ແຂວງບໍ່ແກ້ວ ກວດກາບໍລິມາດ ລົດບັນທຸກນໍ້າມັນ ເຊື້ອໄຟ

    0
    30

    ຂປລ.ໃນອາທິດທີ່ຜ່ານມານີ້ ຂະແໜງ ມາດຕະຖານ ແລະ ວັດແທກ ພະແນກວິທະຍາສາດ ແລະ ເຕັກໂນໂລຊີ ແຂວງບໍ່ແກ້ວ ໂດຍປະສານສົມທົບກັບວິຊາການ ກະຊວງວິທະຍາສາດ ແລະ ເຕັກ ໂນໂລຊີ ໄດ້ລົງເຄື່ອນໄຫວ ຕິດຕາມ, ກວດກາ, ກວດສອບ  ແລະ ລົງທະບຽນບໍລິມາດ ລົດບັນທຸກ ນໍ້າ ມັນເຊຶື້ອໄຟ ຢູ່ບັນດາສາງເກັບນໍ້າມັນໃນແຂວງບໍ່ແກ້ວ ໂດຍກຳນົດເອົາສາງເກັບນໍ້າມັນເຊື້ອໄຟ ບໍລິສັດໄດ ນາມິກ ເປັນສະຖານທີ່ເປີດພິທີ ແລະ ມີຕ່າງໜ້າຂອງບໍລິສັດເຂົ້າຮ່ວມ ແລະ ໃຫ້ຄວາມຮ່ວມມື ເປັນຢ່າງດີ.

    ທ່ານ ກອງມີ ສຸດເທດລັດ ຫົວໜ້າຂະແໜງຊັບສີນທາງປັນຍາ ມາດຕະຖານ ແລະ ວັດແທກ ໄດ້ລາຍງານ​ໃຫ້​ຊາບການລົງກວດກາໃນຄັ້ງນີ້ວ່າ: ສຳລັບປີ 2018 ນີ້ ​ແມ່ນ​ປະຕິບັດ ຕາມແຜນການ ເຄື່ອນໄຫວ ຂອງຂະແໜງ ກໍຄືພະແນກ ແລະ ອີງໃສ່ທິດຊີ້ນໍາຂອງຂັ້ນເທິງ ໃນການຕິດຕາມ, ກວດກາ, ກວດສອບ ແລະ ຊຸກຍູ້ບັນດາຫົວໜ່ວຍທຸລະກິດ ພາຍໃນແຂວງບໍ່ແກ້ວ ​ໂດຍສະເພາະແມ່ນ ການນໍາເຂົ້າ ນໍ້າມັນເຊື້ອໄຟ​ເພື່ອ​ຊົມໃຊ້ຢູ່ພາຍໃນ ທີ່ໄດ້ມາພັກຢູ່ບັນດາສາງເກັບນໍ້າມັນ ເພື່ອສົ່ງຕໍ່ໃຫ້ບັນດາປໍ້າຈໍາ ໜ່າຍຕ່າງໆ ເພື່ອໃຫ້ການຂົນສົ່ງ ຮັບປະກັນຄວາມຖືກຕ້ອງ ທາງດ້ານເອສານ ​ແລະ  ໄດ້ຮັບອໍານວຍ ຄວາມສະດວກຈາກໜ່ວຍກວດກາ, ລົດບັນທຸກນໍ້າມັນ ຕ້ອງໄດ້ຮັບການຄຸ້ມຄອງ ແລະ ຂຶ້ນທະບຽນ ບໍລິມາດ ໃຫ້ຖືກຕ້ອງຕາມລະບຽບຫລັກການ ຈຶ່ງສາມາດນຳໃຊ້ເຄື່ອນຍ້າຍນ້ຳມັນໄດ້.

    ການລົງຕິດຕາມ, ກວດກາ, ກວດສອບ ແລະ ຂຶ້ນທະບຽນ ບໍລິມາດ ລົດບັນທຸກນໍ້າມັນເຊື້ອໄຟຟ້າ ຄັ້ງນີ້ ​ໄດ້​ຈັດ​ຂຶ້ນເປັນຄັ້ງທຳອິດ ​ໂດຍ​ໃຊ້ໃຊ້ເວລາ 4 ວັນ, ໃນຈໍານວນ 5 ບໍລິສັດ ມີລົດບັນທຸກທັງໝົດ 31 ຄັນ ທີ່ໄດ້ຮັບການກວດກາ. ໃນນັ້ນ, ມີປະເພດລົດ 6-22 ລໍ້; ມີຂະໜາດບັນຈຸ 8.000-45.000 ລິດ. ທັງ​ນີ້ ເພື່ອຫັນເຂົ້າສູ່ລະບຽບການ ແລະ ອໍານວຍຄວາມສະດວກ ຕໍ່ຜູ້ປະກອບການ ທີ່ໄດ້ຂຶ້ນທະບຽນ ບໍລິມາດລົດ ປະຈໍາຢູ່ກັບທີ່ ​ໂດຍບໍ່ໄດ້ເຄື່ອນຍ້າຍໄປຂຶ້ນທະບຽນ ບໍລິມາດຢູ່ບ່ອນອື່ນ ແລະ ເປັນການ ປະຢັດງົບປະມານໃນການເຄື່ອນຍ້າຍຕື່ມອີກ. 

    ຂ່າວ-ພາບ: ປະກາສິດ ທຳມະວົງ

    ເນື້ອໃນ: ຂປລ

    ຂໍຂອບໃຈ ຂ່າວສານປະເທດລາວ