ຍີ່ປຸ່ນເສືອນຊະນະໂຄໂລມເບຍ 2 – 1 …ເກັບ 3 ແຕ້ມໄປຄອງ

    0
    22

    ເສິກບານໂລກ 2018 ຮອບແບ່ງກຸ່ມຮອບທຳອິດ ນັດທຳອິດ ກຸ່ມ H ເມື່ອວັນທີ່ 19 ມິຖຸນາ ທີ່ສະໜາມອໍດາເວຍ ອາລີນ່າ ເມືອງຊາຣານ ປະເທດຣັດເຊຍ “ຊາມູໄລບລູ” ທີມຊາດຍີປຸ່ນ ໂຕແທນຈາກເອເຊຍ ດວນແຂ້ງກັບໂຄໂລມເບຍ ໂຕແທນຈາກອາເມລິກາໃຕ້ ໂດຍເກມນີ້ຍີປຸ່ນ ສົ່ງ ເອອິຈິ ຄາວາຊິມະ ໄວ 35 ປີ 91 ວັນ ລົງເຜົ້າປະຕູ ເຮັດໃຫ້ເຂົາເປັນນັກເຕະຍີປຸ່ນທີ່ອາຍຸຫລາຍສຸດທີ່ລົງຫຼີ້ນໃນບານໂລກ ຜົນການແຂ່ງຂັນປາກົດວ່າ ຍີ່ປຸ່ນເສືອນຊະນະ ໂຄໂລມເບຍ ວຸດວິດ 2 – 1


    ໂດຍໂຄໂລມເບຍ ຍັງເຫຼືອຜູ້ຫຼີ້ນພຽງແຕ່ 10 ຄົນຕັ້ງແຕ່ນາທີທີ່ 3 ເມື່ອ ຄາຣລອສ ຊານເຊດ ເຮັດມືຖືກບານຈົນທີມຕ້ອງເສຍຈຸດໂທດ ສ່ວນໂຕເຂົາຖືກໃບແດງໄລ່ອອກໄປດ້ວຍ ຖືເປັນໃບແດງທຳອິດຂອງບານໂລກຄັ້ງນີ້ ແລະ ເປັນໃບແດງໄວສຸດອັນດັບສອງ ໃນປະຫວັດສາດ ເວີດຄັບ ທີ່ເວລສ 2 ນາທີ 56 ວິນາທີ ເປັນຮອງແຕ່ໃບແດງຂອງ ໂຮເຊ ອັລແບໂຕ ບາຕີສຕາ ຂອງອຸຣຸກໄກວ ທີ່ຖືກໄລ່ອອກຫຼັງຜ່ານໄປໄດ້ແຕ່ 54 ວິນາທີເປັນບານໂລກ 1986 ແມ໊ດ ອຸຣຸກໄກວ ສະກ໋ອດແລນ


    ດ້ານ ຊິນຈິ ຄາງາວະ ຮັບໜ້າທີ່ສັງຫານຈຸດໂທດໃຫ້ຍີ່ປຸ່ນ ບໍ່ພາດຂື້ນນຳໄປກ່ອນ 1-0 ໃນນາທີທີ່ 6 ສ່ວນໂຄໂລມເບຍ ຕີສະເໝີຈາກລູກຟຣີຄິກຂອງ ຮວນ ຄວິນເຕໂລ ນາທີທີ່ 39 ເຄິ່ງຫຼັງ ຍີ່ປຸ່ນຂື້ນມານຳອີກຄັ້ງ 2 – 1 ຈາກລູກເຕະມຸມຂອງ ເຄຊຸກະ ຮອນດະ ໂຍນມາໃຫ້ ຢູຢະ ໂອຊາໂກະ ໂມ່ງເຂົ້າເຂົ້າໄປໃນນາທີທີ່ 73 ເຮັດໃຫ້ ຮອນດະ ເປັນແຂ້ງເອເຊຍຄົນທຳອິດທີ່ເຮັດແອສຊີສ ໄດ້ໃນບານໂລກ 3 ສະໄໝ ຈົບເກມ ຍີປຸ່ນ ເສືອນຊະນະໂຄໂລມເບຍ 2 – 1 ເກັບ 3 ແຕ້ມປະເດີມໄດ້ສຳເລັດ.