ກອງປະຊຸມທຸລະກິດລາວ ຄັ້ງທີ 11 ໄດ້ປຶກສາຫາລື 3 ກຸ່ມເປົ້າໝາຍໃຫຍ່

0
18
loading...

ກອງປະຊຸມທຸລະກິດລາວ ຄັ້ງທີ 11 ຈັດຂຶ້ນ ໃນວັນທີ 5 ກໍລະກົດ 2018 ຢູ່ໂຮງແຮມດອນຈັນພາເລດ ນະຄອນຫລວງວຽງຈັນ ໂດຍເປັນກຽດເຂົ້າຮ່ວມ ຂອງ ທ່ານ ທອງລຸນ ສີສຸລິດ ນາຍົກລັດ ຖະມົນຕີ ພ້ອມດ້ວຍບັນດາລັດຖະມົນຕີ, ນັກທຸລະກິດ ຈາກພາຍໃນ ແລະຕ່າງປະເທດຈຳນວນຫລາຍ.


ກອງປະຊຸມໃນຄັ້ງນີ້ ຜູ້ເຂົ້າຮ່ວມໄດ້ປຶກສາຫາລືກ່ຽວກັບຄວາມຄືບໜ້າ ການແກ້ໄຂ ບັນຫາຂໍ້ຫຍຸ້ງຍາກຕ່າງໆ ທີ່ພາກທຸລະກິດປະສົບ ແລະ ແຜນການຂອງລັດຖະບານໃນການປັບປຸງສະພາບແວດລ້ວມ ການດຳເນີນທຸລະກິດໃນລາວ. ກອງປະຊຸມຍັງໄດ້ປຶກສາຫາລື 3 ກຸ່ມເປົ້າໝາຍໃຫຍ່ຄື: ກຸ່ມບັນຫາກ່ຽວກັບອາກອນສຳລັບທຸລະກິດ ປະກອບມີການສົ່ງເງິນຄືນ ອາກອນມູນຄ່າເພີ່ມ, ບັນຫາການຊົມໃຊ້ອິນເຕີເນັດ, ການອຳນວຍຄວາມສະດວກດ້ານການຄ້າ ແລະການຂົນສົ່ງ, ນອກຈາກນີ້ຍັງມີບັນຫາການນຳເຂົ້າສິນຄ້າ ແລະວັດຖຸດິບທີ່ໄດ້ຮັບຈາກການຍົກເວັ້ນພາສີ ອາກອນມູນຄ່າເພີ່ມພາຍໃຕ້ກົດໝາຍວ່າດ້ວຍການສົ່ງເສີມການລົງທຶນຈາກທີ່ມີຫລາຍຂັ້ນຫລາຍຂອດ ແລະໃຊ້ເວລາຫລາຍ, ກຸ່ມການນຳເຂົ້າສິນຄ້າຜ່ານດ່ານ ປະເພນີ ທີ່ມີລັກສະນະການຄ້າຜ່ານແດນ ລວມທັງອຸປະສັກຕໍ່ການພັດທະນາ ຂະແໜງການທ່ອງທ່ຽວ. ກອງປະຊຸມຄັ້ງນີ້ຍັງໄດ້ໃຫ້ພາກລັດທີ່ກ່ຽວຂ້ອງ ແລະຕາງໜ້າພາກທຸລະກິດ ຕົກລົງຮັບເອົາຫລາຍມາດຕະການເພື່ອເປັນແນວທາງສະເໜີຕໍ່ລັດຖະບານ ຊ່ວຍແກ້ໄຂບັນຫາຕ່າງໆທີ່ເກີດຂຶ້ນ.


ໂອກາດນີ້ ທ່ານ ທອງລຸນ ສີສຸລິດ ນາຍົກລັດຖະມົນຕີ ມີຄຳເຫັນໂອ້ລົມອັດກອງປະຊຸມ ເຊິ່ງທ່ານຍົກໃຫ້ເຫັນຜົນສຳເລັດຫຼາຍໆດ້ານທີ່ສຳຄັນ ຂອງລັດຖະບານໃນການຮັກສາສະເຖຍລະພາບທາງດ້ານເສດຖະກິດມະຫາພາກ, ການຫຼຸດຜ່ອນຄວາມທຸກຍາກ, ການລວມກຸ່ມທາງເສດຖະກິດ ແລະການປັບປຸງສະພາບແວດລ້ອມທຸລະກິດ ລວມທັງບັນຫາອື່ນໆຈຳນວນໜຶ່ງ.


ທ່ານ ທອງລຸນ ສີສຸລິດ ຍັງໄດ້ມີຄວາມເຫັນເນັ້ນໜັກຕື່ມອີກຫລາຍວຽກງານທີ່ສຳຄັນ ພ້ອມທັງຢັ້ງຢືນວ່າ: ລັດຖະບານໄດ້ໃຫ້ຄວາມສຳຄັນຕໍ່ພາກທຸລະກິດ ແລະພ້ອມຈະນຳເອົາບັນຫາຕ່າງໆທີ່ໄດ້ ຍົກຂຶ້ນມາໃນກອງປະຊຸມຄັ້ງນີ້ໄປພິຈາລະນາ ແລະແກ້ໄຂໄປຕາມຂັ້ນຕອນທີ່ກຳນົດໄວ້ ເພື່ອຮັບປະກັນ ປະສິດທິພາບໃນການກຳນົດ ແລະແກ້ໄຂບັນຫາທີ່ກ່ຽວຂ້ອງກັບການສ້າງຕັ້ງທຸລະກິດ ທີ່ໄດ້ຜ່ານການປຶກສາຫາລືໃນກອງປະຊຸມຄັ້ງນີ້ ໃຫ້ໄດ້ຮັບການຈັດຕັ້ງປະຕິບັດຢ່າງເປັນຮູບປະທຳໃນອະນາຄົດ.

ຂ່າວ: ວິທະຍຸ ກະຈາຍສຽງແຫ່ງຊາດ

loading...