ມາຮູ້ຈັກກັບສິລະປິນ ດວງຕາ ຖິ່ນເມືອງຄໍາ ໃຫ້ຫຼາຍຂຶ້ນ

0
15

ມື້ນີ້ ທີມຂ່າວ ເສດຖະກິດ – ການຄ້າ ຈະພາແຟນເພງມາຮູ້ຈັກກັບສິລະປິນ ດວງຕາ ຖິ່ນເມືອງຄໍາ ເຊິ່ງເປັນອີກສິລະປິນໜຶ່ງທີ່ມີຜົນງານຫຼາກຫຼາຍອອກສູ່ສາຍຕາສັງຄົມ ບໍ່ວ່າຈະເປັນເພງລາວ ແລະ ເພງກຶມມຸ ເພິ່ນກໍ່ໄດ້ປ່ອຍອອກມາໃຫ້ແຟນເພງໄດ້ຟັງກັນເລື່ອຍໆ ລວມທັງໝົດ 9 ເພງດ້ວຍກັນ. ໃນນັ້ນ, ມີເພງລາວ 6 ເພງ ແລະ ເພງກຶມມຸ 3 ເພງ.

ສິລະປິນ ດວງຕາ ຖິ່ນເມືອງຄໍາ ໃຫ້ຮູ້ວ່າ: ຕົນເອງແມ່ນຊົນເຜົ່າກຶມມຸ, ບ້ານເກີດເມືອງນອນຢູ່ທີ່ບ້ານນາເມືອງ ເມືອງຄໍາ ແຂວງຊຽງຂວາງ, ກ່ອນຕົນຈະມັກຮັກໃນການຮ້ອງເພງນີ້ ຕອນຍັງຮຽນປະຖົມ – ມັດຖະຍົມປາຍ ຕົນເອງເຄີຍໄດ້ປະກວດຮ້ອງເພງຢູ່ໂຮງຮຽນເລື່ອຍໆ. ຈາກນັ້ນ, ຕົນກໍ່ໄດ້ສຸມໃສ່ຮຽນຮູ້ເລື່ອງວິທີການຮ້ອງເພງ ຈົນມາມື້ໜຶ່ງຕົນກໍ່ໄດ້ມີໂອກາດມາພົບກັບໝູ່ຫຼາຍຄົນ ແລະ ໃນຂະນະນັ້ນຕົນກໍ່ຮູ້ຈັກກັບຫົວໜ້າຄ້າຍເພງ ທີເຄ ຊາວລາວ ເຊິ່ງເພງທໍາອິດທີ່ແຈ້ງເກີດໃນວົງການບັນເທີງແມ່ນເພງ       “ ສະເໜ່ພາກເໜືອ ” ປະພັນໂດຍ ອາຈານ ສຸນທອນ ຕະວັນຄໍາ ດົນຕີໂດຍ ອາຈານ ບຸນມະນີ ແລະ ເພງທີ 2 ແມ່ນເພງ “ ນໍ້າກົດຫົດໃຈ ” ຜູ້ປະພັນເພງກໍ່ແມ່ນ ອາຈານ ສຸນທອນ ຄືກັນ ໂດຍຄ້າຍເພງ ທີເຄ ຊາວລາວ ເປັນຜູ້ປ່ອຍ, ສ່ວນເພງກຶມມຸ “ ອັຫຫຣືນເຍືອມເມິໂດຈີຣັກ ” ( ມີແຕ່ໃຈຜູ້ໃດຊິຮັກ ) ເປັນເພງທີ່ແຈ້ງເກີດໃນວົງການບັນເທີງກຶມມຸ ທີ່ສັງກັດຢູ່ຄ້າຍເພງ ກຶມມຸ ຍະບອຍ ສະຕູດີໂອ ແລະ ອີກຫຼາຍໆຜົນງານທີ່ຕົນໄດ້ປ່ອຍອອກໃຫ້ແຟນເພງທົ່ວປະເທດໄດ້ຟັງກັນແລ້ວ.

ຫຼ້າສຸດຕົນເອງກໍ່ໄດ້ຖ່າຍເອັມວີເພງໃໝ່ທີ່ເປັນເພງຮ້ອງຄູ່ 2 ເພງ ກັບສິລະປິນ ຂັນທະລີ ຖິ່ນເມືອງຄໍາ ທີ່ເປັນເພງກຶມມຸ ຫວັງວ່າຈະຖືກໃຈກັບແຟນເພງບໍ່ຫຼາຍກໍ່ໜ້ອຍ, ສ່ວນເພງທີ່ຕົນເອງໄດ້ຮ້ອງຜ່ານມາຈົນມາຮອດປັດຈຸບັນແມ່ນມີເນື້ອໃນເວົ້າເຖິງຄວາມຮັກເປັນສ່ວນຫຼາຍ ໂດຍບາງເພງກໍ່ແຕ່ງຂຶ້ນຈາກຊີວິດຈິງແດ່ ແລະ ເກີດຈາກການສັງເກດເບິ່ງຕາມສະພາບການດໍາລົງຊີວິດຂອງສັງຄົມໃນປັດຈຸບັນ ໂດຍສະເພາະແມ່ນໄວໜຸ່ມທັງຫຼາຍທີ່ເຫັນວ່າຄວາມຮັກເປັນສິ່ງທີ່ສວຍງາມສະເໝີ, ແຕ່ກ່ອນຈະຮັກໃຜຄົນໜຶ່ງຕ້ອງໄດ້ສຶກສາກັນດີໆວ່າເຂົາເຂົ້າມາວິທີໃດແດ່? ນີ້ຄືເນື້ອໃນລວມຂອງແຕ່ລະເພງທີ່ຕົນໄດ້ຮ້ອງ ແລະ ອອກສູ່ສາຍຕາສັງຄົມແລ້ວ, ຖ້າຜູ້ໃດໄດ້ຟັງແລ້ວກໍ່ຢ່າລື່ມໃຫ້ກໍາລັງໃຈແດ່ເດີ.

ທ້າຍນີ້, ສິລະປິນ ດວງຕາ            ຖິ່ມເມືອງຄໍາ ຍັງໄດ້ຝາກຜົນງານຕົນເອງໃຫ້ແຟນເພງທົ່ວປະເທດຕິດຕາມ ບໍ່ວ່າຈະເປັນທາງເຟສບຸ໊ກ ດວງຕາ ຖິ່ນເມືອງຄໍາ, ຢູທູບ ແລະ ຄ້າຍເພງ ກຶມມຸ ຍະບອຍ ສະຕູດີໂອ ໄດ້.

[ ຂ່າວ: ເພັດລີສອນ; ຮູບຈາກ: ຄ້າຍເພງ ກຶມມຸ ຍະບອຍ ສະຕູດີໂອ ]