລະອຽດກ່ຽວກັບສູດຢາປົວປະດົງຈາກ ທ່ານ ສິງຄຳ ກໍ່ສາມາດຕິດຕໍ່ຫາເພິ່ນໄດ້ຢູ່ບ້ານນາໄຊ ເມືອງໄຊເຊດຖາ ນະຄອນຫຼວງວຽງຈັນ.

 

 

Source: ເສດຖະກິດການຄ້າ