ອາເມຣິກາ ສົ່ງທະຫານກວ່າ 5 ພັນຄົນໄປຊາຍແດນເເມັກຊິໂກ ສະກັດຂະບວນຄົນເຂົ້າເມືອງ

0
7

ສໍານັກຂ່າວຕ່າງປະເທດລາຍງານຈາກນະຄອນວໍຊິຕັນ 30 ຕຸລາ 2018 ວ່າ: ເວັບໄຊຟ໊ອກຂອງອາເມຣິກາອ້າງວ່າເຈົ້າໜ້າທີ່ ທາງການຈະສົ່ງທະຫານປະມານ 5,200 ຄົນປະຈໍາບໍລິເວນຊາຍແດນທາງໃຕ້ຕິດກັບແມັກຊິໂກ ເພື່ອຮັບມືກັບຂະບວນຜູ້ເຂົ້າເມືອງທີ່ກໍາລັງມຸ່ງໜ້າຂື້ນມາໂດຍໃຊ້ແມັກຊິໂກເປັນທາງຜ່ານ

ຜູ້ບັງຄັບການກອງກໍາລັງພາກເໜືອສະຫະລັດຖະແຫຼງຂ່າວທີ່ນະຄອນວໍຊິງຕັນດີຊີວານນີ້ວ່າ ຈະເສີມກໍາລັງພົນຕາມຈຸດເຂົ້າເມືອງຫຼັກໆ ເພື່ອເພີ່ມຄວາມປອດໄພພົມແດນ ໂດຍປະຈໍາການໃຫ້ແລ້ວສໍາເລັດພາຍໃນອາທິດນີ້ ຢ່າງໃດກໍ່ດີ ກໍາລັງພົນເຫຼົ່ານີ້ຈະເປັນກໍາລັງສະໜັບສະໜູນ ບໍ່ແມ່ນໜ່ວຍສູ້ຮົບໂດຍຈະມີອຸປະກອນໜັກ ບຸກຄະລາກອນການບິນ ແລະ ບຸກຄະລາກອນການແພດຢູ່ດ້ວຍ ພື້ນທີ່ເປົ້າໝາຍໄດ້ແກ່ ຕອນໃຕ້ຂອງລັດເທັກຊັສ ລັດເອຣິໂຊນາ ແລະ ລັດຄາລິຟໍເນຍ

ໃຊ້ຊື່ປະຕິບັດການວ່າ Faithful Patriot ກ່ອນໜ້ານີ້ມີການຄາດໝາຍກັນຢູ່ແລ້ວວ່າ ສະຫະລັດຈະສົ່ງກໍາລັງເສີມຕາມຊາຍແດນຫຼັງຈາກພົນເອກເຈມ ແມດທິດ ລັດຖະມົນຕີປ້ອງກັນປະເທດອະນຸມັດໃຫ້ຕາມຄໍາຂໍເມື່ອອາທິດກ່ອນ ແຕ່ບໍ່ຄິດວ່າໂຕເລກຈະສູງເຖິງ 5,200 ຄົນ ຂະບວນຜູ້ເຂົ້າເມືອງຊາວອາເມຣິກາກາງຍັງຄົງມຸ່ງໜ້າຂື້ນເໜືອຫວັງເຂົ້າສະຫະລັດຂະນະນີ້ຄາດວ່າມີປະມານ 4,000 ຄົນແລ້ວ

ດ້ານປະທານາທິບໍດີໂດນັລ ທຣັມ ທະວີດຂໍຄວາມ ວານນີ້ວ່າມີສະມາຊິກແກ໊ງ ແລະ ຄົນບໍ່ດີຈໍານວນຫຼາຍປະປົນກັບຂະບວນຜູ້ເຂົ້າເມືອງທີ່ກໍາລັງມຸ່ງໜ້າມາທາງຊາຍແດນຕອນໃຕ້ຂອງສະຫະລັດ ຂໍໃຫ້ກັບໄປເພາະສະຫະລັດຈະບໍ່ຮັບຄົນເຂົ້າເມືອງທີ່ບໍ່ຜ່ານຂະບວນການຕາມກົດໝາຍ ການກະທໍາເຊັ່ນນີ້ຖືເປັນການຮຸກຮານສະຫະລັດ ແລະ ທະຫານສະຫະລັດກໍາລັງຖ້າຈັດການຢູ່.