ມີ 200 ກ່ວາຮ້ານ ເຂົ້າຮ່ວມວາງສະແດງງານມະຫະກຳສີມືຫັດຖະກຳລາວ

0
15

ງານມະຫະກໍາສີມືຫັດຖະກໍາລາວຄັ້ງທີ 17 ປີ 2018 ໄດ້ເປີດຂຶ້ນຢ່າງເປັນທາງການໃນວັນທີ 29 ຕຸລາ ຜ່ານມາ ທີ່ສູນການຄ້າລາວ-ໄອເຕັກ ໂດຍໃຫ້ກຽດເຂົ້າຮ່ວມຂອງທ່ານ ນາງ ນາລີ ສີສຸລິດ ທີ່ປຶກສາອາວຸໂສ ສະມາຄົມຫັດຖະກໍາລາວ, ມີບັນດາທູຕານຸທູດ, ອົງການຈັດຕັ້ງສາກົນ, ພາກສ່ວນກ່ຽວຂ້ອງ ແລະ ແຂກຖືກເຊີນເຂົ້າຮ່ວມ. ໃນພິທີ ທ່ານ ຫານຊະນະ ສີສານ ປະທານສະມາຄົມຫັດຖະກໍາລາວ ໄດ້ຂຶ້ນມີຄໍາເຫັນວ່າ: ການຈັດງານຄັ້ງນີ້ເພື່ອສືບຕໍ່ສ້າງໂອກາດໃຫ້ກັບຊາວຊ່າງຫັດຖະກໍາລາວທີ່ຢູ່ທ້ອງຖິ່ນຕ່າງໆໃນທົ່ວປະເທດໄດ້ນໍາເອົາສິນຄ້າຂອງຕົນມາວາງສະແດງ ແລະ ຈໍາໜ່າຍຂາຍສ້າງລາຍຮັບໃຫ້ກັບຕົນເອງ ທັງເປັນການສ້າງໂອກາດໃຫ້ຊາວຊ່າງຫັດຖະກໍາໄດ້ພົບປະ, ແລກປ່ຽນບົດຮຽນກ່ຽວກັບການຜະລິດເຄື່ອງຫັດຖະກໍານໍາກັນ ພ້ອມນັ້ນຍັງສ້າງໂອກາດໃຫ້ຊາວຊ່າງຫັດຖະກໍາຊອກຫາລູກຄ້າ ແລະ ຫາຄູ່ຮ່ວມທຸລະກິດ ຊຶ່ງປີນີ້ມີຮ້ານຂາຍເຄື່ອງຫັດຖະກໍາເຂົ້າຮ່ວມປະມານ 200 ກວ່າຮ້ານປະກອບມີເຄື່ອງຫັດຖະກໍາຜ້າໄໝ, ຜ້າຝ້າຍພື້ນເມືອງ, ເຄື່ອງເງິນ-ວັດຖຸມີຄ່າ, ເຄື່ອງທອງເຫຼືອງ, ເຄື່ອງປັ້ນດິນເຜົາ ເຄື່ອງຈັກສານຈາກໄມ້ປ່ອງ, ຫວາຍ ແລະ ເຄື່ອງຊົນເຜົ່າຕ່າງໆ.

ມີການສາທິດການຜະລິດສິນຄ້າຫັດຖະກໍາລາວດ້ວຍມື, ການເດີນແບບຊຸດຊົນເຜົ່າໄຕດໍາ-ໄຕແດງແບບບູຮານ ແລະ ຊົນເຜົ່າກຶມມຸ, ການສະແດງລະຄອນເວທີ, ຄະນະລະຄອນສຽງແຄນລາວ, ການສົນທະນາຫັດຖະກໍາຕິດພັນກັບການທ່ອງທ່ຽວ ແລະ ອື່ນໆ. ນອກນີ້ ຍັງມີການສາທິດການລ້ຽງມ້ອນໜາມເປັນມ້ອນປ່າ ທີ່ກິນມັນຕົ້ນ ເພື່ອເປັນທາງເລືອກໃໝ່ໃຫ້ແກ່ການຜະລິດເສັ້ນໄຍທີ່ນໍາມາຕໍ່າຜ້າ ກິດຈະກໍາຄັດເລືອກການຜະລິດຕະພັນຫັດຖະກໍາເຄິ່ງສໍາເລັດຮູບ ເປັນໂຄງການຮ່ວມມືລະຫວ່າງສະມາຄົມຫັດຖະກໍາລາວ ແລະ ອົງການເຈໂຕຣ ປະເທດຍີ່ປຸ່ນ ກິດຈະກໍາຕ້ອນຮັບປີທ່ອງທ່ຽວລາວໂດຍແມ່ນການຮ່ວມມືລະຫວ່າງສະມາຄົມຫັດຖະກໍາລາວ ແລະ ໂຄງການພັດທະນາໂຄງລ່າງພື້ນຖານເພື່ອສົ່ງເສີມການທ່ອງທ່ຽວ ກົມພັດທະນາການທ່ອງທ່ຽວ ກະຊວງຖະແຫຼງຂ່າວ, ວັດທະນະທໍາ ແລະ ທ່ອງທ່ຽວ.

ທ່ານ ນາງ ຈັນທະຈອນ ວົງໄຊ ຮອງປະທານສະພາການຄ້າ ແລະ ອຸດສາຫະກໍາແຫ່ງຊາດລາວກ່າວວ່າ: ງານວາງສະແດງມະຫະກໍາສີມືຫັດຖະກໍາລາວ ໄດ້ກາຍເປັນບຸນປະເພນີຂອງຊາວຊ່າງຫັດຖະກໍາລາວໄປແລ້ວ ຊຶ່ງປີນີ້ ເປັນປີສ້າງຕັ້ງສະມາຄົມຫັດຖະກໍາລາວຄົບຮອບ 20 ປີ ທີ່ໄດ້ສະແດງໃຫ້ເຫັນເຖິງຄວາມເອົາໃຈໃສ່ຂອງຄະນະບໍລິຫານງານແຕ່ລະຍຸກແຕ່ລະສະໄໝທີ່ໄດ້ທຸ້ມເທທຸກເຫື່ອແຮງ ແລະ ສະຕິປັນຍາເຂົ້າໃນການບໍລິຫານວຽກງານຂອງສະມາຄົມໃຫ້ສາມາດຍືນຍົງຈົນເຖິງທຸກວັນນີ້ ພ້ອມນັ້ນສະມາຄົມຫັດຖະກໍາຍັງມີຜົນງານອີກຫຼາຍໆດ້ານທີ່ພົ້ນເດັ່ນເຊັ່ນ:ໃນການອະນຸລັກ ຮັກສາ ແລະ ສົ່ງເສີມພູມປັນຍາດ້ານຫັດຖະກໍາ. ສໍາລັບງານນີ້ຈະວາງສະ ແດງ ແລະ ຈໍາໜ່າຍໄປເຖິງວັນທີ 4 ພະຈິກ 2018.

ຂອບໃຈຂໍ້ມູນ: ນສພ ປະຊາຊົນ