ການກໍ່ສ້າງເຂື່ອນໄຟຟ້ານ້ຳອູ 1 ຄືບໜ້າ 40% ສ່ວນການຍັບຍ້າຍປະຊາຊົນທີ່ໄດ້ຮັບຜົນກະທົບຈາກໂຄງການສຳເລັດແລ້ວ

0
14
loading...

ການກໍ່ສ້າງເຂື່ອນໄຟຟ້ານ້ຳອູ 1 ສໍາເລັດແລ້ວປະມານ 40% ຂອງໜ້າວຽກທັງໝົດ ພາຍຫລັງຈາກເລີ່ມລົງມືກໍ່ ສ້າງນັບແຕ່ເດືອນ ເມສາ ປີ 2016 ໂດຍແມ່ນ ບໍລິສັດ ຊີໂນ ໄຮໂດຼ ພາວເວີ ເປັນຜູ້ຈັດຕັ້ງປະຕິບັດ, ມູນຄ່າການກໍ່ສ້າງທັງໝົດ 381 ລ້ານໂດລາສະຫະລັດ ຫລື ປະມານ 3 ພັນກວ່າຕື້ກີບ.

ທ່ານ ຫວງ ແຢນເຕີ (Huang Yande ) ຜູ້ອຳນວຍການເຂື່ອນໄຟຟ້ານໍ້າອູ 1 ລາຍງານໃຫ້ຮູ້ໃນໂອກາດທີ່ສື່ມວນຊົນ ແລະ ພະນັກງານຂະແໜງການກ່ຽວຫລາຍກ່ວາ 40 ຄົນຈາກ 6 ປະເທດໃນຂອບການຮ່ວມມືແມ່ນ້ຳຂອງ-ແມ່ນ້ຳລ້ານຊ້າງ ຄື: ກໍາປູເຈຍ,ຈີນ, ລາວ, ໄທ, ຫວຽດນາມ ແລະ ມຽນມາ ຢ້ຽມຢາມໂຄງການກໍ່ສ້າງເຂື່ອນໄຟຟ້ານ້ຳອູ 1 ໃນວັນທີ 4 ກໍລະກົດ 2018 ວ່າ: ການກໍ່ສ້າງເຂື່ອນໄຟຟ້ານ້ຳອູ່ 1 ຈະໃຫ້ສຳເລັດໃນເດືອນ ຕຸລາ ປີ 2020, ພາຍໃນເຂື່ອນຈະມີຈັກປັ່ນໄຟຈຳນວນ 4 ເຄື່ອງ ແຕ່ລະເຄື່ອງມີກຳລັງການຜະລິດ 45 ເມກາວັດ, ລວມທັງໝົດເປັນ 180 ເມກາວັດ. ຜ່ານມາທາງບໍລິສັດໄດ້ເອົາໃຈໃສ່ຈັດຕັ້ງປະຕິບັດໜ້າວຽກຕ່າງຯ ຢ່າງຕໍ່ເນື່ອງ ເປັນຕົ້ນ: ວຽກຂຸດຫີນ, ຈົກດິນ ແລະ ເທກັນເຈື່ອນຄອງ, ວຽກເຫຼັກ, ວຽກເທຄອນກຣີດ, ການກໍ່ສ້າງເຮືອນຈັກ ແລະ ໜ້າວຽກ ອື່ນໆ, ປັດຈຸບັນສາມາດປະເມີນໄດ້ວ່າມີຄວາມຄືບແລ້ວປະມານ 40%.


ທ່ານ ບຸນທັນ ບໍລະວົງ, ຮອງເຈົ້າເມືອງຯ ປາກອູ, ແຂວງ ຫລວງພະບາງ ໃຫ້ສຳພາດວ່າ: ການກໍ່ສ້າງເຂື່ອນໄຟຟ້ານ້ຳອູ 1 ສົ່ງຜົນກະທົບຕໍ່ປະຊາຊົນ 1.088 ຄອບຄົວ ໃນ 17 ບ້ານພາຍໃນເມືອງ ປາກອູ, ຜົນກະທົບສ່ວນໃຫຍ່ແມ່ນເນື້ອທີ່ທຳການຜະລິດ, ໃນນີ້ມີ 7 ບ້ານຕ້ອງຍັບຍ້າຍໄປຢູ່ບ່ອນໃໝ່ຍ້ອນນ້ຳຈະຖ້ວມ ແຕ່ມີພຽງ 4 ບ້ານທີ່ຕົກລົງໃຫ້ ໂຄງການຍັບຍ້າຍໃຫ້ ຄື: ບ້ານ ຫ້ວຍໂລ ມີ 134 ຄອບຄົວ, ບ້ານ ລາດທ່າແຮ່ 77 ຄອບຄົວ, ບ້ານ ປາກແຈກ 49 ຄອບ ຄົວ ແລະ ບ້ານ ຫາດຊວາ 35 ຄອບຄົວ ໂດຍໄດ້ຍັບຍ້າຍສຳເລັດແລ້ວໃນວັນທີ 29 ມິຖຸນາ 2018. ສ່ວນອີກ 3 ບ້ານ ຄື: ບ້ານ ຫ້ວຍເຫລືອງ, ຫາດປາງ ແລະ ບ້ານ ຝາຍ ຍ້ອນມີປະຊາຊົນທີ່ຕ້ອງຍັບຍ້າຍຈຳນວນໜ້ອຍ ເຂົາເຈົ້າຈິ່ງເລືອກຮັບເອົາເງິນນຳໂຄງການແລ້ວຍັບຍ້າຍເອງ. ສຳລັບປະຊາຊົນ 4 ບ້ານທີ່ໂຄງການເປັນຜູ້ຈັດສັນໃຫ້, ທາງໂຄງການໄດ້ກໍ່ສ້າງເຮືອນ, ພ້ອມສິ່ງອຳນວຍຄວາມສະດວກ ເປັນຕົ້ນ: ເສັ້ນທາງ, ໄຟຟ້າ, ນ້ຳສະອາດ, ໂຮງຮຽນ ແລະ ອື່ນຯ.

ສ່ວນການກໍ່ສ້າງເຮືອນແມ່ນອີງຕາມຈຳນວນຄົນໃນຄອບຄົວ, ຄອບຄົວທີ່ມີ 1-3 ຄົນ ໄດ້ເຮືອນຂະໜາດ 5X10 ແມັດ, 4-7 ຄົນ ໄດ້ເຮືອນຂະໜາດ 6,5X10 ແມັດ ແລະ ຄອບຄົວທີ່ມີຫລາຍກ່ວາ 8 ຄົນ ໄດ້ເຮືອນຂະໜາດ 8,5X10 ແມັດ. ມາຮອດປັດຈຸບັນ ໂຄງການກໍ່ສ້າງເຂື່ອນໄຟຟ້ານ້ຳອູ 1 ໄດ້ຈ່າຍເງິນຄ່າຊົດເຊີຍຜົນເສຍຫາຍຂອງປະຊາຊົນແລ້ວທັງໝົດ8.522.004.750 ກີບ. ສ່ວນການຈັດສັນອາຊີບຄົງທີ່ໃຫ້ປະຊາຊົນທີ່ໄດ້ຮັບຜົນກະທົບຈາກໂຄງການທັງໝົດພວມຢູ່ໃນຂັ້ນຕອນເກັບກຳຂໍ້ມູນລະອຽດເພື່ອໃຫ້ຮູ້ວ່າແຕ່ລະຄອບຄົວມີທ່າແຮງການພັດທະນາເສດຖະກິດຄອບຄົວໃນດ້ານໃດ ຈາກນັ້ນຈະສະເໜີໃຫ້ໂຄງການໃຫ້ການຊ່ວຍເຫລືອຕາມຄວາມເໝາະສົມໃນໄວຯ ນີ້


ເຂື່ອນນ້ຳອູ 1 ຕັ້ງຢູ່ບ້ານ ຄອນຄຳ, ເມືອງ ປາກອູ, ເປັນໜຶ່ງໃນເຂື່ອນທີ່ນອນຢູ່ໃນການກໍ່ ສ້າງເຂື່ອນໄຟຟ້ານ້ຳອູໄລຍະທີ 2 ຂອງໂຄງການກໍ່ສ້າງເຂື່ອນໄຟຟ້ານ້ຳອູ ຢູ່ແຂວງ ຫຼວງພະບາງ ຄື: ເຂື່ອນນ້ຳອູ 1, 3, 4 ແລະ ເຂື່ອນນ້ຳອູ 7ຂອງກຸ່ມບໍລິສັດ Power China ສປ ຈີນ, ໂດຍແມ່ນ ບໍລິສັດ ຊີໂນ ໄຮໂດຼ ພາວເວີ ເປັນຜູ້ຈັດຕັ້ງປະຕິບັດ. ສະເພາະເຂື່ອນນ້ຳອູ 1 ນີ້ເປັນການລົງທຶນໃນຮູບແບບສຳປະທານແລ້ວໂອນຄືນໃຫ້ລັດຖະບານລາວ ( BOT ) ຕາມແຜນຍຸດທະສາດ “ໜຶ່ງແລວ ໜຶ່ງເສັ້ນທາງ” ໃຫ້ເປັນຮູບປະທໍາ, ຄາດວ່າຮອດປີ 2020 ຈະເປີດການຜະລິດດ້ວຍເຄື່ອງຈັກທັງໝົດຕາມເປົ້າໝາຍ ໂດຍຈະດຳເນີນທຸລະກິດເປັນເວລາ 29 ປີແລ້ວໂອນຄືນໃຫ້ລັດຖະບານລາວ, ໄຟຟ້າທີ່ຜະລິດໄດ້ທັງໝົດຈະຈຳໜ່າຍໃຫ້ລັດວິສາຫະກິດໄຟຟ້າລາວ ເປັນການຊຸກຍູ້ຍົກລະດັບການເຊື່ອມໂຍງຂອງລະບົບຕາຂ່າຍໄຟຟ້າພາຍໃນພຶ້ນທີ່ລາວ, ພ້ອມທັງຊຸກຍູ້ຂະບວນການສົ່ງອອກໄຟຟ້າເພື່ອສ້າງລາຍຮັບ ແລະ ລວມລະບົບໄຟຟ້າຂອງພາກພຶ້ນໃຫ້ເປັນໜຶ່ງດຽວ.


ຂ່າວ: ບຸນຕຽງ ຈັນທະວົງ (ວທຍ ກະຈາຍສຽງແຫ່ງຊາດ)

loading...