ເດືອນມິຖຸນາ ລາວສົ່ງອອກມູນຄ່າ400ລ້ານໂດລາ ໂດຍມີແຮ່ທອງ  ແລະ ໄຟຟ້າ ນຳຫນ້າ

0
46

ເດືອນ ມີຖຸນາ ປີ 2018 ຜ່ານມາ ມູນຄ່າການນໍາເຂົ້າ ແລະ ສົ່ງອອກ ຂອງ ສປປ ລາວ  ຫຼຸດລົງ 17,8% ເມື່ອທຽບໃສ່ເດືອນຜ່ານມາ. ສິນຄ້າສົ່ງອອກຫຼັກປະກອບ ມີ: ໄຟຟ້າ, ທອງ ແລະ ແຮ່ທອງ, ໂຄງຮ່າງກ້ອງບັນທຶກພາບ, ເຄື່ອງໃຊ້ໄຟຟ້າ, ຄຳປະສົມ ແລະ ເຄື່ອງນຸ່ງຫົ່ມ.

ອີງຕາມຂໍ້ມູນຈາກກະຊວງອຸດສາຫະກຳ ແລະ ການຄ້າໃຫ້ຮູ້ວ່າ:ເດືອນ ມີຖຸນາ ປີ 2018 ຜ່ານມາ ມູນຄ່າການນໍາເຂົ້າ ແລະ ສົ່ງອອກ ຂອງ ສປປ ລາວ ສາມາດບັນລຸໄດ້ທັງໝົດ 796,7 ລ້ານໂດລາ ຫຼຸດລົງ 17,8% ​ເມື່ອ​ທຽບ​ໃສ່​ເດືອນຜ່ານມາ. ໃນນີ້:ການສົ່ງອອກປະຕິບັດໄດ້  400,7 ລ້ານໂດລາ ຫຼຸດລົງ 10,8% ​ເມື່ອ​ທຽບ​ໃສ່​ເດືອນຜ່ານມາ.

ສິນຄ້າ ສົ່ງອອກຫຼັກປະກອບມີ: ທອງ ແລະ ແຮ່ທອງ  93 ລ້ານໂດລາ, ໄຟຟ້າ ມູນຄ່າ 89,8 ລ້ານໂດລາ, ເຄື່ອງໃຊ້ ໄຟຟ້າ  21,1 ລ້ານໂດລາ, ຄຳປະສົມ  19,1 ລ້ານໂດລາ, ໂຄງຮ່າງກ້ອງບັນທຶກພາບ ມູນຄ່າ 17,7 ລ້ານໂດລາ, ເຄື່ອງນຸ່ງຫົ່ມ 15,6 ລ້ານໂດລາ,.

ປະ​ເທດ​ສົ່ງ​ອອກ​ຕົ້ນຕໍ​ແມ່ນ: ​ໄທ ມູນຄ່າ 179 ລ້ານໂດລາ, ຈີນ105,1 ລ້ານໂດລາ, ຫວຽດນາມ  59 ລ້ານໂດລາ, ອິນເດຍ  19 ລ້ານໂດລາ ແລະ ​ເຢຍລະ​ມັນ  4,9 ລ້ານໂດລາ.

ສ່ວນການນໍາເຂົ້າບັນລຸໄດ້ 396 ລ້ານ​ໂດລາ ຫຼຸດລົງ 23,9% ​ເມື່ອ​ທຽບ​ໃສ່​ເດືອນຜ່ານມາ, ສິນຄ້າທີ່ນຳເຂົ້າຕົ້ນຕໍ ແມ່ນ: ນໍ້າມັນ​ເຊຶ້ອ​ໄຟ (ນໍ້າມັນ​ແອັດ​ຊັງ, ກາ​ຊວນ ​ແລະ ກາດ) ມູນຄ່າ  61.4 ລ້ານໂດລາ, ພາຫະນະທາງບົກ ແລະ ຊິ້ນສ່ວນອາໄຫຼ່ ມູນຄ່າ  45,8 ລ້ານໂດລາ, ​ເຄື່ອງໃຊ້ໄຟຟ້າ  26 ລ້ານໂດລາ, ອຸປະກອນກົນຈັກ ມູນຄ່າ 27,8 ລ້ານໂດລາ, ເຫຼັກ ​ແລະ ອຸປະກອນ​ທີ່​ເຮັດ​ດ້ວຍ​ເຫຼັກ  17,6 ລ້ານໂດລາ.
 

ປະ​ເທດ​ທີ່ ສປປ ລາວ​ ນໍາ​ເຂົ້າສ່ວນ​ໃຫຍ່ ຍັງ​ແມ່ນ​ບັນດາ​ປະ​ເທດ​ທີ່​ມີ​ຊາຍ​ແດນ​ຕິດ​ຈອດ ​ເຊັ່ນ: ​ໄທມູນຄ່າ  256 ລ້ານໂດລາ, ຈີນ  57 ລ້ານໂດລາ ແລະ ຫວຽດນາມ ມູນຄ່າ  49 ລ້ານໂດລາ. ນອກ​ນັ້ນ, ຍັງ​ນໍາ​ເຂົ້າ​ມາ​ຈາກປະເທດ ​ຍີ່ປຸ່ນ  6,3 ລ້ານໂດລາ, ສ.​ເກົາຫຼີ 3 ລ້ານໂດລາ, ແບນຊິກ  3 ລ້ານໂດລາ ແລະ ຮົງກົງ  2,2 ລ້ານໂດລາ.

ທີ່ມາ:https://www.laotradeportal.gov.la