ຂ່າວໃໝ່! ທ່ານສາມາດເບິ່ງສິນຄ້າ 300 ລາຍການໄດ້ແລ້ວຜ່ານເວັບໄຊ www.plasme.com

    0
    29

    ປັດຈຸບັນ ມີສິນຄ້າຂອງລາວ 302 ລາຍການ ທີ່ສາມາດໃຫ້ທ່ານໄດ້ເຂົ້າເບິ່ງຜະລິດຕະພັນ ຜ່ານ ເວບໄຊ ອີຄອມເມີດ (www.plaosme.com) ພາຍຫຼັງກະຊວງອຸດສາຫະກຳ ແລະ ການຄ້າ ເປີດໃຫ້ບໍລິການແລ້ວໃນວັນທີ 30 ສິງຫາ 2017.
    ກົມການນຳເຂົ້າ ແລະ ສົ່ງອອກ, ກະຊວງອຸດສາຫະກຳ ແລະ ການຄ້າ (ອຄ) ຈັດພິທີເປີດຕົວເວບໄຊ ອີຄອມເມີດ www.plaosme.com ຢ່າງເປັນທາງການທີ່ໂຮງແຮມດອນຈັນພາເລດ, ນະຄອນຫຼວງວຽງຈັນ ເຊິ່ງໃຫ້ກຽດກ່າວເປີດໂດຍ ທ່ານ ບຸນມີ ມະນີວົງ, ຮອງລັດຖະມົນຕີ ກະຊວງ ອຄ, ມີບັນດາຫົວໜ້າກົມ, ຮອງກົມ, ຕາງໜ້າສະພາການຄ້າ ແລະ ອຸດສາ ຫະກຳແຫ່ງຊາດ, ຜູ້ຕາງໜ້າທະນາຄານພັດທະນາອາຊີປະຈຳລາວ ພ້ອມດ້ວຍແຂກຖືກເຊີນທັງພາຍໃນ ແລະ ຕ່າງປະເທດຂຶ້ນຮ່ວມ.

    ທ່ານ ບຸນມີ ມະນີວົງ ກ່າວວ່າ: ການເປີດເວັບໄຊອີຄອມເມີດດັ່ງກ່າວນີ້ ແມ່ນເປັນເວບໄຊໜຶ່ງ ທີ່ຈະເປີດໂອກາດໃຫ້ແກ່ບັນດາວິສາຫະກິດຂອງລາວມີໂອກາດຫຼາຍຂຶ້ນໃນການນຳສະເໜີຕົວສິນຄ້າທີ່ຕົນມີເຂົ້າສູ່ຕະຫຼາດທັງພາຍໃນ ແລະ ຕ່າງປະເທດໂດຍສະເພາະແມ່ນຕະຫຼາດອາຊຽນດ້ວຍກັນ ແລະ ອາຊຽນ ກັບປະເທດພາຄີ.
    ປັດຈຸບັນຫຼາຍປະເທດແມ່ນໄດ້ວາງແຜນໃນການຍົກລະດັບການນຳໃຊ້ບັນດາສັນຍາການຄ້າເສລີ ຫຼື FTAs ໃຫ້ຫຼາຍຂຶ້ນ. ສະນັ້ນ, ການສ້າງເວບໃຊ້ດັ່ງກ່າວນີ້ ກໍ່ຈະກາຍເປັນໜຶ່ງຊ່ອງທາງທີ່ສະໜັບໜູນໃຫ້ມີການເຂົ້າເຖິງ ແລະ ຮູ້ນຳໃຊ້ FTAs ຂຶ້ນຕື່ມ. ນອກຈາກນີ້ແລ້ວ ບັນດາຫົວໜ່ວຍວິສາຫະກິດຂອງລາວ ກໍຈະໄດ້ຮັບໂອກາດໃນການຈະຫຍາຍຕາໜ່າງເຄືອຂ່າຍ ເພື່ອຈັບຄູ່ຊື້-ຂາຍ ນຳກັນທີ່ກວ້າງ ຂວາງກວ່າເກົ່າ ໂດຍການເຂົ້າຮ່ວມ ແລະ ນຳໃຊ້ລະບົບນີ້; ທັງເປັນການຍົກລະດັບເວທີຕະຫຼາດໃນການຊື້-ຂາຍສິນຄ້າຂຶ້ນໄປຢູ່ໃນລະດັບໃໝ່ ນັ້ນກໍຄືການນຳໃຊ້ນະວັດຕະກຳທາງເຕັກໂນໂລຊີເຂົ້າມາຊ່ວຍ ແລະ ການເປັນການຊື້-ຂາຍ ທາງອີເລັກໂຕຣນິກ.
    ເວັບໄຊດັ່ງກ່າວນີ້ ຖືເປັນເວທີໜຶ່ງທີ່ເອື້ອຍອຳນວຍຄວາມສະດວກໃຫ້ແກ່ຜູ້ຊື້ ແລະ ຜູ້ຂາຍສິນຄ້າ ໃຫ້ມີໂອກາດເຂົ້າຫາກັນຫຼາຍຂຶ້ນພຽງແຕ່ເຂົ້າສູ່ລະບົບກໍເຮັດໃຫ້ບັນດາ SME ໂອ້ລົມກັນໄດ້ ເຊິ່ງບໍ່ຈຳເປັນຕ້ອງໄປຫາກັນ ແລະ ເວບໄຊນີ້ຖືກອອກແບບໃຫ້ມີ 2 ພາສາຄື: ພາສາລາວ ແລະ ພາສາອັງກິດ, ມີຖານຂໍ້ມູນຂອງຜູ້ຂາຍ ແລະ ຜະລິດຕະພັນສິນຄ້າ ເຊິ່ງມາຮອດປັດຈຸບັນມີບໍລິສັດທີ່ໄດ້ລົງທະບຽນແລ້ວ ຈຳນວນ 82 ບໍລິສັດ ແລະ ມີສິນຄ້າທັງໝົດ 302 ລາຍການ.

    Source: ເສດຖະກິດການຄ້າ