“ຕຸລະກີ” ເປີດສະໜາມບິນນານາຊາດອິສຕັນບູລແຫ່ງໃໝ່

0
18

ສໍານັກຂ່າວຕ່າງປະເທດລາຍງານຈາກເມືອງອິສຕັນບູລ ປະເທດຕຸລະກີ ເມື່ອວັນທີ່ 30 ຕຸລາ 2018 ວ່າ ປະທານາທິບໍດີເຣເຊປ ເທຢິປ ເອີໂດກັນ ເປັນປະທານໃນພິທີເປີດສະໜາມບິນນານາຊາດແຫ່ງໃໝ່ຂອງປະເທດ ເຊິ່ງມີຊື່ຢ່າງເປັນທາງການວ່າ “ອິສຕັນບູລ” ຕາມຊື່ເມືອງໃຫຍ່ຂອງປະເທດ ພິທີເປີດມີຂື້ນໃນວັນຈັນທີ່ຜ່ານມາ ກົງກັບວັນຄ້າຍວັນຊາດຂອງຕຸລະກີພໍດີ ທີ່ໃນປີນີ້ເປັນວາລະຄົບຮອບ 95 ປີ ແຫ່ງການສະຖາປະນາປະເທດ ໂດຍ ທ່ານ ມຸສຕາຟາ ເຄມາລ ອາຕາເຕິຣກ ຜູ້ຖືເປັນ “ບິດາແຫ່ງຊາດ” ຂອງຊາວຕຸລະກີ

ທັງນີ້ ສະໜາມບິນອີສຕັນບູລ ເຊິ່ງຕັ້ງຢູ່ແຄມຝັ່ງທະເລດໍາ ຖືເປັນໜຶ່ງໃນເມກະໂປຣເຈັກໃນຍຸກຂອງເອີໂດກັນ ເລີ່ມການກໍ່ສ້າງເມື່ອປີ 2012 ດ້ວຍງົບປະມານ 12,000 ລ້ານໂດລາສະຫະລັດ ດ້ວຍວັດຖຸປະສົງສໍາຄັນຄືເພື່ອແບ່ງເບົາຄວາມໜາແໜ້ນຂອງສະໜາມບິນນານາຊາດອາຕາເຕິຣກ ຂະນະດຽວກັນຜູ້ນໍາຕຸະກີຍັງມຸ່ງຫວັງໃຫ້ສະໜາມບິນແຫ່ງໃໝ່ນີ້ເປັນສູນກາງການເຊື່ອມຕໍ່ເສັ້ນທາງຂົນສົ່ງທາງອາວະກາດລະຫວ່າງຢູໂຣບກັບເອເຊຍ ແລະ ອາຟຣິກາ ແຕ່ໂຄງການກໍ່ສ້າງສະໜາມບິນແຫ່ງນີ້ໄດ້ຮັບສຽງວິຈານບໍ່ໜ້ອຍໃນເລື່ອງມາດຕະຖານຄວາມປອດໄພ ເນື່ອງຈາກມີຄົນງານເສຍຊີວິດໃນຊ່ວງຂອງການກໍ່ສ້າງຫຼາຍເຖິງ 27 ຄົນ


ແມ່ນວ່າກະຊວງຄົມມະນາຄົມຂອງຕຸລະກີຕ້ອງການໃຫ້ຍ້າຍຖ້ຽວບິນເຂົ້າ ແລະ ອອກທັງໝົດຈາກສະໜາມບິນອາຕາເຕິຣກມາຍັງສະໜາມບິນແຫ່ງໃໝ່ໃນ 48 ຊົ່ວໂມງ ແຕ່ການໃຫ້ບໍລິການຈະຍັງຄົງເປັນໄປໄດ້ຢ່າງຈໍາກັດໃນໄລຍະທໍາອິດ ໂດຍເຕີຣກີຊ ແອຣໄລສ ເຊິ່ງເປັນສາຍການບິນແຫ່ງຊາດ ຈະໃຫ້ບໍລິການພຽງ 5 ເສັ້ນທາງກ່ອນ ທີ່ສ່ວນໃຫຍ່ເປັນເສັ້ນທາງພາຍໃນປະເທດ ກ່ອນຂະຫຍາຍການບໍລິການເປັນເຕັມຮູບແບບຕັ້ງແຕ່ວັນທີ່ 29 ທັນວານີ້ ເປັນຕັ້ນໄປ ຂະນະທີ່ສະໜາມບິນອາຕາເຕິຣກຈະຢຸດຕິໃຫ້ບໍລິການຖ້ຽວບິນເມື່ອຂະບວນການທຸກຢ່າງ “ສໍາເລັດສົມບູນ” ແລ້ວຈະປ່ຽນໄປເປັນສູນຈັດສະແດງສິນຄ້າ ແລະຈັດງານດ້ານອາກາດຊະຍານແທນ


ເບື້ອງຕົ້ນລັດຖະບານຕຸລະກີປະເມີນສະໜາມບິນອິສຕັນບູລ ຈະສາມາດຮອງຮັບຜູ້ໂດຍສານໄດ້ຫຼາຍເຖິງ 90 ລ້ານຄົນ ໃນປີທໍາອິດຂອງການໃຫ້ບໍລິການ ແລະ ເພີ່ມເປັນ 200 ລ້ານຄົນພາຍໃນອີກ 10 ປີຂ້າງໜ້າ ຈາກການທີ່ສະໜາມບິນມີລັນເວ ຫຼາຍເຖິງ 6 ແຫ່ງ ຫຼາຍກວ່າສະໜາມບິນນານາຊາດຮາຣດຟິລດ-ແຈັກສັນ ທີ່ເມືອງແອດແລນຕາ ໃນລັດຈໍເຈຍຂອງສະຫະລັດ ເຊິ່ງຄອງຕໍາແໜ່ງສະໜາມບິນຄຶກຄັກຫຼາຍທີ່ສຸດໃນໂລກຕອນນີ້ເຖິງ 2 ເທົ່າ.