ເກົາຫຼີເໜືອອ້າງທຣັມເຫັນພ້ອມຍົກເລີກຂວ້ຳບາດ

0
17

ສຳນັກຂ່າວຕ່າງປະເທດລາຍງານຈາກນະຄອນໂຊລປະເທດເກົາຫຼີໃຕ້ເມື່ອວັນທີ່ 13 ມິຖຸນາວ່າ ສຳນັກຂ່າວກາງເກົາຫຼີ (ເຄຊີເອັນເອ) ກະບອກສຽງຂອງລັດຖະບານປຽງຢາງລາຍງານເມື່ອວັນພຸດກ່ຽວກັບການຫາລືຄັ້ງປະຫວັດສາດລະຫວ່າງທ່ານຄິມ ຈອງ-ອຶນ ຜູ້ນຳສູງສຸດຂອງເກົາຫຼີເໜືອ ກັບປະທານາທິບໍດີໂດນັລ ທຣັມ ຜູ້ນຳອາເມລິກາທີ່ສິງກະໂປເມື່ອວັນທີ່ 12 ມິຖຸນາທີ່ຜ່ານມາ ວ່າທຣັມຕອບຮັບຄຳເຊີນຂອງທ່ານຄິມ ຈອງ-ອຶນ ໃນການຢ້ຽມຢາມນະຄອນປຽງຢາງຢ່າງເປັນທາງການ ໃນຂະນະທີ່ຜູ້ນຳສູງສຸດຂອງເກົາຫຼີເໜືອຕອບຮັບຄຳເຊີນຂອງອີກຝ່າຍໃນການຢ້ຽມຢາມນະຄອນວໍຊິງຕັນເຊັ່ນກັນ ແຕ່ຍັງບໍ່ມີການເປີດເຜີຍຊ່ວງເວລາທີ່ຊັດເຈນ

ຂະນະດຽວກັນລາຍງານຂອງເຄຊີເອັນເອຍັງລະບຸວ່າ “ເຈດຕະນາ” ຂອງຜູ້ນຳອາເມລິກາ ໃນການລະງັບປະຕິບັດການຊ້ອມຮົບຮ່ວມລະຫວ່າງອາເມລິກາກັບເກົາຫຼີໃຕ້ຊື່ງເປັນເລື່ອງທີ່ລັດຖະບານປຽງຢາງຢືນຢັນມາຕະຫຼອດວ່າຄື “ໄພຄຸກຄາມ” ນອກຈາກນີ້ ທຣັມຍັງກ່າວເຖິງການໃຫ້ຫຼັກປະກັນດ້ານຄວາມໜັ້ນຄົງ ແລະເສດຖະກິດແກ່ເກົາຫຼີເໜືອທີ່ລວມເຖີງການຍົກເລີກມາດຕະການຂວຳ້ບາດທາງເສດຖະກິດ ເພື່ອປູທາງສູ່ການປັບປຸງຄວາມສຳພັນໃນລະດັບທະວີພາຄີຜ່ານການເຈລະຈາຮ່ວມກັນໃນຄັ້ງຕໍ່ໄປ


ຢ່າງໃດກໍ່ຕາມ ທຣັມກ່າວໃນຊ່ວງໜື່ງຂອງການຖະແຫຼງຂ່າວທີ່ສິງກະໂປເມື່ອວັນອັງຄານທີ່ຜ່ານມາວ່າ ການຍົກເລີກມາດຕະການຂວຳ້ບາດຕໍ່ລັດຖະບານປຽງຢາງຈະເກີດຂື້ນເມື່ອກະບວນການປົດອາວຸດນິວເຄຼຍຂອງອີກຝ່າຍຢູ່ໃນລະດັບທີ່ “ສາມາດໄວ້ວາງໃຈໄດ້” ນອກຈາກນີ້ ເປັນທີ່ໜ້າສັງເກດດ້ວຍວ່າ ເນື້ອຫາໃນລາຍງານຂອງເຄຊີເອັນເອບໍ່ມີສ່ວນໃດລະບຸໂດຍກົງເຖິງ “ຂະບວນການປົດອາວຸດນິວເຄຼຍ” ບົງຊີ້ວ່າທ່ານຄິມ ຈອງ-ອຶນ “ບໍ່ໄດ້ຮັບແຮງກົດດັນ” ຈາກຜູ້ນຳອາເມລິກາໃນປະເດັນດັ່ງກ່າວ


ໃນອີກດ້ານໜື່ງທ່ານອິດສຶໂນຣິ ໂອໂນະເດຣະ ລັດຖະມົນຕີວ່າການກະຊວງປ້ອງກັນປະເທດຂອງຍີ່ປຸ່ນກ່າວເຖິງພາລະກິດຊ້ອມຮົບຮ່ວມປະຈຳປີລະຫວ່າງອາເມລິກາກັບເກົາຫຼີໃຕ້ວ່າ “ຈຳເປັນຢ່າງຍິ່ງ” ເພື່ອການຮັກສາສະຖຽນລະພາບ ແລະຄວາມໜັ້ນຄົງໃນລະດັບພູມມີພາກ ພ້ອມທັງຢືນຢັນວ່າຂໍ້ຕົກລົງຄວາມຮ່ວມມືດ້ານຄວາມໜັ້ນຄົງລະຫວ່າງລັດຖະບານໂຕກຽວກັບລັດຖະບານວໍຊິງຕັນ “ຍັງບໍ່ປ່ຽນແປງ”