ນະຄອນຫຼວງ ມີນັກຮຽນສອບເສັງຈົບຊັ້ນ ມ 7 ເກືອບ 11 ພັນຄົນ

    0
    12
    loading...

    ການ​ສອບເສັງ​ມັດທະຍົມ​ສຶກ​ສາ​ຊັ້ນ ມ7 ໄດ້​ຈັດ​ຂຶ້ນ​ທົ່ວ​ປະເທດ​ໃນ​ວັນ​ທີ 19-20 ມິຖຸນາ 2018 ແລະ ຄາດ​ວ່າການ​ປະກາດ​ຜົນ​ການ​ສອບເສັງ​ຈະ​ມີ​ຂຶ້ນ​ອາທິດ​ທີ 2 ຂອງ​ເດືອນ​ກໍລະກົດ 2018 ແລະ ສອບເສັງ​ເຂົ້າ​ມະຫາວິທະຍາໄລ​ແຫ່ງ​ຊາດ ໃນ​ຕົ້ນ​ເດືອນ​ສິງຫາ 2018 ເຊິ່ງ​ການ​ສອບເສັງ​ຄັ້ງ​ນີ້​ ນັກຮຽນ​ແຕ່ລະຄົນ​ກໍ່​ໄດ້​ຕັ້ງໃຈ​ສອບເສັງ​ເອົາ​ຄະແນນ​ດີ​ໄວ້​ກ່ອນ ​ຫຼັງ​ຈາກ​ທີ່​ກະກຽມ​ບົດຮຽນ​ມາ​ເປັນ​ເວລາ​ຫຼາຍ​ເດືອນ.

     

    ວັນ​ທີ 19 ມິຖຸນາ 2018 ທ່ານ ສີ​ຫຸນ ສິດທິ​ລື​ໄຊ ຮອງ​ເຈົ້າ​ຄອງ​ນະຄອນຫຼວງ​ວຽງ​ຈັນ ໄດ້​ລົງ​ພົບປະ​ໂອ້​ລົມ​ຄະນະ​ສູນ​ສອບເສັງ ແລະ ຄະນະ​ກຳມະການ​ຍາມ​ຫ້ອງ​ສອບເສັງ​ຢູ່​ສູນ​ໂຮງຮຽນ ​ມສ ວຽງ​ຈັນ ມີ​ທ່ານ​ຮອງ​ຫົວໜ້າ​ພະ​ແນກ​ສຶກ​ສາ​ທິ​ການ ແລະ ກີລາ ນະຄອນຫຼວງ​ວຽງ​ຈັນ ພ້ອມ​ດ້ວຍ​ຄະນະ​ອຳນວຍ​ການ ແລະ ພະນັກງານ​ຄູ-ອາຈານ​ໂຮງຮຽນ ​ມສ ວຽງ​ຈັນ ແລະ ຄະນະ​ກຳມະການ​ຍາມ​ຫ້ອງ​ສອບເສັງ​ໃຫ້​ກຽດ​ຕ້ອນຮັບ.

     

    ໂອກາດ​ນີ້ ທ່ານ​ນາງ ວຽງ​ສຸວັນ ພະ​ໄຊ​ສົມບັດ ຜູ້ອຳນວຍການ​ໂຮງຮຽນ ​ມສ ວຽງ​ຈັນ ທັງ​ເປັນ​ປະທານ​ສູນ​ສອບເສັງ​ໂຮງຮຽນ ​ມສ ວຽງ​ຈັນ ໄດ້​ຂຶ້ນ​ລາຍ​ງານ​ການ​ກະກຽມ​ຄວາມ​ພ້ອມ​ຂອງ​ຄະນະ​ກຳມະການສອບເສັງ ເຊິ່ງ​ເຫັນ​ວ່າ​ທົ່ວ​ນະຄອນຫຼວງ​ວຽງ​ຈັນ​ມີ​ນັກຮຽນ​ສອບເສັງ​ທັງ​ໝົດ 10.662 ຄົນ ສະເພາະສູນ​ໂຮງຮຽນ ​ມສ ວຽງ​ຈັນ ເປັນ​ສູນ​ໃຫຍ່​ມີ 78 ຫ້ອງ​ສອບເສັງ ມີ​ນັກຮຽນ​ສອບເສັງ​ທັງ​ໝົດ 1.561 ຄົນ ຍິງ 852 ຄົນ ໃນ​ນັ້ນ ມີ​ນັກຮຽນ​ສອບເສັງ​ພິເສດ 6 ຄົນ (ພິການ​ຕາ) ຈາກ​ໂຮງຮຽນ ​ມສ ເພຍ​ວັດ ມີ​ຄະນະ​ກຳມະການ​ຍາມ​ຫ້ອງ​ສອບເສັງ 456 ຄົນ ຍິງ 287 ຄົນ ມາ​ຈາກ 9 ໂຮງຮຽນ​ທັງ​ພາກ​ລັດ ແລະ ເອກະ​ຊົນ ຄື: ​ມປ ຈັນທະ​ບູ​ລີ ​ມສ ໂພນ​ທັນ ​ມສ ສາທິດ ສີ​ຖານ​ເໜືອ ໂນນ​ຄໍ້ ຈອມ​ເພັດ ສີ​ສັດຕະ​ນາກ ໜອງ​ບອນ ພັນ​ໝັ້ນ ລາວ-ຫວຽດ ທົ່ງ​ປົ່ງ ແລະ ບໍ່​ນາ​ງົວ ເຊິ່ງ​ການ​ສອບເສັງ​ຫ້ອງ​ໜຶ່ງ​ບັນຈຸ​ນັກ​ສອບເສັງ 20 ຄົນ ແລະ ເສັງ​ວັນ​ລະ 2 ວິຊາ ກ່ອນ​ການ​ສອບເສັງ​ຄະນະ​ກຳມະການ​ທຸກ​ພາກສ່ວນ ​ກໍ່​ໄດ້​ຮັບ​ການເຝິກອົບຮົມ​ແນະນຳ​ພາລະ​ບົດບາດ​ໜ້າທີ່​ຂອງ​ຕົນ​ຢ່າງ​ລະອຽດ ​ເພື່ອ​ຮັບປະກັນ​ການ​ສອບເສັງ 100%.

     

    ໂອກາດ​ນີ້​ ທ່ານ​ຮອງ​ເຈົ້າ​ຄອງ ນວ ໄດ້​ສະແດງ​ຄວາມ​ຊົມເຊີຍ​ຕໍ່​ຄວາມ​ເອົາໃຈໃສ່ ​ໃນ​ການ​ກະກຽມ​ທຸກດ້ານ​ຂອງ​ຄະນະ​ສູນ​ສອບເສັງ ແລະ ຄະນະ​ກຳມະການ​ຍາມ​ຫ້ອງ​ເສັງ ໃນ​ໄລຍະ​ຜ່າມ​ມາ ​ເຮັດ​ໃຫ້ການ​ສອບເສັງ​ດຳເນີນ​ໄປ​ດ້ວຍ​ດີ ຮັບປະກັນ​ຄວາມ​ຜິດພາດ ແລະ ເປັນ​ລະບຽບ​ຮຽບ​ຮ້ອຍ​ດີ ພ້ອມ​ນັ້ນ ທ່ານ​ຍັງ​ໄດ້​ເນັ້ນ​ໃຫ້​ຄະນະ​ກຳມະການ​ຍາມ​ຫ້ອງ​ເສັງ​ເອົາໃຈໃສ່​ຄວາມ​ຮັບຜິດຊອບ​ຂອງ​ຕົນ​ເປັນ​ຢ່າງ​ສູງ ໂດຍ​ສະເພາະແມ່ນ​ປະຕິບັດ​ລະບຽບ​ຂອງ​ຄະນະ​ກຳມະການ​ສອບເສັງ​ວາງ​ໄວ້ ແລະ ເຮັດ​ໃຫ້​ບັ້ນ​ສອບເສັງ​ຊັ້ນ ມ7 ສົກຮຽນ 2017-2018 ດຳເນີນ​ໄປ​ດ້ວຍ​ຜົນສຳເລັດ​ອັນ​ຈົບງາມ ຈາກ​ນັ້ນ ທ່ານ​ຮອງ​ເຈົ້າ​ຄອງ ນວ ພ້ອມ​ຄະນະ ຍັງ​ໄດ້​ໄປ​ເປີດ​ຊອງ​ຫົວ​ບົດ​ສອບເສັງ ແລະ ຢ້ຽມ​ຊົມ​ໃຫ້​ກຳລັງ​ໃຈ​ແກ່​ນັກ​ສອບເສັງ​ແຕ່​ລະ​ຫ້ອງ​ພາຍ​ໃນສູນ​ສອບເສັງ​ໂຮງຮຽນ ​ມສ ວຽງ​ຈັນ ຕື່ມ​ອີກ.

     

    ຂໍຂອບໃຈ ນສພ: ວຽງຈັນໃໝ່.

    loading...