ຜູ້ອຳນວຍການການບິນລາວຄົນໃໝ່ຈະສຸມໃສ່ 3 ບັນຫາຫຼັກ

    0
    38

    ໃນຕອນເຊົ້າວັນທີ 24 ກັນຍາ 2018 ລັດວິສາຫະກິດ ການບິນລາວ ໄດ້ຈັດພີທີການແຕ່ງຕັ້ງ ແລະ ມອບຮັບຜູ້ອຳນວຍການລັດວິສາຫະກິດການບິນລາວຜູ້ໃໝ່ ແລະ ຜູ້ເກົ່າຂຶ້ນ ພາຍໃຕ້ການເປັນປະທານຂອງ ທ່ານ ປອ.    ບຸນຈັນ ສິນທະວົງ ລັດຖະມົນຕີ ກະຊວງໂຍທາທິການ ແລະ ຂົນສົ່ງ, ມີທ່ານ ສຸກຄໍາເພັດ ເຮືອງບຸດສີ ຮອງປະທານອົງການກວດກາລັດຖະບານ, ທ່ານຫົວໜ້າກົມຈັດຕັ້ງ ແລະ ພະນັກງານ, ຫົວໜ້າກົມການບິນພົນລະເຮືອນ ກະຊວງ ຍທຂ ພ້ອມດ້ວຍພະນັກງານພາຍໃນລັດວິສາຫະກິດ ການບິນລາວ ແລະ ແຂກຖືກເຊີນເຂົ້າຮ່ວມ.

    ທ່ານ ລັນ ແສງອາພອນ ຫົວໜ້າກົມຈັດຕັ້ງ – ພະນັກງານ ກະຊວງ ຍທຂ ໄດ້ຂຶ້ນຜ່ານຂໍ້ຕົກລົງຂອງກະຊວງໂຍທາທິການ ແລະ ຂົນສົ່ງ ສະບັບເລກທີ 21638/ຍທຂ, ລົງວັນທີ 21/09/2018 ວ່າດ້ວຍການຍົກຍ້າຍ ທ່ານ ປອ. ສົມພອນ ດວງດາລາ ຜູ້ອໍານວຍການລັດວິສາຫະກິດ ການບິນລາວ ( ຜູ້ເກົ່າ ) ໄປຮັບໜ້າທີ່ໃໝ່ ແລະ ຜ່ານດໍາລັດສະບັບເລກທີ 294/ນຍ, ລົງວັນທີ 14/09/2018 ວ່າດ້ວຍການແຕ່ງຕັ້ງ ທ່ານ     ບຸນມາ ຈັນທະວົງສາ ເປັນຜູ້ອໍານວຍ ການລັດວິສາຫະກິດ ການບິນລາວ ( ຜູ້ໃໝ່ ).

    ໃນໂອກາດດຽວກັນ, ທ່ານ ປອ. ບຸນຈັນ ສິນທະວົງ ໄດ້ໃຫ້ກຽດມີຄໍາເຫັນໂອ້ລົມ ໂດຍໄດ້ກ່າວຍ້ອງຍໍຊົມເຊີຍ ແລະ ຕີລາຄາສູງຕໍ່ທ່ານທີ່ໄດ້ຮັບການແຕ່ງຕັ້ງ ແລະ ຮັບໜ້າທີ່ໃໝ່ໃນຄັ້ງນີ້ອັນສໍາຄັນ ທ່ານໄດ້ເນັ້ນໜັກໃຫ້ສະມາຊິກ ພັກ – ພະນັກງານຫຼັກແຫຼ່ງພາຍໃນລັດວິສາຫະກິດການບິນລາວ ຈົ່ງພ້ອມກັນເອົາໃຈໃສ່ລົງເລິກວຽກການເມືອງແນວຄິດ ດ້ວຍຄວາມເປັນເອກະພາບສູງ, ກໍາໄດ້ບັນດາຂໍ້ຫ້າມ, ຂໍ້ກໍານົດ, ກົດໝາຍ, ລະບຽບການຕ່າງໆຂອງພັກ, ຂອງລັດຖະບານ ແລະ ຂອງລັດວິສາຫະກິດວາງອອກໃນແຕ່ລະໄລຍະ ເພື່ອຮັບປະກັນແກ່ການດໍາເນີນທຸລະກິດຢ່າງມີປະສິດທິຜົນ; ກະກຽມຄວາມພ້ອມໃນຍຸກທີ່ມີການແຂ່ງຂັນສູງທາງດ້ານທຸລະກິດການບິນ ແລະ ນໍາພາການຜະລິດທຸລະກິດໃຫ້ໄດ້ຮັບຜົນສໍາເລັດ. ພ້ອມດຽວກັນນັ້ນ, ກໍ່ໃຫ້ເອົາໃຈໃສ່ປັບປຸງແບບແຜນວິທີເຮັດວຽກໃນຂົງເຂດວຽກງານທີ່ຕົນເອງຮັບຜິດຊອບໃຫ້ຖືກຕ້ອງຕາມລະບຽບຫຼັກການ, ສອດຄ່ອງກັບເງື່ອນໄຂ ແລະ ສະພາບຄວາມເປັນຈິງຂອງດໍາເນີນທຸລະກິດໃນໄລຍະໃໝ່.

    ທ່ານ ບຸນມາ ຈັນທະວົງສາ ໄດ້ໃຫ້ສຳພາດວ່າ: ບັນຫາທໍາອິດທີ່ຕ້ອງປະຕິບັດ ກ່ອນອື່ນໝົດແມ່ນຕ້ອງໄດ້ຮຽນຮູ້ສຶກສາສະພາບການດໍາເນີນທຸລະກິດຂອງລັດວິສາຫະກິດ ການບິນລາວ ໃນໄລຍະຜ່ານມາກ່ອນ ໂດຍສະເພາະ ຈຸດພິເສດດ້ານດີ, ດ້ານອ່ອນ ແລະ ຂໍ້ຄົງຄ້າງອັນໄດ້ດີແມ່ນຈະໄດ້ສືບຕໍ່ຜັນຂະຫຍາຍ, ຂໍ້ຄົງຄ້າງແມ່ນສືບຕໍ່ຄົ້ນ ຄວ້າຈັດຕັ້ງປະຕິບັດໃຫ້ບັນລຸຄາດໝາຍ, ສ່ວນດ້ານອ່ອນແມ່ນຈະອອກແຮງສືບຕໍ່ປັບປຸງ ແລະ ແກ້ໄຂໃຫ້ໄວທັນການ ແລະ ຂາດຕົວ. ພ້ອມດຽວກັນນັ້ນ, ກໍ່ມາກໍານົດທິດທາງທີ່ຊັດເຈນໃນການດໍາເນີນທຸລະກິດໃຫ້ມີຜົນກໍາໄລ.

    ສອງ: ຈະສືບຕໍ່ຮັກສາບັນດາກິດຈະກໍາຕ່າງໆທີ່ລັດວິສາຫະກິດ ການບິນລາວ, ບັນດາເສັ້ນທາງບິນ, ການນໍາໃຊ້ຍົນໄດ້ຢ່າງເຕັມປະສິດທິພາບຕາມ ຄວາມສາມາດ, ຍົກລະດັບຄວາມອາດສາມາດໃນການດໍາເນີນທຸລະກິດທາງການບິນຂອງປະເທດເຮົາຂຶ້ນຕື່ມ ເພື່ອຮອງຮັບການຊົມໃຊ້ຂອງສັງຄົມທັງພາຍໃນ ແລະ ຕ່າງປະເທດຈົນກ້າວໄປເຖິງມີກໍາໄລ.

    ສາມ: ເພີ່ມກິດຈະກໍາຖ້ຽວບິນຢູ່ພາຍໃນ ແລະ ຕ່າງປະເທດໃຫ້ຫຼາຍຂຶ້ນ. ພ້ອມດຽວກັນ, ລັດຖະບານກໍ່ໄດ້ມີທິດທາງໃນການຮ່ວມມືກັບນັກລົງທຶນຕ່າງປະເທດ ເພື່ອຍົກລະດັບການບໍລິການໃຫ້ເປັນທີ່ປະທັບໃຈຂອງຜູ້ໂດຍສານເພື່ອຮອງຮັບແຂ່ງຂັນໃນພາກພື້ນ.

    ຈາກ ຫນັງສືພິມເສດຖະກິດສັງຄົມ