ບັນດາແຂວງພາກເໜືອ ເອົາໃຈໃສ່ສ້ອມແປງທາງ ແລະ ເຝົ້າລະວັງຢ່າງໃກ້ຊິດ

0
20

ຝົນຕົກໜັກໃນໄລຍະຜ່ານມາ ສົ່ງຜົນໃຫ້ເສັ້ນທາງຢູ່ບັນດາແຂວງພາກເໜືອຕ້ອງເປັນອຳມະພາດເປັນບາງຈຸດ ເຊິ່ງເກີດຈາກບັນຫາດິນເຈື່ອນລົງທັບຖົມເສັ້ນທາງ, ທາງຂາດ ແລະ ທາງຍຸບ ເຮັດໃຫ້ພາກສ່ວນກ່ຽວຂ້ອງຕ້ອງໄດ້ເຝົ້າລະວັງຢ່າງໃກ້ຊິດຕະຫຼອດ 24 ຊົ່ວໂມງ ຕາມເຂດທີ່ມີຄວາມສ່ຽງ ເພື່ອເຮັດແນວໃດໃຫ້ການສັນຈອນໄປ – ມາໃນລະດູຝົນມີຄວາມສະດວກ, ຂະນະທີ່ຫຼາຍແຂວງກໍ່ມີຄະນະແກ້ໄຂໄພພິບັດຂັ້ນແຂວງ, ເມືອງ ສົມທົບກັບບໍລິສັດກໍ່ສ້າງໃນການສ້ອມແປງທາງທີ່ມັນເປ່ເພເປັນປະຈຳ ເພື່ອແກ້ໄຂຢ່າງທັນການຫາກມີກໍລະນີສຸກເສີນ.

ທ່ານ ພອນສຸກ ອິນທະວົງ ຫົວໜ້າພະແນກໂຍທາທິການ ແລະ ຂົນສົ່ງ ແຂວງຫົວພັນ ເປີດເຜີຍຕໍ່ທີມຂ່າວພວກເຮົາ ວ່າ: ຈາກກໍລະນີຝົນຕົກໃນ 2 ອາທິດຜ່ານມາ ເຮັດໃຫ້ເກີດມີດິນເຈື່ອນທັບເສັ້ນທາງ, ທາງຂາດຫຼາຍສົມຄວນ ໂດຍສະເພາະເມືອງຮ້ຽມ, ເມືອງຊ່ອນ, ຊຳໃຕ້ ແລະ ເມືອງວຽງໄຊ. ໃນນີ້, ທາງຫຼວງແຫ່ງຊາດ ເລກ 1 ( ຫົວພັນ – ຫຼວງພະບາງ ) ເກີດກໍລະນີດິນເຈື່ອນຫຼາຍຈຸດ ແລະ ໜ້າທາງຖືກນໍ້າເຊາະ 1 ຈຸດ ຢູ່ເຂດກິໂລແມັດທີ 58 ເຊິ່ງທັງສອງແຫ່ງປັດຈຸບັນບໍລິສັດໄດ້ແກ້ໄຂທຽວໄປ – ມາໄດ້ແລ້ວ; ສ່ວນທາງຫຼວງແຫ່ງຊາດ 6A ( ສົບເບົາ – ເມືອງລອງ ) ດິນເຈື່ອນຖົມທາງເຊັ່ນກັນ ກໍ່ສາມາດແກ້ໄຂສໍາເລັດໃນຕອນບ່າຍວັນທີ 14 ສິງຫາຜ່ານມາ.

ນອກນັ້ນ, ຍັງມີທາງຫຼວງທ້ອງຖິ່ນຫຼາຍເສັ້ນທີ່ເຊື່ອມຕໍ່ ເຊັ່ນ: ເທສະບານເມືອງຮ້ຽມ – ເມືອງຊ່ອນ, ເມືອງຊ່ອນ –  ຊາຍແດນຫວຽດນາມ, ເຂດຜາຖີ່ – ຊຳເໜືອ, ເມືອງຮ້ຽມ – ຖໍ້າລາ, ເມືອງວຽງໄຊ – ເມືອງຮ້ຽມ ( ສະເພາະເມືອງວຽງໄຊ ຂົວເປ່ເພ 3 ແຫ່ງ ) ເວົ້າລວມແລ້ວພວກເຮົາສາມາດແກ້ໄຂໃຫ້ສາມາດທຽວໄປ – ມາເປັນປົກກະຕິ ເນື່ອງຈາກມີຄະນະຮັບຜິດຊອບຂັ້ນແຂວງ, ເມືອງ ປະຈໍາຮ່ວມກັບບໍລິສັດກໍ່ສ້າງປະຈຳຢູ່ແຕ່ລະຈຸດທີ່ເປັນເປົ້າໝາຍຂອງການເຝົ້າລະວັງໃນລະດູຝົນ.

ຂະນະທີ່, ທ່ານ ໂຈມ ໄຊສົງຄາມ ຫົວໜ້າພະແນກ ຍທຂ ແຂວງບໍ່ແກ້ວ ໃຫ້ສຳພາດອີກວ່າ: ສຳລັບແຂວງພວກເຮົາມີ 3 ເມືອງ ທີ່ໄດ້ຮັບຜົນກະທົບໜັກຈາກຝົນຕົກໄລຍະຜ່ານມາ ປະກອບມີ: ເມືອງເມິງ, ເມືອງປາກທາ ແລະ ເມືອງຜາອຸດົມ. ໃນນີ້, ທາງດິນແດງຂອງເມືອງເມິງ ຢູ່ກິໂລແມັດທີ 40 ຖືກຕັດຂາດຍາວປະມານ 4 – 5 ກິໂລແມັດ ເຊິ່ງທາງແຂວງໄດ້ມີການສໍາຫຼວດກໍາລັງຈະຕັດທາງໃໝ່ໃນໄວໆນີ້; ສ່ວນເສັ້ນທາງ ເລກທີ 11 ເມືອງປາກທາ ( ປາກທາ – ກ້ອນຕື້ນ ) ມີປະມານ 6 – 7 ຈຸດ ທີ່ກຳລັງສ້ອມແປງຢູ່ເພື່ອແກ້ໄຂໃຫ້ສາມາດທຽວໄປ – ມາໄດ້ ແລະ ລໍຖ້າໝົດລະດູຝົນຈຶ່ງຈະມີການຍົກລະດັບຄືນໃໝ່; ຂະນະທີ່ເສັ້ນທາງເມືອງຜາອຸດົມ – ປາກທາ ກໍ່ໄດ້ມອບໃຫ້ບໍລິສັດທີ່ຮັບຜິດຊອບກໍ່ສ້າງເສັ້ນທາງດັ່ງກ່າວໃຫ້ເປັນຜູ້ແກ້ໄຂສຸກເສີນເລີຍ; ດ້ານທາງຫຼວງແຫ່ງຊາດ R3 ( ຊາຍແດນໄທ – ບໍ່ແກ້ວ – ຫຼວງນໍ້າທາ – ຊາຍແດນຈີນ ) ມີທາງຂາດ 3 ຈຸດ ເຊິ່ງມີສອງບໍລິສັດເປັນຜູ້ຮັບເໝົາສ້ອມແປງແກ້ໄຂປະຈໍາຢູ່ແລ້ວ.

ດ້ານ ທ່ານ ບຸນທະວີ ໂສສຸກັນ ຫົວໜ້າພະແນກ ຍທຂ ແຂວງຜົ້ງສາລີ ໃຫ້ຮູ້ຕື່ມວ່າ: ມາຮອດດຽວນີ້ເສັ້ນທາງທີ່ໄດ້ຮັບຜົນກະທົບຈາກຝົນຕົກໜັກແມ່ນຢູ່ເມືອງຍອດອູ ( ຍອດອູ – ບຸນເໜືອ ) ຢູ່ກິໂລແມັດທີ 79 ເກີດດິນເຈື່ອນເຮັດໃຫ້ທາງຂາດປະມານ 72 ແມັດ ເຊິ່ງທາງບໍລິສັດກໍາລັງແກ້ໄຂຢູ່; ສ່ວນເມືອງບຸນໃຕ້ ແລະ ເມືອງຂວາ ເຊິ່ງປັດຈຸບັນຄະນະຮັບຜິດຊອບຂັ້ນແຂວງ, ເມືອງ ສົມທົບກັບບໍລິສັດເພື່ອເຝົ້າລະວັງ ແລະ ສ້ອມແປງເປັນປົກກະຕິ. ຄຽງຄູ່ກັນນັ້ນ, ຍັງມີເສັ້ນທາງຫຼວງແຫ່ງຊາດ 1A ແລະ 2E ກໍ່ມີດິນເຈື່ອນ, ທາງຕັດຂາດໃນຫຼາຍຈຸດແຕ່ກໍ່ສາມາດແກ້ໄຂໄດ້ແລ້ວ.

ສຳລັບແຂວງຫຼວງນ້ຳທາ ທ່ານ           ສຸວັນເພັງ ວົງໄຊ ຫົວໜ້າພະແນກ ຍທຂ ແຂວງ ກໍ່ໄດ້ອະທິບາຍສະພາບເສັ້ນທາງພາຍໃນແຂວງຕື່ມອີກວ່າ: ສຳລັບເມືອງລອງ ແມ່ນມີຂົວເປ່ເພ 2 ຈຸດຄື: 1). ເຂດເຊື່ອມຕໍ່ລະຫວ່າງເສັ້ນທາງ ເລກທີ 17B ໃນເທສະບານເມືອງລອງ ( ຂົວເຫຼັກຍາວ 15,8 ແມັດ ) ຖືກນ້ຳໄຫຼຊຸເສຍຫາຍໜັກ ເຮັດໃຫ້ການໄປ – ມາຫາສູ່ໃຊ້ເຮືອເປັນຫຼັກ, ສ່ວນລົດບັນທຸກແມ່ນບໍ່ສາມາດຂ້າມໄດ້; 2). ເສັ້ນທາງ ເລກທີ 1504 ຈາກເທສະບານເມືອງລອງ – ຊົນນະບົດ ຂົວຂ້າມຖືກນໍ້າຖ້ວມເສຍຫາຍເຊັ່ນກັນ ເຊິ່ງຂົວທັງ 2 ແຫ່ງ ທາງແຂວງມີແຜນຈະສ້າງຂົວໃໝ່ຍັງລໍຖ້ານໍ້າຫຼຸດລົງຈຶ່ງຈະລົງມືກໍ່ສ້າງ ຄາດວ່າມູນຄ່າທັງໝົດປະມານ 5 ຕື້ກີບ; ສໍາລັບເສັ້ນທາງເມືອງນາແລ, ເມືອງວຽງພູຄາ, ເມືອງສິງ ລວມທັງເສັ້ນທາງ R3 ທີ່ເຊື່ອມຕໍ່ໄປທາງແຂວງບໍ່ແກ້ວ ກໍ່ມີດິນເຈື່ອນຖົມທາງເລັກໜ້ອຍ, ແຕ່ກໍ່ສາມາດແກ້ໄຂໃຫ້ທຽວໄປ – ມາໄດ້ປົກກະຕິ.

ແຂວງຫຼວງພະບາງ ທ່ານ ບຸນຄົງ ສຸກສະຫວັດ ຮອງຫົວໜ້າພະແນກ ຍທຂ ແຂວງ ໄດ້ເປີດເຜີຍວ່າ: ສຳລັບແຂວງພວກເຮົາສ່ວນໃຫຍ່ກໍ່ຍັງຖືວ່າປົກກະຕິ, ມີພຽງແຕ່ເຂດກາສີ – ເມືອງນານ ( ພູເກົ້າຫຼັກ ) ເຂດກິໂລແມັດທີ 33 ເກີດມີດິນເຈື່ອນຖົມທາງ ແລະ ທາງເປ່ເພຈົນກິ່ວ ຈຶ່ງຢາກໃຫ້ລົດບັນທຸກຫຼີກລຽງນໍາໃຊ້ເສັ້ນທາງນີ້ ໄປທຽວເສັ້ນກາສີ – ພູຄູນ – ຫຼວງພະບາງ ເປັນກໍລະນີຊົ່ວຄາວ, ສ່ວນລົດກະບະທົ່ວໄປຖ້າຈະທຽວທາງນີ້ແນະນໍາຕ້ອງມີໂຟວິນ ເນື່ອງຈາກເປັນທາງຂ້ອນຂ້າງສູງຊັນ ເຊິ່ງປັດຈຸບັນທາງບໍລິສັດຜູ້ຮັບເໝົາກໍາລັງສ້ອມແປງຢູ່ແຕ່ກໍ່ສາມາດທຽວ ໄດ້.

ແຂວງໄຊຍະບູລີ: ທ່ານ ແພງຊ້ອຍ ແພງເມືອງ ຫົວໜ້າພະແນກ ຍທຂ ແຂວງ ເປີດເຜີຍຕໍ່ທີມຂ່າວຕື່ມວ່າ: ສຳລັບເສັ້ນທາງຫຼວງແຫ່ງຊາດ ເລກທີ 4, ເລກທີ 4A ແລະ 2W ຍັງບໍ່ມີຜົນກະທົບຈາກດິນເຈື່ອນ ຫຼື ຝົນຕົກໜັກ ເນື່ອງຈາກທາງແຂວງໄດ້ກຽມຄວາມພ້ອມໃຫ້ແຕ່ລະບໍລິສັດປະຈຳຢູ່ແຕ່ລະຈຸດ ຖ້າຫາກມີທາງຍຸບໂຕ, ທາງເປ່ເພ ຫຼື ດິນເຈື່ອນ ແມ່ນໃຫ້ສາມາດແກ້ໄຂໄດ້ທັນທີ; ສ່ວນເສັ້ນທາງຮ່ອມໃນເທສະບານມີພຽງແຕ່ເມືອງໄຊສະຖານ ມີພຽງ 1 ບ້ານເທົ່ານັ້ນທີ່ທາງຂາດ ແລະ ກໍາລັງສ້ອມແປງຢູ່ ໂດຍລວມພາຍໃນແຂວງພວກເຮົາໄດ້ຮັບຜົນກະທົບເລັກໜ້ອຍ ແລະ ກໍ່ສາມາດແກ້ໄຂໄດ້.

ແຂວງຊຽງຂວາງ: ທ່ານ ສົມພອນ ສີອາໄພ ຫົວໜ້າພະແນກ ຍທຂ ແຂວງ ກໍ່ໄດ້ລາຍງານຕື່ມວ່າ: ຜ່ານການຈັດກອງປະຊຸມປຶກສາຫາລືກັບ ກະຊວງ ຍທຂ ທີ່ລົງມາເຮັດວຽກຢູ່ແຂວງຊຽງຂວາງ ພວກເຮົາໃນອາທິດນີ້ ພວກເຮົາໄດ້ມີການວາງແຜນແກ້ໄຂກໍລະນີສຸກເສີນ ໂດຍສະເພາະແມ່ນເສັ້ນທາງ 5A ຈາກເມືອງຜາໄຊ – ໄຊສົມບູນ ຫຼື ແຕ່ເຂດລາດຮ່ວງ – ລ່ອງແຈ້ງ ມີຄວາມຍາວ 50 ກິໂລແມັດ, ຖືກຕັດຂາດ 30 ກິໂລແມັດ ຍ້ອນນໍ້າຖ້ວມ ແລະ ດິນເຈື່ອນຖົມທາງ ນັ້ນຖືວ່າແກ້ໄຂໄດ້ໃນລະດັບໃດໜຶ່ງແລ້ວ.

ສ່ວນເສັ້ນທາງເມືອງໜອງແຮດ ມີ 18 ຄອບຄົວ ໄດ້ຮັບຜົນກະທົບຈາກນໍ້າຖ້ວມ ແລະ ເສັ້ນທາງບໍ່ສາມາດທຽວໄດ້; ສ່ວນເມືອງໝອກ ໄດ້ມີກໍລະນີທາງຍຸບຕົວ ແລະ ດິນເຈື່ອນຖົມທາງ ເຊິ່ງຢູ່ໃນຂັ້ນຕອນການສ້ອມແປງ, ຂະນະທີ່ເມືອງຄຳ, ເມືອງແປກ, ເມືອງຄູນ ແລະ ເມືອງພູກູດ ກໍ່ມີພຽງເລັກໜ້ອຍເທົ່ານັ້ນ ແລະ ສາມາດແກ້ໄຂໃຫ້ທຽວເປັນປົກກະຕິ.

[ ຂ່າວ: ສົມສະຫວິນ ]