ຈຳປາສັກ ຂະຫຍາຍພື້ນທີ່ວັງອານຸລັກປາຂ່າ ເປັນ 7 ເທົ່າ

0
9

ຄະນະນຳ, ອຳນາດການປົກຄອງ ແລະ ປະຊາຊົນ ແຂວງຈຳປາສັກ ໂດຍສະເພາະແມ່ນປະຊາຊົນບ້ານ ຫາງສະດຳ ແລະ ບ້ານ ຫາງຄອນ, ເມືອງໂຂງ ໄດ້ພ້ອມກັນເຫັນດີຂະຫຍາຍພື້ນທີ່ວັງອານຸລັກປາຂ່າ ອອກໄປຕື່ມຈາກ 21 ເຮັກຕາໃນເມື່ອກ່ອນ ມາເປັນ 150 ເຮັກຕາ ທັງນີ້, ກໍເພື່ອອານຸລັກ ແລະ ປົກປັກຮັກສາປາຂ່າ ເນື່ອງຈາກປາຂ່າ ເປັນສັດນ້ຳທີ່ຢູ່ໃນບັນຊີຫວງຫ້າມ ແລະ ໃກ້ຈະສູນພັນແລ້ວ.


ທ່ານ ບຸນເກີດ ຄຳພິທັກ ຫົວໜ້າໜ່ວຍງານການປະມົງຂັ້ນແຂວງ, ພະແນກກະສິກຳ ແລະ ປ່າໄມ້ ແຂວງຈຳປາສັກ ໄດ້ໃຫ້ສຳພາດໃນວັນທີ 12 ມິຖຸນາ 2018 ໂອກາດລົງຕິດຕາມໂຄງການຄຸ້ມຄອງ ແລະ ຊົມໃຊ້ປາ ແລະ ສັດນ້ຳອື່ນໆ ແບບຍືນຍົງ ຢູ່ເຂດສີພັນດອນໄລຍະ 2, ໂດຍກ່າວວ່າ: ການອານຸລັກ ແລະ ປົກປັກຮັກສາປາຂ່າ ແມ່ນວຽກງານໜຶ່ງທີ່ສຳຄັນທີ່ແຂວງ ກໍຄື ເມືອງໄດ້ເອົາໃຈໃສ່ມາເປັນເວລາດົນນານແລ້ວ. ນັບແຕ່ປີ 2009 ເປັນຕົ້ນມາ, ອົງການກອງທຶນອານຸຮັກທຳມະຊາດໂລກປະຈຳ ສປປ ລາວ ຫລື WWF-Laos ກໍໄດ້ສະໜັບສະໜູນທຶນ ແລະ ອຸປະກອນ ໂດຍຜ່ານກິດຈະກຳ ແລະ ໂຄງການຕ່າງໆ ເພື່ອນຳໃຊ້ເຂົ້າໃນການຄຸ້ມຄອງ, ອານຸລັກ ແລະ ປົກປັກຮັກສາປາຂ່າ ມາຈົນຮອດປັດຈຸບັນນີ້. ການປະກາດຂະຫຍາຍພື້ນທີ່ວັງສະຫງວນປາຂ່າ ໄດ້ຈັດຂຶ້ນຫວ່າງມໍ່ໆມານີ້ເພື່ອເຮັດໃຫ້ປາຂ່າ ມື້ພື້ນທີ່ຫາກິນກວ້າງຂຶ້ນ, ມີອາຫານຫລາຍກວ່າເກົ່າ, ຫລີກລ່ຽງການລົບກວນ ແລະ ປະຊາຊົນເອງ ກໍເຫັນໄດ້ເຖິງຄວາມສຳຄັນໃນການອານຸລັກ ເພາະເຂົາເຈົ້າສາມາດສ້າງລາຍຮັບ ຈາກການບໍລິການນັກທ່ອງທ່ຽວໄປທ່ຽວຊົມປາຂ່າ ຕາມລະດູການຕ່າງໆ.


ປັດຈຸບັນ, ອີງຕາມຜົນສຳຫລວດຂອງອົງການກອງທຶນອານຸລັກທຳມະຊາດໂລກປະຈຳ ສປປ ລາວ ແລະ ກຳປູເຈຍ, ຊຶ່ງໄດ້ຮ່ວມມືກັນສຳຫລວດປີໜຶ່ງສອງຄັ້ງ ຄື ເດືອນທັນວາ ແລະ ເດືອນ ພຶດສະພາ ເຫັນວ່າ ປາຂ່າ ຢູ່ໃນວັງອານຸລັກເຂດດິນແດນຂອງ ສປປ ລາວ ມີພຽງ 4 ໂຕ, ໃນຂະນະກຳປູເຈຍ ມີເຖິງ 90 ກວ່າໂຕ.
ທ່ານ ບຸນເກີດ ຄຳພິທັກ ຜູ້ຊຶ່ງເຮັດວຽກກ່ຽວກັບການຄຸ້ມຄ້ອງ, ອານຸລັກ ແລະ ປົກປັກຮັກສາວັງສະຫງວນປາຂ່າມາເກືອບ 10 ປີ ກ່າວວ່າ: ພວກເຮົາພົບເຫັນປາຂ່າຈຳນວນ 4 ໂຕນີ້ ມາເປັນເວ ລາ 3-4 ປີແລ້ວ, ຊຶ່ງບໍ່ເຫັນວ່າຊິມີທ່າທີຂະຫຍາຍຈໍານວນປະຊາກອນເພີ່ມຂຶ້ນເລີຍ ແລະ ກໍບໍ່ຫລຸດລົງຄືກັນ.

ການຂະຫຍາຍພັນຂອງປາຂ່າ ແມ່ນແຕກຕ່າງຈາກປາຊະນິດອື່ນໆ ເພາະວ່າອອກລູກເປັນໂຕ. ວັງອານຸລັກປາຂ່າ ຊຶ່ງກວມເອົາເນື້ອທີ່ຂອງສອງບ້ານ ຄື ບ້ານຫາງສະດຳ ແລະ ບ້ານ ຫາງຄອນ ແມ່ນຫ້າມໃຫ້ປະຊາຊົນຫາປາ ໃນບໍລິເວນດັ່ງກ່າວທຸກກໍລະນີ ຖ້າຫາກພົບເຫັນຜູ້ທີ່ຜ່າຝືນແມ່ນຈະຖືກປັບໃໝ ຫລື ລົງໂທດຕາມລະບຽບກົດໝາຍ. ປັດຈຸບັນ, ອຳນາດການປົກຄອງສອງບ້ານດັ່ງກ່າວ ໄດ້ແຕ່ງຕັ້ງໜ່ວຍກວດກາລາດຕະເວນ ຫລື ເຈົ້າໜ້າທີ່ປະມົງຂັ້ນບ້ານເພື່ອປົກປັກຮັກສາປາຂ່າ ແລະ ສະ ກັດກັ້ນຜູ້ທີ່ມາຫາປາໃນວັງອານຸລັກດັ່ງກ່າວ. ເຖິງຢ່າງໃດກໍຕາມ, ທ່ານ ບຸນເກີດ ຄຳພິທັກ ກໍໄດ້ຮຽກ ຮ້ອງມາຍັງທົ່ວສັງຄົມ ໂດຍສະເພາະປະຊາຊົນພາຍໃນແຂວງຈຳປາສັກ ຈົ່ງຮ່ວມໃຈກັນອານຸລັກ ແລະ ປົກປັກຮັກສາປາຂ່າ, ພ້ອມທັງຮຽກຮ້ອງມາຍັງນັກທ່ອງທ່ຽວ ທີ່ມາທ່ຽວຊົມເບິ່ງປາຂ່າ ຈົ່ງປະຕິບັດຕາມລະບຽບກົດໝາຍຢ່າງເຂັ້ມງວດ ໂດຍສະເພາະແມ່ນການຖີ້ມສິ່ງເສດເຫລືອຕ່າງໆ ລົງວັງປາຂ່າ ເພື່ອຫລີກລ່ຽງການທຳລາຍທີ່ຢູ່ອາໃສຂອງປາ ແລະ ລະບົບນິເວດທາງທຳມະຊາດ.


ສຳລັບນັກທ່ອງທ່ຽວທີ່ຕ້ອງການເບິ່ງປາຂ່າ ສາມາດໄປເບິ່ງໄດ້ທຸກລະດູ ແຕ່ລະດູທີ່ເໝາະສົມທີ່ສຸດ ແລະ ເຫັນໄດ້ຊັດເຈນແມ່ນລະດູແລ້ງ ໂດຍເລີ່ມແຕ່ເດືອນທັນວາ ຫາ ເດືອນ ພຶດສະພາ.
ຂ່າວ: ສິງຄຳ, ພາບ: WWF-Laos