ພັນທະມິດຊາອຸດິອາຣາເບຍ-ຮູຕິ ສູ້ຮົບດຸເດືອດຊິງເມືອງທ່າເຢເມນເສຍຊີວິດແລ້ວຢ່າງໜ້ອຍ 29 ຄົນ

0
12

ສຳນັກຂ່າວຕ່າງປະເທດລາຍງານຈາກນະຄອນອາບູດາບີປະເທດສະຫະລັດອາຣັບເອມິເຣດ (ຢູເອອີ) ເມື່ອວັນທີ່ 14 ມິຖຸນາວ່າກອງທັບຢູເອອີອອກຖະແຫຼງການເມື່ອວັນພຸດວ່າປະຕິບັດການທາງທະຫານຂອງກອງກຳລັງພັນທະມິດອາຣັບທີ່ມີຊາອຸດິອາຣາເບຍເປັນຫົວແກນນຳເພື່ອ “ປົດປ່ອຍ” ເມື່ອໂຮໄດດາຊື່ງເປັນເມືອງທ່າສຳຄັນທາງຕາເວັນຕົກຂອງເຢເມນຈາກການຢຶດຄອງຂອງກຸ່ມກະບົດຮູຕິນັ້ນ ເປີດສາກຂື້ນໃນມື້ວັນພຸດທີ່ຜ່ານມາໂດຍຝູງເຮືອບິນຮົບຂອງກອງກຳລັງພັນທະມິດຮ່ວມກັນໂຈມຕີທາງອາກາດຖະຫຼົ່ມເປົ້າໜາຍ 18 ແຫ່ງໃນເຂດຊານເມືອງໂຮໄດດາ ແລະມີການສູ້ຮົບພາກພື້ນດິນໃນເຂດທາງຕອນໃຕ້ຂອງເມືອງດ້ວຍ

ເບື້ອງຕົ້ນມີລາຍງານຜູ້ເສຍຊີວິດຢ່າງໜ້ອຍ 29 ຄົນແບ່ງເປັນນັກຮົບຮູຕິ 22 ຄົນ ນັກຮົບກອງກຳລັງຝ່າຍລັດຖະບານ 3 ຄົນ ແລະທະຫານຢູເອອີ 4 ຄົນ ແຕ່ລັດຖະບານຢູເອອີປະຕິເສດໃຫ້ຂໍ້ມູນວ່າທະຫານຂອງໂຕເອງເສຍຊີວິດຈາກການສູ້ຮົບບໍລິເວນໃດໃນເຢເມນ ທັງນີ້ ປະຕິບັດການດັ່ງກ່າວເກີດຂື້ນຫຼັງທ່ານອັນວາຣ ກາຣກາຊ ລັດຖະມົນຕີວ່າການກະຊວງການຕ່າງປະເທດຢູເອອີ ກ່າວວ່າທ່ານມາດກຣິຟຟິສ ທູດພິເສດດ້ານກິດຈະການເຢເມນຂອງສະຫະປະຊາຊາດ (ຢູເອັນ) ບໍ່ສາມາດປະຕິບັດຕາມ “ເສັ້ນຕາຍ 48 ຊົ່ວໂມງ” ໃນການ “ໂນ້ມນ້າວ” ໃຫ້ກອງກຳລັງຮູຕິຊື່ງຝັກໃຝ່ອີຣ່ານຖອນກຳລັງອອກຈາກເມືອງໂຣໄດດາ ແລະເສັ້ນຕາຍນັ້ນຄົບກຳນົດເມື່ອຄືນວັນອັງຄານຕາມເວລາທ້ອງຖິ່ນຂອງເຢເມນຂະນະທີ່ຖະແຫຼງການຂອງຢູເອັນຢືນຢັນວ່າ ກຣິຟຟິສຍັງຄົງພະຍາຍາມເຈລະຈາກັບທຸກຝ່າຍທີ່ກ່ຽວຂ້ອງ


ໃນເວລາດຽວກັນຊາອຸດິອາຣາເບຍ ແລະຢູເອອີອອກຖະແຫຼງການຮ່ວມກັນເປັນແຜນຍຸດທະສາດດ້ານມະນຸດຍະທຳ 5 ຂໍ້ເພື້ອຟື້ນຟູເມືອງໂຮໄດດາ ແລະພື້ນທີ່ໂດຍຮອບ ແລະການມອບຄວາມຊ່ວຍເຫຼືອແກ່ພົນລະເຮືອນຊື່ງລວມເຖິງການເປີດເສັ້ນທາງເດີນເຮືອຈາກນະຄອນອາບູດາບີເມືອງຫຼວງຂອງຢູເອອີ ແລະເມືອງຈີຊານ ທາງຕອນໃຕ້ຂອງຊາອຸດິອາຣາເບຍມາຍັງເມືອງໂຮໄດດາເພື່ອຂົນສົ່ງສິ່ງຂອງອຸປະໂພກ ຄວາມຊ່ວຍເຫຼືອທາງການແພດ ແລະການມອບຄວາມຊ່ວຍເຫຼືອດ້ານອື່ນໃນເຊີງເສດຖະກິດ


ເມືອງໂຮໄດດາຊື່ງຕັ້ງຢູ່ຕິດທະເລແດງຖືເປັນພື້ນທີ່ຍຸດທະສາດສຳຄັນໃນດ້ານການຂົນສົ່ງເນື່ອງຈາກເປັນທີ່ຕັ້ງຂອງທ່າເຮືອຂະໜາດໃຫ່ຍປະຈຸບັນມີການປະເມີນວ່າເມືອງໂຮໄດດາມີປະຊາກອນເຫຼືອຢູ່ປະມານ 600,000 ຄົນ ຈາກທີ່ເຄີຍສູງເຖິງ 2.6 ລ້ານຄົນໃນຊ່ວງກ່ອນສົງຄາມກາງເມືອງ ຊື່ງເລີ່ມຈາກການທີ່ກອງກຳລັງຮູຕິຍຶດນະຄອນຊານາເມື່ອເດືອນກັນຍາ 2015 ກ່ອນທີ່ຊາອຸດິອາຣາເບຍ ແລະພັນທະມິດຍົກທັບເຂົ້າມາເມື່ອເດືອນມີນາ 2016