ເສດຖະກິດລາວ ຍັງຂະຫຍາຍຕົວສູງທຽບໃສ່ກັບປະເທດອື່ນ

0
39

ບົດ​ລາຍ​ງານ​ສະພາບ​ເສດຖະກິດ​ສຳລັບ ​ສປປ ລາວ ຂອງ​ທະນາຄານ​ໂລກ ຢືນຢັນ​ອັດຕາ​ການ​ເຕີບ​ໂຕ​ເສດຖະກິດ​ຂອງ​ລາວ ປີ 2018 ຄາດ​ວ່າ​ຈະ​ຢູ່​ໃນ​ລະດັບ 6,7% ເຊິ່ງ​ຍັງ​ຂະຫຍາຍຕົວ​ສູງ​ທຽບ​ກັບ​ປະເທດ​ອື່ນໆ​ໃນ​ພາກ​ພື້ນ​ ແຕ່​ຈະ​ຂະຫຍາຍຕົວ​ໃນ​ຈັງຫວະ​ຊ້າ​ລົງ​ທຽບ​ກັບ​ອັດຕາ​ການ​ເຕີບ​ໂຕ​ໃນ​ໄລຍະ​ຜ່ານ​ມາ ໂດຍ​ຂະແໜງການ​ທີ່​ໃຊ້​ແຮງ​ງານ​ຫຼາຍ ເປັນຕົ້ນ​ຂະແໜງການ​ຜະລິດ ແລະ ຂະແໜງ​ທ່ອງ​ທ່ຽວ ຈະ​ໄດ້​ຮັບ​ການ​ປັບປຸງ​ດີ​ຂຶ້ນ ແລະ ຈະ​ສ້າງ​ວຽກ​ເຮັດ​ງານ​ທຳ ພ້ອມ​ທັງ​ປະກອບສ່ວນ​ໃນ​ການ​ຫຼຸດຜ່ອນ​ຄວາມທຸກ​ຍາກ ຂະແໜງ​ພະລັງງານ ແລະ ການ​ຜະລິດ​ຈະ​ສືບຕໍ່​ສົ່ງ​ອອກ​ຢ່າງ​ເຂັ້ມແຂງ ການ​ຄຸ້ມ​ຄອງ​ເສດຖະກິດ​ມະຫາ​ພາກ​ຈະ​ໄດ້​ຮັບ​ການ​ປັບປຸງ​ດີ​ຂຶ້ນ ການ​ເກັບ​ລາຍ​ຮັບ​ກໍ່​ຈະ​ເພີ່ມ​ຂຶ້ນ ພ້ອມ​ທັງ​ມີ​ການ​ຄວບ​ຄຸມ​ລາຍ​ຈ່າຍ ແລະ ແກ້​ໄຂ​ໜີ້​ທີ່​ຍັງ​ຄົງ​ຄ້າງ ສ່ວນ​ອັດຕາ​ເງິນ​ເຟີ້​ຈະ​ຢູ່​ໃນ​ລະດັບ 2%.

 

ທ່ານ​ນາງ ວຽງ​ສະໄໝ ສຣິດ​ທິ​ຣາດ ຮັກສາ​ການ​ຫົວໜ້າຫ້ອງການ​ທະນາຄານ​ໂລກ​ປະຈຳ​ລາວ ກ່າວ​ໃນ​ພິທີ​ເຜີຍແຜ່​ບົດ​ລາຍ​ງານ​ສະພາບ​ເສດຖະກິດ​ສຳລັບ​ລາວ ໃນ​ວັນ​ທີ 15 ມິຖຸນາ 2018 ວ່າ: ​ສປປ ລາວ ມີ​ການ​ເຕີບ​ໂຕ​ເຂັ້ມແຂງ​ຕະຫຼອດ​ໄລຍະ 10 ປີຜ່ານມາ ເຊິ່ງ​ສາມາດ​ປະກອບສ່ວນ​ເຂົ້າ​ໃນ​ການ​ປັບປຸງ​ຊີວິດ​ການ​ເປັນ​ຢູ່ ແລະ ການ​ບໍລິການ​ຕ່າງໆ​ໃຫ້​ປະຊາຊົນ​ລາວ ພ້ອມ​ນີ້ ການ​ປັບປຸງ​ສະພາບ​ແວດ​ລ້ອມທຸລະ​ກິດ ​ກໍ່​ຈະ​ຊ່ວຍ​ເຮັດ​ໃຫ້​ເສດຖະກິດ​ຂະຫຍາຍຕົວ​ໄດ້ ໂດຍ​ບໍ່​ຕ້ອງ​ເອື່ອຍ​ອີງໃສ່​ຂະແໜງ​ຊັບພະຍາກອນ​ທຳ​ມະ​ຊາດ​ຫຼາຍ​ເກີນ​ໄປ ເຊິ່ງ​ຈະ​ສົ່ງ​ຜົນ​ໃຫ້​ມີ​ການ​ສ້າງ​ວຽກ​ເຮັດ​ງານ​ທຳ​ຫຼາຍ​ຂຶ້ນ ໂອກາດ​ການ​ຂະຫຍາຍຕົວ​ຂອງ​ຂະແໜງ​ກະສິກຳ ການ​ປຸງ​ແຕ່ງ​ຜົນ​ຜະລິດ​ກະສິກຳ ການ​ທ່ອງທ່ຽວ ການ​ຄ້າ ແລະ ການ​ຜະລິດ ຈະ​ເປັນ​ທ່າແຮງ​ໃນ​ການ​ຫຼຸດຜ່ອນ​ຄວາມທຸກ​ຍາກ​ລົງ​ຕື່ມ​ອີກ.

 

ສຳລັບ​ຄວາມ​ສ່ຽງ​ດ້ານ​ໜີ້​ສິນ​ພາກ​ລັດ​ຍັງ​ຢູ່​ລະດັບ​ສູງ ເຊິ່ງ​ກວມ​ປະມານ 61% ຂອງ​ລວມ​ຍອດ​ຜະລິດ​ຕະ​ພັນ​ພາຍ​ໃນ (GDP) ແລະ ອັດຕາ​ສ່ວນ​ການ​ກູ້​ຢືມ​ທີ່​ມີ​ເງື່ອນໄຂ​ຜ່ອນຜັນ​ໜ້ອຍ​ກໍ່​ເພີ່ມ​ຂຶ້ນ ບາງ​ພາກສ່ວນ​ຂອງ​ຂະແໜງການ​ເງິນ​ຍັງ​ມີ​ຄວາມ​ອ່ອນແອ ແລະ ຕ້ອງ​ໄດ້​ມີ​ການ​ສະ​ສົມ​ຄັງ​ສຳຮອງ​ເງິນຕາ​ຕ່າງປະເທດ​ໃຫ້​ຫຼາຍ​ຂຶ້ນ​ກວ່າ​ເກົ່າ ເຊິ່ງ​ການ​ຫຼຸດຜ່ອນ​ຄວາມ​ສ່ຽງ​ເຫຼົ່າ​ນີ້ ​ຈະ​ຕ້ອງ​ໄດ້​ມີ​ຄວາມ​ເດັດຂາດ​ໃນ​ການ​ປະຕິບັດ​ບາດກ້າວ​ທີ່​ຕິດ​ພັນ​ກັບ​ວິໄນ​ການ​ເງິນ ເປັນຕົ້ນ ຄວນ​ມີ​ການ​ພິຈາລະນາ​ຄືນໃໝ່​ກ່ຽວ​ກັບ​ການ​ລົງທຶນ​ຂະໜາດ​ໃຫຍ່​ຂອງ​ລັດ ແລະ ເພີ່ມ​ປະ​ສິດທິ​ຜົນ​ທາງ​ດ້ານ​ລາຍ​ຈ່າຍ.

ຂ່າວ: ນສພ ວຽງຈັນໃຫ່ມ