ຄຳມ່ວນ ເລັ່ງບົວລະບັດຮັກສາຜົນຜະລິດ ຮັບປະກັນດ້ານສະບຽງອາຫານ

0
10

ປັດຈຸບັນ ​ແຂວງ​ຄຳ​ມ່ວນ​ ​ກຳລັງ​ຂຸ້ນຂ້ຽວ​ໃນ​ການ​ບົວ​ລະ​ບັດ ​ຮັກສາ​ຜົນ​ຜະລິດ​ລະດູ​ແລ້ງ ​ແລະ ສຸມ​ໃສ່​ການ​ຜະລິດ​ລະດູຝົນ ປີ 2017 ຢ່າງ​ເປັນ​ຂະ​ບວນຟົດ​ຟື້ນ ​ເພື່ອ​ເຮັດ ​ໃຫ້​ໂຄງການ​ຄ້ຳປະກັນ ​ສະບຽງອາຫານ ​ແລະ ສິນຄ້າ​ຂະຫຍາຍຕົວ​ຢ່າງໝັ້ນທ່ຽງ ຕາມ​ ແຜນ​ພັດທະນາ​ກະສິກຳ 3 ​ເສົາ​ຄ້ຳ​ຄື: ​ເສົາ​ຄ້ຳ​ຜະລິດ​ສະບຽງອາຫານ-ສິນຄ້າ, ຄຸ້ມ​ຄອງ​ປ່າ​ໄມ້​ແບບ​ຍືນ​ຍົງ, ພັດທະນາ ​ຊົນນະບົດ ​ແລະ ລຶບລ້າງ​ຄວາມທຸກ​ຍາກ.

ທ່ານ ​ເດດ​ສັກດາ ມະນີ​ຄຳ ຮອງ​ຫົວໜ້າພະ​ແນ​ກກະສິກຳ ​ແລະ ປ່າ​ໄມ້​ແຂວງຄຳ​ມ່ວນ​ ໄດ້​ໃຫ້​ຮູ້​ກ່ຽວ​ກັບການ​ປູກຝັງ ​ໃນ​ລະດູ​ແລ້ງ​ ປີ 2017 ​ໂດຍ​ສະ​ເພາະ ​ແມ່ນການ​ປັກ​ດຳ​ເຂົ້ານາ​ແຊງ​ໄດ້ 7.750 ​ເຮັກຕາ, ຜົນ​ຜະລິດ 34.036 ​ໂຕນ, ຜະລິດ​ສະບຽງອາຫານ 3.350 ​ເຮັກຕາ ​ແລະ ຜະລິດ​ເປັນ​ສິນຄ້າ 4.400 ​ເຮັກຕາ; ການ​ປູກ​ເຂົ້ານາ​ປີປະຕິບັດ​ໄດ້ 81.502 ​ເຮັກຕາ, ສະ​ເລ່ຍສະມັດ​ຕະພາບ 3,9 ​ໂຕນ​ຕໍ່​ເຮັກຕາ ​ໃນ​ນີ້​ຜະລິດ​ເປັນ​ສະບຽງອາຫານ 65.082 ​ເຮັກຕາ ​ແລະ ຜະລິດ​ເປັນ​ສິນຄ້າ 16.420 ​ເຮັກຕາ, ການ​ປູກ​ພືດ​ລະດູຝົນປະຕິບັດ​ໄດ້ 4.607 ​ເຮັກຕາ, ດ້ານ​ການ​ລ້ຽງສັດ ​ໃນ​ທົ່ວ​ແຂວງ​ມີ​ສັດ​ ປະ​ເພດ​ຄວາຍ 74 ພັນ​ກວ່າ​ໂຕ, ງົວ 100.000 ກວ່າ​ໂຕ, ໝູ 90 ​ໂຕ, ​ແບ້ 28 ພັນ​ໂຕ ​ແລະ ສັດ​ປີກ​ເກືອບ 1 ລ້ານໂຕ ​ເພີ່ມ​ຂຶ້ນ 5% ​ເມື່ອ​ທຽບ​ໃສ່​ໄລຍະ​ດຽວກັນ​ ຂອງ​ປີ​ຜ່ານ​ມາ ​ແລະ ສາມາດສົ່ງ​ອອກ ​ຜະລິດ​ຕະພັນ​ກະສິກຳ​​ໄດ້ 9.214 ​ໂຕນ.

ເນື້ອໃນ: ຂປລ