ກວດກາການສັນຈອນ ພົບຜູ້ຂັບຂີ່ບໍ່ໃສ່ໝວກກັນກະທົບຍັງພົ້ນເດັ່ນ

    0
    32

    ພະແນກຕໍາຫຼວດຈະລາຈອນ ປກສ ນະຄອນຫຼວງວຽງຈັນ ໄດ້ຈັດກຳລັງລົງຈັດສັນຄວາມບໍ່ເປັນລະບຽບຮຽບຮ້ອຍຂອງຜູ້ຂັບຂີ່ ໂດຍເນັ້ນໃສ່ກວດກາຜູ້ຂັບຂີ່ຢຸດທັບເສັ້ນມ້າລາຍ, ລົດບໍ່ມີປ້າຍ ແລະ ຜູ້ຂັບຂີ່ບໍ່ໃສ່ໝວກກັນກະທົບໃນ ວັນທີ 22 ສິງຫາ 2018 ທີ່ໄຟອໍານາດໜອງໜ່ຽງ ຖະໜົນໄກສອນພົມວິຫານ. ສາມາດກວດພົບເຫັນຜູ້ຂັບຂີ່ບໍ່ໃສ່ໝວກກັນກະທົບຍັງພົ້ນເດັ່ນຮອງລົງມາແມ່ນຢຸດລົດທັບເສັ້ນມ້າລາຍ.ພັຕ ທອງສະຫວັນ ນາມວົງ ຮອງຫົວໜ້າພະແນກຕໍາຫຼວດຈະລາຈອນ ປກສ ນວ ໃຫ້ຮູ້ວ່າ: ການປະຕິບັດໜ້າທີ່ໃນຄັ້ງນີ້ ແມ່ນອີງຕາມແຜນຍຸດທະສາດ ແລະ ແຜນດໍາເນີນງານຄວາມປອດໄພທາງຖະໜົນຂອງນາຍົກລັດຖະມົນຕີ, ທິດຊີ້ນໍາ ແລະ ຄໍາສັ່ງວ່າດ້ວຍສະກັດກັ້ນ ແລະ ແກ້ໄຂລົດດັດແປງສະພາບເຕັກນິກ, ລົດບໍ່ມີປ້າຍຂອງລັດຖະມົນຕີກະຊວງ ປກສ, ພະແນກຕໍາຫຼວດຈະລາຈອນ ໄດ້ລົງກວດກາຢູ່ຈຸດຕາມໄຟອໍານາດຢູ່ 4 ຈຸດ ຂອງນະຄອນຫຼວງ ວຽງ ຈັນ ຄື: ໄຟອໍານາດກໍາມະບານ, ຮ່ອງແຊງ, ໂພນສະອາດ, ໜອງໜ່ຽງ ແລະ ດົງໂດກ; ທັງນີ້, ເພື່ອແນໃສ່ການຈັດສັນຕາມທ້ອງຖະໜົນໃຫ້ມີຄວາມເປັນລະບຽບຮຽບຮ້ອຍສະດວກ ແລະ ປອດໄພ ເພື່ອເຮັດໃຫ້ນັກຂັບຂີ່ເຫັນໄດ້ ຄວາມໝາຍຄວາມສໍາຄັນໃນການສັນ ຈອນໃຫ້ມີຄວາມເປັນລະບຽບຮຽບ ຮ້ອຍ, ໄປມາໃຫ້ມີຄວາມປອດໄພ, ເຮັດ ໃຫ້ຜູ້ຂັບຂີ່ເປັນເຈົ້າການເຄົາລົບ ແລະ ປະຕິບັດກົດລະບຽບທີ່ວາງອອກໄດ້ຢ່າງເຂັ້ມງວດ ແນໃສ່ເຮັດໃຫ້ມີຄວາມເປັນ ລະບຽບຕາມເສັ້ນທາງຫຼວງໃນຂອບເຂດນະຄອນຫຼວງວຽງຈັນ ເຂົ້າສູ່ລະບົບພື້ນຖານ.

    ເຊິ່ງເປົ້າໝາຍທີ່ເຈົ້າໜ້າທີ່ກວດກາ ຄື: ລົດບໍ່ມີປ້າຍ, ລົດປ້າຍຫັກ, ປ້າຍຂາດ, ຕົວໜັງສືລຶບ, ນັກຂັບຂີ່ບໍ່ໃສ່ ໝວກກັນກະທົບ, ຢຸດລົດທັບເສັ້ນມ້າລາຍ ແລະ ແນະນໍານັກຂັບຂີ່ທີ່ຢຸດລົດຕັນທາງລ້ຽວຂວາ, ຜ່ານການຈັດຕັ້ງປະ ຕິບັດຂອງເຈົ້າໜ້າທີ່ຜູ້ໃຊ້ລົດ-ໃຊ້ຖະໜົນສ່ວນໃຫຍ່ບໍ່ສາມາດປະຕິບັດກົດລະບຽບການສັນຈອນທີ່ວາງອອກ, ສາ ມາດກວດກວດພົບເຫັນຜູ້ຂັບຂີ່ລະເມີດກົດລະບຽບການສັນຈອນ ຫຼາຍກວ່າໝູ່ແມ່ນຜູ້ຂັບຂີ່ບໍ່ໃສ່ໝວກກັນກະທົບ, ຢຸດລົດທັບເສັ້ນທາງມ້າລາຍ, ລົດບໍ່ມີເອກະສານ, ຜູ້ຂັບຂີ່ບໍ່ມີໃບຂັບຂີ່ ແລະອື່ນໆ, ຕໍ່ກັບກໍລະນີດັ່ງກ່າວເຈົ້າໜ້າທີ່ໄດ້ນໍາຜູ້ຂັບຂີ່ມາສຶກສາອົບຮົມກ່າວເຕືອນ ແລະ ປັບໃໝຕາມດໍາລັບ 188/ນຍ.


    ທ່ານຮອງຫົວໜ້າພະແນກຕໍາຫຼວດຈະລາຈອນ ປກສ ນວ ໃຫ້ຮູ້ຕື່ມວ່າ: ການປະຕິບັດໜ້າທີ່ແມ່ນໜູນວຽນກັນ ອາທິດລະ 2 ຄັ້ງ ຕາມຈຸດໄຟອໍານາດທີ່ກໍານົດໄວ້ ເພື່ອແນໃສ່ເຮັດໃຫ້ສະພາບການສັນຈອນມີຄວາມເປັນລະບຽບ ຮຽບຮ້ອຍ ຜູ້ຂັບຂີ່ປະຕິບັດກົດລະບຽບທີ່ວາງອອກເພື່ອຫຼຸດຜ່ອນບັນຫາຈະລາຈອນແອອັດ ແລະ ອຸບັດຕິເຫດ; ສະ ນັ້ນ, ຈຶ່ງຮຽກຮ້ອງມາຍັງຜູ້ໃຊ້ລົດ-ໃຊ້ຖະໜົນ ຈົ່ງເປັນເຈົ້າການໃນການປະຕິບັດກົດລະບຽບທີ່ວາງອອກ ແລະ ໃຫ້ຄວາມຮ່ວມມືຕໍ່ການປະຕິບັດຂອງເຈົ້າໜ້າທີ່.