ຈັບໄວລຸ້ນ 2 ຄົນ ພ້ອມຢາບ້າ 2.000 ເມັດ ໄປດຳເນີນຄະດີ

0
77

ໃນວັນທີ 18 ສິງຫາ 2018, ເຈົ້າໜ້າທີ່ພະແນກຕຳຫຼວດສະກັດກັ້ນ ແລະ ຕ້ານຢາເສບຕິດ ກອງບັນຊາການ ປກສ ແຂວງສະຫວັນນະເຂດ ຈັບໄວລຸ້ນ 2 ຄົນ ທີ່ລັກລອບເອົາຢາເສບຕິດ ປະເພດຢາບ້າໄປຂາຍຢູ່ເຂດບ້ານດົງດຳດວນ ນະຄອນໄກສອນພົມວິຫານ ແຂວງສະຫວັນນະເຂດ ພ້ອມຂອງກາງ 2.000 ເມັດ ໄປສອບສວນຂະຫຍາຍຜົນຫາຜູ້ຮ່ວມຂະບວນການນໍາກັນ.


ຜູ້ຖືກຫາທັງສອງຊື່ ທ້າວ ໄຊສົງຄາມ ອາຍຸ 20 ປີ ແລະ ທ້າວ ຈອນນີ້ ອາຍຸ 22 ປີ ທັງສອງຢູ່ບ້ານສະພານເໜືອ ນະຄອນໄກສອນພົມວິຫານ ພ້ອມຂອງກາງຢາບ້າ ຈຳນວນ 1 ມັດ ເທົ່າກັບ 2.000 ເມັດ, ໂທລະສັບມືຖື 2 ເຄື່ອງ ແລະ ລົດຈັກ 1 ຄັນ. ພວກກ່ຽວສາລະພາບວ່າ: ຢາບ້າຈຳນວນດັ່ງກ່າວໄດ້ຊື້ມານຳຄົນຮູ້ຈັກ ແລ້ວຈະເອົາໄປຂາຍ ໃຫ້ຜູ້ສັ່ງຊື້ທີ່ນັດສົ່ງໃຫ້ກັນຢູ່ເຂດບ້ານດົງດຳດວນ ນະຄອນໄກສອນພົມວິຫານ ແຕ່ຖືກເຈົ້າໜ້າທີ່ ປກສ ຈັບຕົວໄດ້ກ່ອນ ພ້ອມຂອງກາງຈໍານວນດັ່ງກ່າວ.


ຄະດີນີ້, ຍັງຢູ່ໃນຂັ້ນຕອນສືບສວນ-ສອບສວນ ຂອງເຈົ້າໜ້າທີ່ ປກສ ແຂວງສະຫວັນນະເຂດ ເພື່ອຂະຫຍາຍຜົນຫາຜູ້ຮ່ວມຂະບວນການໄປ  ດໍາເນີນຄະດີຕາມກົດໝາຍ.