ໂຮງຕ່ຳຫູກ ບ້ານຫູກ ຈອມມະນີ ໃຫຍ່ທີ່ສຸດໃນແຂວງວຽງຈັນ

    0
    28

         ເມື່ອທ້າຍອາທິດຜ່ານມາ ນັກຂ່າວສຳນັກຂ່າວສານປະເທດລາວ   ໄດ້ໄປສຳພາດ ທ່ານ ນາງ ປາ ລະມີ ວົງໄຊ  ເຈົ້າຂອງໂຮງຕໍ່າຫູກ ບ້ານຫູກ ຈອມມະນີ ຢູ່ບ້ານ ຫລັກ 52 ເມືອງໂພນໂຮງ ແຂວງວຽງຈັນ, ເຊິ່ງເປັນໂຮງຕ່ຳຫູກ ທີ່ໃຫຍ່ທີ່ສຸດໃນແຂວງວຽງຈັນ  ແລະ  ກຳລັງຈະເຂົ້າເປັນຜະລິດຕະພັນໂອດອບ  “ໜຶ່ງເມືອງໜຶ່ງຜະລິດຕະພັນ”,  ມີລວດລາຍເປັນເອກກະລັກຂອງຕົວເອງ  ແລະ ກຳລັງໄດ້ຮັບ ຄວາມນິຍົມ ຈາກສັງຄົມ.

         ທ່ານ ນາງ ປາລະມີ ວົງໄຊ ເຈົ້າຂອງໂຮງຕໍ່າຫູກ  ກ່າວວ່າ: ເມື່ອກ່ອນແມ່ນມີອາຊີບຄ້າຂາຍ ນັບແຕ່ປີ 2011  ເປັນຕົ້ນມາ ຈົນມາຮອດປີ 2015  ກໍ່ເລີຍຄິດຢາກຕໍ່າຫູກ ຍ້ອນຄວາມມັກຮັກໃນການນຸ່ງສິ້ນ  ແລະ ຊື້ສິ້ນຫລາຍ ຈຶ່ງໄດ້ລອງຕໍ່າສິ້ນເອງ,  ໃນເບື້ອງຕົ້ນແມ່ນໄດ້ເລີ່ມຈາກ 3 ກີ່  ແລະ ໄດ້ມີຄົນຮູ້ຈັກຮັກແພງ  ທີ່ມີປະສົບການດ້ານການຕໍ່າຫູກ  ມາຊ່ວຍໃຫ້ຄຳປຶກສາ ແລະ ວິທີການຕໍ່າຫູກ,  ຈາກນັ້ນ ກໍຄ່ອຍຮຽນຜິດຮຽນຖືກຢູ່ພໍສົມຄວນ   ຈົນສາມາດຕໍ່າເປັນຜືນສິ້ນສຳເລັດ   ແລ້ວນຳໄປຂາຍໃຫ້ກັບຄົນຮູ້ຈັກຮັກແພງກັນກ່ອນ. ຈາກນັ້ນ ຈຶ່ງໄດ້ຕັດສິນໃຈຂະຫຍາຍກີ່ຕໍ່າຫູກເພີ່ມຂຶ້ ນ 17 ກີ່ເປັນ 20 ກີ່ ແລະ ໄດ້ຄ່ອຍເພີ່ມຂຶ້ນ ຈາກ 20 ກີ່  ມາເປັນ 40 ກີ່, 60 ກີ່  ແລະ ປັດຈຸບັນ ມີກີ່ທັງຫມົດ 100 ກີ່,  ຖືໄດ້ວ່າໂຮງຕໍ່າຫູກ ທີ່ໃຫຍ່ທີ່ສຸດ ໃນແຂວງວຽງຈັນກໍ່ວ່າໄດ້  ແລະ ກຳລັງຍື່ນເອກກະສານ ເພື່ອເຂົ້າເປັນສີນຄ້າໂອດອບ.  ນອກຈາກນີ້,ໂຮງຕໍ່າຫູກ ບ້ານຫູກ ຈອມມະນີ   ຍັງມີຮ້ານຈຳໜ່າຍ ຢູ່ບ້ານສີສະຫວາດ  ເມືອງຈັນທະບູລີ ນະຄອນ ຫລວງວຽງຈັນ  ແລະ ຍັງມີກີ່ໄວ້ຕໍ່າຫູກອີກ 20 ກີ່,  ມີສາຂາຈຳໜ່າຍ ຢູ່ ແຂວງ ຫລວງພະບາງ,  ຊຽງຂວາງ, ປາກເຊ ແລະ ແຂວງສາລະວັນ.  ທັງນີ້, ກໍ່ເພື່ອອຳນວຍຄວາມສະດວກໃຫ້ແກ່ລູກຄ້າ  ທີ່ສົນໃຈຢາກໄດ້ສິ້ນງາມໆຈາກໂຮງຕໍ່າຫູກ  ຂອງພວກເຮົາ.

         ສຳລັບລວດລາຍຕ່າງໆ   ທີ່ນຳອອກຈຳໜ່າຍທີ່ມີຫລາຍຮູບຫລາຍແບບ,  ມີຄວາມສວຍງາມ ແລະ ຄວາມປານີດຢູ່ໃນສິ້ນແຕ່ລະພື້ນ  ແມ່ນຂ້າພະເຈົ້າ ເປັນຄົນປະດິດຄິດແຕ້ມຂຶ້ນມາເອງ ໂດຍການ ນຳເອົາຮູບແບບຕົວຈິງ  ທີ່ຂ້າພະເຈົ້າໄດ້ໄປທ່ອງທ່ຽວ ແລະ ໄດ້ພົບເຫັນ  ບໍ່ວ່າຈະເປັນລາຍດອກໄມ້ສະນິດຕ່າງໆ  ແລະ ສະຖານທີ່ທ່ອງທ່ຽວຕ່າງໆທີ່ໄດ້ພົບເຫັນ ກໍ່ຈະນຳມາອອກແບບແລ້ວຕໍ່າລົງ ໃນຜືນສິ້ນ ແຕ່ລະຜືນ ເຮັດໃຫ້ລວາດລາຍຕ່າງໆ ຕຳອອກຈາກໂຮງຕຳຫູກ ຂອງຂ້າພະເຈົ້າ  ມີເອກກະລັກເປັນຂອງຕົນເອງ.  ສຳລັບລາຄາສິ້ນເລີ່ມຕົ້ນແມ່ນມີແຕ່  800.000 – 25.000.000 ກີບ (ສິ້ນທີ່ຕໍ່າດ້ວຍໄໝຄຳ ນຳເຂົ້າຈາກຕ່າງປະເທດ).

         ທ່ານ ນາງ ປາລະມີ ວົງໄຊ ໄດ້ໃຫ້ຮູ້ຕື່ມວ່າ:  ປັດຈຸບັນໂຮງຕໍ່າຫູກ ບ້ານຫູກ ຈອມມະນີ  ສາມາສ້າງວຽກເຮັດງານທຳ  ແລະ ມີລາຍໄດ້ທີ່ໝັ້ນຄົງໃຫ້ແກ່ປະຊາຊົນ  ບ້ານຫລັກ 52 ປະມານ 110 ຄົນ  ແລະ ອີກ 20 ຄົນ  ຢູ່ຮ້ານຈຳໜ່າຍ ບ້ານສີສະຫວາດ,  ເຊິ່ງແຕ່ລະເດືອນ  ພວກເຂົາຈະໄດ້ຮັບເງິນເດືອນເລີ່ມຕົ້ນປະມານ  1.200.000 ກີບ ແລະ ສູງສຸດ 2.500.000 ກີບຕໍ່ຄົນຕໍ່ເດືອນ.  ທັງນີ້, ກໍຂຶ້ນກັບສີມື ການຕໍ່າສິ້ນທີ່ມີລວດລາຍ,  ຄວາມຍາກງ່າຍແຕກຕ່າງກັນໄປ,  ພ້ອມນີ້, ພະນັກງານໂຮງຕໍ່າຫູກ ແມ່ນມີສະຫວັດດີການ-ສັງຄົມ ຖືກຕ້ອງຕາມກະຊວງແຮງງານ ວາງອອກ. ພ້ອມນີ້,  ຂໍເຖິງປະຊາຊົນລາວ ໂດຍສະເພາະແມ່ຍິງລາວ ຈົ່ງຊ່ວຍກັນຮັກສາ  ແລະ ອະນຸລັກການຕໍ່າຫູກ, ນຸ່ງສິ້ນ,  ບ່ຽງແພທີ່ເປັນເອກກະລັກ,  ເປັນວັດທະນະທຳ ທີ່ບົ່ງບອກເຖິງຄວາມເປັນຄົນລາວ  ໄວ້ໃຫ້ລູກຫລານຮຸ້ນຫລັງໄດ້ສືບຕໍ່ໆໄປ ເພື່ອບໍ່ໃຫ້ວັດທະນະທຳດັ່ງກ່າວ ສູນຫາຍໄປຈາກສັງຄົມລາວ.

     ຂ່າວ: ສຸກສະຫວັດ

    ເນື້ອໃນ: ຂປລ

    ຂໍຂອບໃຈ ຂ່າວສານປະເທດລາວ