ມເຊີຍ! ມະໂນ ໜູວັນນະສັກ ຄົນລາວຄົນທຳອິດ ຮັບຫນ້າທີ່ເປັນຜູ້ອຳນວຍການຝ່າຍພັດທະນາທຸລະກິດຂອງສະໂມສອນບານເຕະ ໂບຣຸສເຊຍດ໋ອດມຸນ ທິມຊັ້ນນຳໃນບຸນເດັສລີກ້າເຢຍລະມັນ

0
24

+ ເມື່ອບໍ່ດົນມານີ້ ໂບຣຸສເຊຍດ໋ອດມຸນ ສະໂມສອນບານເຕະຊື່ດັງໃນລີກສູງສຸດຂອງເຢຍລະມັນ ຫລື ຮູ້ກັນດີໃນຊື່: ບຸນເດັສລີກ້າ! ໄດ້ປະກາດແຕ່ງຕັ້ງ ມະໂນ ໜູວັນນະສັກ ອະດີດຜູ້ຊ່ວຍເລຂາທິການສະຫະພັນບານເຕະແຫ່ງຊາດລາວ ເປັນຜູ້ອຳນວຍການຝ່າຍພັດທະນາທຸລະກິດຂອງສະໂມສອນ ໂດຍມີເປົ້າຫມາຍພັດທະນາ, ຂະຫຍາຍທຸລະກິດຂອງສະໂມສອນໃຫ້ເຕີບໃຫຍ່ ແລະ ມີຊື່ສຽງໄປທົ່ວໂລກ.

+ ປະສົບການຜ່ານມາຂອງ ມະໂນ ໜູວັນນະສັກ ກ່ອນມາຮັບຫນ້າທີ່ດັ່ງກ່າວ, ເຄີຍເປັນຜູ້ອຳນວຍການຝ່າຍພັດທະນາສະໂມສອນສູ່ສາກົນປະຈຳຂົງເຂດອາຊີ ຂອງສະໂມສອນບານເຕະ ໂວຟບວກ ອີກຫນຶ່ງທິມຊັ້ນນຳໃນບຸນເດັສລີກ້າເຢຍລະມັນ ເມື່ອ 2 ປີຜ່ານມາ, ນອກຈາກນີ້ ມະໂນ ມີປະສົບການເຮັດວຽກກັບສະຫະພັນບານເຕະແຫ່ງຊາດລາວ 4 ປີ, ເຄີຍຮັບຫນ້າທີ່ເປັນຜູ້ຊ່ວຍເລຂາທິການສະຫະພັນບານເຕະແຫ່ງຊາດລາວ, ເປັນຫົວຫນ້າຝ່າຍການຕະຫລາດຢູ່ສະຫະພັນບານເຕະແຫ່ງຊາດລາວ, ເປັນຜູ້ບໍລິຫານການແຂ່ງຂັນເຕະບານລາວພຣີເມ໋ຍລີກ ແລະ ເຄີຍເປັນຜູ້ຈັດການດ້ານການອອກໃບອະນຸຍາດເປັນສະໂມສອນ (Club licensing) ຂອງສະຫະພັນບານເຕະອາຊີ ແລະ ການໂອນຍ້າຍນັກກິລາຂອງສະຫະພັນບານເຕະນາໆຊາດ ຫລື ຟີຟ້າ ໃນໄລຍະປີ 2013-2016.

+ ຫນ້າທີ່ໃຫມ່ຂອງ ມະໂນ ໜູວັນນະສັກ ກັບສະໂມສອນໂບຣຸສເຊຍດ໋ອດມຸນ ຈະເປັນອີກຫນຶ່ງຄວາມທ້າທາຍໃຫມ່ ໃນການວາງແຜນຍຸດທະສາດ, ຜັກດັນການເຕີບໂຕຂອງທຸລະກິດ, ຊຸກຍູ້ໃຫ້ເກີດແນວຄິດສ້າງສັນໃຫມ່ໆ ແລະ ເຊື່ອມໂຍງການຮ່ວມມືກັບສາກົນ. ມະໂນ ກ່າວວ່າ: ” ພູມໃຈທີ່ໄດ້ຮ່ວມງານກັບດ໋ອດມຸນ, ທິມທີ່ມີຊື່ສຽງ, ເປັນຄອບຄົວທີ່ມີສາຍສຳພັນຝັງເລິກກັບກິລາບານເຕະມາຍາວນານ, ມີຖານແຟນບານທີ່ໜາແໜ້ນ ເປັນຫົວໃຈສຳຄັນໃນການພັດທະນາທິມ, ມີປະຫວັດສາດທີ່ມະຫັດສະຈັນ, ແລະ ເຊື່ອວ່າຈະມີອານາຄົດທີ່ດີ. ຂ້ອຍພ້ອມຊ່ວຍຜັກດັນທິມໃຫ້ເຕີບໃຫຍ່ຂະຫຍາຍຕົວ, ຊຸກຍູ້ແນວຄິດສ້າງສັນໃຫມ່ໆ ແລະ ຜູກມິດການຮ່ວມມືກັບຜູ້ສະຫນັບສະຫນູນໃນອາຊີ ແລະ ຫວັງວ່າອີກບໍ່ດົນໃນປະເທດລາວຈະມີແຟນບານສວມເສື້ອດ໋ອດມຸນຫລາຍຂຶ້ນ. ມະໂນ ເນັ້ນຕື່ມວ່າ: ປະສົບການຜ່ານມາຂອງຕົນເອງກັບ ສະໂມສອນໂວຟບວກ ແລະ ຫຸ້ນສ່ວນຂອງທິມ ເປັນບົດຮຽນທີ່ດີໃນການບໍລິຫານຈັດການທິມດ້ວຍຄວາມເປັນມືອາຊີບໃຫ້ດີທີ່ສຸດ.

Photo: Mano El Nhou

ທີ່ມາ ຂ່າວກິລາ Lao National TV