ສະພາປະຊາຊົນ ແຂວງວຽງຈັນ ເຜີຍແຜ່ ຜົນສຳເລັດກອງປະຊຸມສະໄໝສາມັນເທື່ອທີ 3

0
33

ສະພາ​ປະຊາຊົນ​ແຂວງ​ວຽງ​ຈັນ​ ໄດ້​ຈັດ​ກອງ​ປະຊຸມ​ເຜີຍ​ແຜ່​ຜົນສຳເລັດ​ ກອງ​ປະຊຸມ​ສະ​​ໄໝສາ ມັນ​ເທື່ອ​ທີ 3 ຂອງ​ສະພາປະຊາຊົນ​ແຂວງ​ວຽງ​ຈັນ ​ຊຸດ​ທີ I ໃນ​ວັນ​ທີ 16 ສິງຫາ 2017 ໂດຍ​ການ​​ເປັນ​ປະທານ​ຂອງ ​​ທ່ານ​ ສົມ​ດີ​ ແກ້ວ​ດາລາ​ວິນ​ ສະມາຊິ​ກສະພາ​ແຫ່ງ​ຊາດ, ຮອງ​ປະທານ​ສະພາ​ປະຊາຊົນ​ແຂວງ​ວຽງ​ຈັນ, ມີ​ບັນດາ​ຫົວໜ້າ​, ຮອງ​ຫົວໜ້າພະ​ແນ​ກການ, ພະນັກງານ ​ຈາກ 8 ອົງການ​ ເຂົ້າຮ່ວມ​ຮັບ​ຟັງ.

ທ່ານ ສີນວນ ພົມມະຈັນ ປະທານຄະນະກຳມະການຍຸຕິທຳ ປ້ອງກັນຊາດ-ປ້ອງກັນຄວາມສະຫງົບ ໄດ້ໃຫ້ຮູ້ວ່າ: ກອງປະຊຸມຄັ້ງ​ນີ້ ໄດ້ພິຈາລະນາຮັບຮອງເອົາ ຫລາຍບັນຫາສຳຄັນ ຂອງແຂວງ​ເປັນ​ຕົ້ນ ​ໄດ້ພິຈາລະນາຮັບຮອງເອົາ ການສະເໜີແຕ່ງຕັ້ງ ທ່ານ ດາວເຮືອງ ນັນທະວົງ ຄະນະປະຈຳພັກແຂວງ, ຫົວໜ້າພະແນກການເງິນແຂວງ ເປັນຮອງເຈົ້າແຂວງໆວຽງຈັນ, ຮັບຮອງເອົາການ ຈັດຕັ້ງແຜນພັດທະນາ​ເສດຖະກິດ-ສັງຄົມ 6 ເດືອນຕົ້ນປີ 2017, ບົດລາຍງານການຈັດຕັ້ງ ປະຕິບັດແຜນງົບປະມານແຫ່ງລັດ 6 ເດືອນຕົ້ນປີ 2017 ຂອງແຂວງ; ກອງປະຊຸມໄດ້ຮັບຟັງ ການລາຍງານການ ຈັດຕັ້ງປະຕິບັດກ່ຽວກັບ ການຈັດສັນຄຸ້ມຄອງ ແລະ ພັດທະນາເທສະບານ ແຂວງວຽງຈັນ; ລາຍງານການຄຸ້ມຄອງລາຄາສິນຄ້າ, ຄ່າບໍລິການ ແລະ ມາດຕະການແກ້ໄຂ ເພື່ອຫລຸດຜ່ອນຜົນກະທົບ ຕໍ່ການຜະລິດ ແລະ ການດໍາລົງຊີວິດ ຂອງປະຊາຊົນ ບັນດາເຜົ່າໃນຕໍ່ໜ້າ; ລາຍງານການຈັດຕັ້ງປະຕິບັດ ແຜນການຜະລິດສະບຽງອາຫານ, ການຜະລິດເປັນສິນຄ້າ,​ ການປະຕິບັດຄໍາສັ່ງເລກທີ 15/ນຍ ຕິດພັນກັບການຄຸ້ມຄອງ ການປູກກ້ວຍທີ່ ໃຊ້ສານເຄມີເກີນມາດຕະຖານ; ລາຍງານການຄວບຄຸມ ແລະ ປາບປາມບັນຫາ ຢາເສບຕິດ; ຮັບຮອງເອົາບົດລາຍງານ ການເຄື່ອນໄຫວຈັດຕັ້ງປະຕິບັດ ວຽກງານກ່ຽວກັບ ການສັ່ງຟ້ອງຄະດີອາຍາຂຶ້ນສານ, ການເຂົ້າຮ່ວມ ທີ່ປະຊຸມສານໃນຄະດີແພ່ງ ແລະ ທິດທາງປັບປຸງແກ້ໄຂໃນຕໍ່ໜ້າ ຂອງອົງການໄອຍາການ ແລະ ການດໍາເນີນຄະດີອາຍາຢູ່ສານຂັ້ນຕົ້ນ, ​ຂັ້ນອຸທອນ ແລະ ທິດທາງປັບປຸງແກ້ໄຂໃນຕໍ່ໜ້າ ຂອງສານປະຊາຊົນແຂວງ; ຮັບຮອງເອົາບົດລາຍງານການ ເຄື່ອນໄຫວວຽກງານຂອງ ຄະນະປະຈໍາສະພາປະຊາຊົນແຂວງ 6 ເດືອນຕົ້ນປີ ແລະ ທິດທາງແຜນການ 6 ເດືອນທ້າຍ ປີ 2017; ຮັບຟັງການ ຕອບຄຳສັກຖາມ ແລະ ຊີ້ແຈງອະທິບາຍຈາກ 7 ພະແນກການ ແລະ 1 ກົມກອງ ຕໍ່ບັນຫາພົ້ນເດັ່ນຂອງສັງຄົມ ທີ່ມີຄວາມສົນໃຈຫລາຍ ເປັນຕົ້ນ ຂົງເຂດເສດຖະກິດ, ແຜນການ-ການເງິນ,​ ວັດທະນະ ທຳ-ສັງຄົມ ແລະ ອື່ນໆ.

​ໃນ​ໂອກາດ​ດຽວ​ກັນ​ນີ້,​ ທ່ານ​ ສົມ​ດີ​ ແກ້ວ​ດາລາ​ວິນ​ ສະມາຊິ​ກສະພາ​ແຫ່ງ​ຊາດ, ຮອງ​ປະທານ​ສະພາ​ປະຊາຊົນ​ ແຂວງ​ວຽງ​ຈັນ ຍັງ​ໄດ້​​ເຜີຍ​ແຜ່​ຜົນສຳ​ເລັດ ກອງປະຊຸມສະໄໝສາມັນ ເທື່ອທີ 3 ຂອງສະພາ​ແຫ່ງ​ຊາດຊຸດ​ທີ VIII ຕື່ມ​ອີກ.

ເນື້ອໃນ: ຂປລ