ປະຊາຊົນບ້ານທວດ ເມືອງຈຳພອນ ໄດ້ຮັບເຄື່ອງຊ່ວຍເຫຼືອນ້ຳຖ້ວມ

0
9

ວັນທີ 10 ສິງຫາ 2018 ຜ່ານມາ ທ່ານ ສັນຕິພາບ ພົມວິຫານ ເຈົ້າແຂວງໆສະຫວັນນະເຂດ ແລະ ທ່ານ ນາງ ອິນລາວັນ  ແກ້ວບຸນພັນ ປະທານສູນກາງສະຫະພັນແມ່ຍິງລາວ ພ້ອມຄະນະໄດ້ລົງມອບເຄື່ອງຊ່ວຍເຫຼືອພໍ່ແມ່ປະຊາຊົນຜູ້ທີ່ປະສົບໄພນ້ຳຖ້ວມທີ່ບ້ານທວດ ເມືອງຈຳພອນ.

ທ່ານ ສຸດທິ ຜິວສຸລິຍະມາດ ເຈົ້າເມືອງໆຈຳພອນ ກໍ່ໄດ້ລາຍງານສະພາບຜົນເສຍຫາຍອັນເນື່ອງມາຈາກໄພນ້ຳຖ້ວມຢູ່ເມືອງຈຳພອນ ໃຫ້ຊາບວ່າ: ເມືອງຈຳພອນ ມີ 11 ບ້ານທີ່ໄດ້ຮັບຜົນກະທົບຈາກໄພນ້ຳຖ້ວມ ເຊິ່ງປະກອບມີ: ບ້ານເພຍກ່າ, ລຳບອງ, ວັງເມົາ, ລຳເທນ, ແກ້ງປູນ, ສະຄຶນໃຕ້, ສະຄຶນເໜືອ, ທ່າມ່ວງ, ດົງເມືອງ ແລະ ບ້ານນານົກຂຽນ; ມີ 2.017 ຄອບຄົວໄດ້ຮັບຜົນກະທົບ, 1.808 ຫຼັງຄາເຮືອນ, 11.958 ຄົນ ຍິງ 6.161 ຄົນ ແລະ 8 ບ້ານ ເສັ້ນທາງສັນຈອນຖືກຕັດຂາດ ບາງຈຸດກໍ່ເຮັດໃຫ້ຂົວເປ່ເພ ສະເພາະຢູ່ກຸ່ມບ້ານທວດ ມີເນື້ອທີ່ປັກດຳຖືກນ້ຳຖ້ວມ 714,76 ເຮັກຕາ ກວມ 6 ບ້ານ ຄື: ບ້ານທວດ, ໜອງກະໂດກ, ລຳເທນ, ລຳບອງ, ວັງເມົາ ແລະ ບ້ານເພຍກ່າ ລວມມີ 634 ຄອບຄົວ, 605 ຫຼັງຄາ ແລະ ມີ 3.628 ຄົນ ຍິງ 1.897 ຄົນ ຖືກຜົນກະທົບ, ເນື້ອທີ່ປັກດຳແລ້ວເສຍຫາຍ 563,02 ເຮັກຕາ. ນອກຈາກນີ້, ກໍ່ຍັງມີສັດລ້ຽງ ແລະ ໜອງປາເສຍຫາຍເປັນຈຳນວນຫຼາຍ.

ໂອກາດນີ້, ທ່ານ ສັນຕິພາບ  ພົມວິຫານ ເຈົ້າແຂວງໆສະຫວັນນະເຂດ ກໍ່ໄດ້ສະແດງຄວາມເປັນຫ່ວງເປັນໄຍພໍ່ແມ່ປະຊາຊົນຜູ້ທີ່ໄດ້ຮັບຜົນກະທົບຈາກໄພນ້ຳຖ້ວມໃນຄັ້ງນີ້ ໂດຍໄດ້ເນັ້ນໜັກໃຫ້ພໍ່ແມ່ປະຊາຊົນເອົາໃຈໃສ່ຮັກສາສຸຂະພາບບໍ່ໃຫ້ຖືເບົາ, ຕ້ອງຮັກສາອະນາໄມ 3 ສະອາດ ເພາະເລື່ອງສຸຂະພາບເປັນສິ່ງທີ່ສຳຄັນຫຼາຍ, ພາຍຫຼັງທີ່ນ້ຳຫຼຸດລົງແລ້ວທາງແຂວງກໍ່ຈະໄດ້ປະສານງານກັບຂັ້ນເມືອງເພື່ອຟື້ນຟູຊີວິດການເປັນຢູ່ຂອງພໍ່ແມ່ປະຊາຊົນ. ພ້ອມກັນນີ້, ຊາວບ້ານກໍ່ຕ້ອງໄດ້ຊ່ວຍກັນ ເປັນຕົ້ນແມ່ນການສ້ອມແປງຊົນລະປະທານ ແລະ ເຮັດການຜະລິດລະດູແລ້ງ ແລະ ພືດສຳຮອງເພື່ອເປັນການທົດແທນຜົນຜະລິດທີ່ເສຍໄປ. ໂອກາດດຽວກັນນີ້, ທ່ານເຈົ້າແຂວງ ແລະ ປະທານສູນກາງສະຫະພັນແມ່ຍິງລາວ ກໍ່ໄດ້ມອບເຄື່ອງອຸປະໂພກ – ບໍລິໂພກ, ເຂົ້າສານອາຫານແຫ້ງ, ໝີ່ສຳເລັດຮູບ, ເຄື່ອງນຸ່ງຫົ່ມ ແລະ ນ້ຳດື່ມ ເພື່ອເປັນຂວັນກຳລັງໃຈໃຫ້ພໍ່ແມ່ປະຊາຊົນທີ່ຖືກຜົນກະທົບຈາກໄພນ້ຳຖ້ວມອີກດ້ວຍ.