“ໂຣນັນໂດ້” ພາທີມຄວ້າໄຊ ເສືອນຊະນະ ໂມຣ໊ອກໂກ 1 – 0

0
27

ເສິກບານໂລກ 2018 ກຸ່ມບີ ທີ່ສະໜາມລຸຊນິກິ ສະເຕດ້ຽມ ນະຄອນມອສໂກ ປະເທດຣັດເຊຍ ເມື່ອວັນພຸດທີ່ຜ່ານມາ ທີມຊາດໂປຕຸເກດ ລົງສະໜາມດວນ ໂມຣ໊ອກໂກ ໂດຍເຄິ່ງທຳອິດເປັນທີມໂປຕຸເກດທີ່ເຮັດເກມລຸກໄດ້ດຸດັນກວ່າ ແລະ ນຳອອກໄປກ່ອນ 1 – 0 ຈາກການໂມ່ງຂອງ ຄຣີສເຕຍໂນ່ ໂຣນັນໂດ້ ດາວຍິງໂຕເກ໋ງ ໃນນາທີທີ່ 4 ແລະ ເຮັດໃຫ້ເຂົາກາຍເປັນນັກເຕະຢູໂຣບທີ່ຍິງປະຕູໃນເກມລະດັບຊາດໄດ້ຫຼາຍທີ່ສຸດ 85 ປະຕູເໜືອກວ່າ ເຟເລນ ປຸສກັສ ຕຳນານນັກເຕະຊາວຮັງກາຣີີທີ່ເຮັດເອົາໄວ້ 84 ປະຕູດ້ວຍກັນ

ເຄິ່ງຫຼັງກາຍເປັນໂມຣ໊ອກໂກ ທີ່ຄອງບານບຸກແບບພັບສະໜາມ ແຕ່ແລ້ວກໍ່ທວງປະຕູຕີສະເໝີບໍ່ໄດ້ ຈົບເກມ ໂປຕຸເກດ ເສືອນ ໂມຣ໊ອກໂກ ວຸດວິດ 1 – 0 ເກັບເພີ່ມເປັນ 4 ຄະແນນຈາກ 2 ນັດ ສ່ວນ ໂມຣ໊ອກໂກ ຍັງບໍ່ມີຄະແນນຕົກຮອບແນ່ນອນແລ້ວ