ໂຄງການກໍ່ສ້າງທາງດ່ວນນະຄອນຫຼວງວຽງຈັນ-ວັງວຽງ ຢູ່ໃນຂັ້ນຕອນໄກ່ເກ່ຍ ແລະຊົດເຊີຍສິ່ງກີດຂວາງຕາມ ແລວກໍ່ສ້າງທາງດ່ວນ

0
29

ໂຄງການກໍ່ສ້າງທາງດ່ວນນະຄອນຫຼວງວຽງຈັນ-ວັງວຽງ ພາຍຫຼັງ ທີ່ໄດ້ສຳເລັດການອອກແບບ ແລະໄດ້ຮັບອະນຸມັດຈາກລັດຖະບານໃນການ ສຳປະທານສ້າງທາງດັ່ງກ່າວ ມາຮອດປະຈຸບັນໄດ້ມີຄວາມຄືບໜ້າໃນການຈັດຕັ້ງປະຕິບັດການທາບທາມຫົວໜ່ວຍ ລາຄາຊົດເຊີຍສິ່ງກີດຂວາງຕາມແລວທາງ ໂດຍທາງດັ່ງກ່າວຜ່ານທັງໝົດ 65 ບ້ານ 4 ເມືອງຂອງແຂວງວຽງຈັນ ແລະນະຄອນຫຼວງວຽງຈັນ.

ທ່ານ ບຸນຈັນ ສິນທະວົງ ລັດຖະມົນຕີ ກະຊວງໂຍທາທິການ ແລະຂົນສົ່ງ ໄດ້ລາຍງານຕໍ່ກອງປະຊຸມສະພາແຫ່ງຊາດວ່າ: ສຳລັບໂຄງການກໍ່ສ້າງທາງ ດ່ວນນະຄອນຫຼວງວຽງຈັນ-ວັງວຽງ ແມ່ນເປັນຊ່ວງທີ 1 ຂອງໂຄງການທາງດ່ວນນະຄອນຫຼວງວຽງຈັນ-ບໍ່ເຕນ ຊຶ່ງປະຈຸບັນໄດ້ສຳເລັດການອອກແບບ ແລະໄດ້ ຮັບອະນຸມັດຈາກລັດຖະບານ ມີການເຊັນ ສັນຍາສຳປະທານໃນເດືອນເມສາຜ່ານມາ, ໂດຍທາງດັ່ງກ່າວມີຄວາມຍາວ 109,12 ກິໂລແມັດ, ມູນຄ່າລົງທຶນ 1,3 ຕື້ໂດລາ, ການອອກແບບແມ່ນອີງ ຕາມມາດຕະຖານເຕັກນິກທາງດ່ວນຂອງ ສປ ຈີນ, ມີ 4 ຄອງລົດແລ່ນ, ອຸໂມງ 1 ແຫ່ງ ຍາວ 875 ແມັດ, ຂົວ 45 ແຫ່ງຄວາມຍາວ 2.408 ແມັດ, ຄວາມໄວ ອອກແບບ 100 ກິໂລແມັດຕໍ່ຊົ່ວໂມງ.

ປະຈຸບັນ ກຸ່ມບໍລິສັດກໍ່ສ້າງ-ລົງທຶນ ແລະຖືຮຸ້ນຈຳກັດ ແຂວງຢູນນານ ສປ ຈີນ ໄດ້ວ່າຈ້າງບໍລິສັດທີ່ປຶກສາສິ່ງແວດລ້ອມລາວຈຳກັດດຳເນີນການຈັດຕັ້ງປະຕິບັດວຽກງານຊົດເຊີຍສິ່ງກີດຂວາງໃຫ້ຜູ້ທີ່ຖືກຜົນກະທົບຕາມແລວກໍ່ສ້າງທາງດ່ວນຮ່ວມກັບອົງ ການປົກຄອງແຂວງວຽງຈັນ ແລະນະຄອນຫຼວງວຽງຈັນ ຊຶ່ງມີຄວາມຄືບໜ້າເປັນຕົ້ນໄດ້ລົງທາບທາມເອົາຫົວ ໜ່ວຍລາຄາຊົດເຊີຍສິ່ງກີດຂວາງຕາມ ແລວກໍ່ສ້າງທາງດ່ວນທີ່ຜ່ານແຕ່ລະບ້ານລວມທັງໝົດ 65 ບ້ານ, ມີ 4 ເມືອງ ໃນນັ້ນ ແຂວງວຽງຈັນ ກວມເອົາ 3 ເມືອງ 40 ບ້ານ ແລະນະຄອນຫຼວງ ວຽງຈັນ 1 ເມືອງ 25 ບ້ານ.

ນອກນັ້ນ ຍັງໄດ້ຄົ້ນຄວ້າກ່ຽວກັບ ລາຄາຫົວໜ່ວຍຕາມການທາບທາມ ຈາກປະຊາຊົນຜູ້ທີ່ຖືກຜົນກະທົບຮ່ວມ ກັບຄະນະກຳມະການໄກ່ເກ່ຍຂອງແຂວງ ແລະນະຄອນຫຼວງວຽງຈັນ, ໄດ້ຈັດກອງປະຊຸມຂັ້ນບ້ານກ່ຽວກັບການເຜີຍແຜ່ລາ ຄາຕາມການທາບທາມໃນປະເພດສິ່ງກີດ ຂວາງຕ່າງໆເປັນຕົ້ນທີ່ດິນ, ຜົນລະປູກ, ສິ່ງປຸກສ້າງ ແລະອື່ນໆ ໂດຍປະກອບມີຄະນະກຳມະການໄກ່ເກ່ຍຂັ້ນນະຄອນຫຼວງ ວຽງຈັນ, ຂັ້ນແຂວງ, ຂັ້ນເມືອງ, ຂັ້ນບ້ານ, ປະຊາຊົນຜູ້ທີ່ຖືກຜົນກະທົບຕົວຈິງ ໂດຍແມ່ນບໍລິສັດທີ່ປຶກສາສິ່ງແວດລ້ອມລາວຈຳກັດເປັນຜູ້ຮັບຜິດຊອບ ແລະເປັນເຈົ້າການຮ່ວມກັບອົງການປົກຄອງທ້ອງ ຖິ່ນແຂວງວຽງຈັນ ແລະນະຄອນຫຼວງ ວຽງຈັນ.

ປະຈຸບັນ ການເກັບກຳຂໍ້ມູນສິ່ງກີດ ຂວາງຕາມແລວກໍ່ສ້າງທາງດ່ວນນະຄອນຫຼວງວຽງຈັນ-ວັງວຽງ ໄດ້ແບ່ງເປັນ ສອງເຂດຄືນະຄອນຫຼວງວຽງຈັນ ແລະ ແຂວງວຽງຈັນ, ຊຶ່ງນະຄອນຫຼວງວຽງ ຈັນກຳລັງດຳເນີນການປັກຫຼັກໝາຍ ຂອບເຂດແລວທາງ ແລະກະກຽມລົງວັດ ແທກຕົວຈິງ, ສຳລັບຢູ່ຊ່ວງບ້ານນາຊອນ, ໜອງຄັນຄູ ແລະບ້ານອີ່ໄລໃຕ້ ແມ່ນປະຕິບັດການຊົດເຊີຍແລ້ວ ເນື່ອງຈາກເປັນ ເຂດທີ່ຕ້ອງດຳເນີນການກໍ່ສ້າງກ່ອນ.

ສ່ວນແຂວງວຽງຈັນ ໄດ້ລົງເກັບກຳຂໍ້ມູນສິ່ງກີດຂວາງເລີ່ມແຕ່ວັນທີ 5 ມີນາ 2018 ຮອດປະຈຸບັນ ໃນນັ້ນ ສາມາດເກັບກຳສິ່ງກີດຂວາງຕາມແລວທາງໄດ້ສຳເລັດແລ້ວ 2 ເມືອງຄື: ເມືອງວັງວຽງ ແລະໂພນໂຮງ, ສ່ວນເມືອງຫີນເຫີບແມ່ນສຳເລັດໄປແລ້ວສ່ວນໜຶ່ງ, ສະເພາະຢູ່ໃນເຂດຂົວຂ້າມນ້ຳລີກໄດ້ປະຕິບັດການຊົມ ເຊີຍແລ້ວ ເນື່ອງຈາກຕ້ອງການກໍ່ສ້າງ ຂົວຂ້າມນ້ຳລີກໃຫ້ສຳເລັດກ່ອນໂຄງການກໍ່ສ້າງເຂື່ອນໄຟຟ້າຈະອັດຕັນນ້ຳສູງຂຶ້ນ ຈະເຮັດໃຫ້ການກໍ່ສ້າງຂົວມີ ຄວາມຫຍຸ້ງຍາກ ແລະສິ້ນເປືອງຄ່າໃຊ້ ຈ່າຍສູງຂຶ້ນຕື່ມ.

ຂະນະທີ່ມີການເປີດເຜີຍຈາກລັດຖະບານໃນກ່ອນໜ້ານີ້ທີ່ກອງປະຊຸມດຽວ ກັນວ່າເສັ້ນທາງດັ່ງກ່າວຈະລົງມືກໍ່ສ້າງໂດຍທ້າຍປີ 2018 ນີ້.