ຫວຽດນາມຜ່ານກົດໜາຍຄວາມໜັ້ນຄົງໄຊເບີ

0
17

ສຳນັກຂ່າວຕ່າງປະເທດລາຍງານຈາກນະຄອນຮ່າໂນ້ຍປະເທດຫວຽດນາມເມື່ອວັນທີ່ 12 ມິຖຸນາວ່າ ສະມາຊິກພຽງແຕ່ 15 ຄົນຈາກທັງໜົດ 466 ຂອງລັດສະພາຫວຽດນາມໃນນະຄອນຮ່າໂນ້ຍ ລົງມະຕິຄັດຄ້ານຮ່າງກົດໜາຍຄວາມໜັ້ນຄົງໄຊເບີ ຊື່ງຈະເລີ່ມມີຜົນບັງຄັບໃຊ້ຕັ້ງແຕ່ວັນທີ່ 1 ມັງກອນ 2019 ຢ່າງໃດກໍ່ຕາມ ເບື້ອງຕົ້ນຍັງບໍ່ມີລາຍລະອຽດກ່ຽວກັບບົດລົງໂທດຕໍ່ຜູ້ຝ່າຝືນ


ກົດໜາຍສະບັບໃໜ່ກຳນົດໃຫ້ຜູ້ໃຫ້ບໍລິການເຄືອຄ່າຍສັງຄົມເຊັ່ນກູເກິລ ແລະເຟສບຸກເກັບຂໍ້ມູນຜູ້ໃຊ້ໃນຫວຽດນາມ ເປີດສຳນັກງານໃນປະເທດ ແລະລົບເນື້ອຫາວິພາກວິຈານລັດຖະບານ ຫຼືເນື້ອຫາທີ່ບໍ່ເໜາະສົມອື່ນໆ ພາຍໃນ 24 ຊົ່ວໂມງ ຕາມຄຳຮ້ອງຂໍຂອງກະຊວງສານລະສົນເທດແລະການສື່ສານ ແລະໜ່ວຍປະຕິບັດການພິເສດຄວາມໜັ້ນຄົງໄຊເບີຂອງກະຊວງຄວາມໜັ້ນຄົງສາທາລະນະ

ທ່ານໂວ ຈອງ ວຽດ ປະທານຄະນະກຳມະທິການປ້ອງກັນປະເທດ ແລະຄວາມໜັ້ນຄົງຖະແຫຼງຕໍ່ທີ່ປະຊຸມກ່ອນການລົງມະຕິວ່າ ກົດໜາຍລະບັບນີ້ມີຄວາມຈຳເປັນຢ່າງຍິ່ງໃນການປົກປ້ອງຜົນປະໂຫຍດຂອງປະຊາຊົນ ແລະຄວາມໜັ້ນຄົງຂອງຊາດ ກົດໜາຍ ບໍ່ຂັດແຍ່ງກັບພັນທະກໍລະນີຂອງຫວຽດນາມ ທີ່ມີຕໍ່ສົນທິສັນຍາການຄ້າພະຫຸພາຄີເຊັ່ນ ອົງການການຄ້າໂລກ ແລະຫຸ້ນສ່ວນຂ້າມປາຊີຟິກ ທີພີພີ


ປະມານ 70% ຂອງປະຊາກອນຫວຽດນາມ 93 ລ້ານຄົນໃຊ້ບໍລິການອອນໄລນ ແລະປະມານ 53 ລ້ານຄົນມີບັນຊີເຟສບຸກ
ເຈຟ ເພນ ຜູ້ອຳນວຍການເອເຊຍ ອິນເທີເນັດ ໂຄອະລິຊັນ (ເອໄອຊີ) ສະມາຄົມອຸດສາຫະກຳທີ່ລວມເຖິງກູເກິລ ແລະເຟສບຸກ ກ່າວວ່າ ເອໄອຊີຮູ້ສຶກຜິດຫວັງຕໍ່ການຜ່ານຮ່າງກົດໜາຍສະບັບນີ້ ແລະການທີ່ກົດໜາຍ ກຳໜົດໃຫ້ຄວບຄຸມເນື້ອຫາ ແລະເປີດສຳນັກງານໃນຫວຽດນາມ ຈະຂັດຂວາງເປົ້າໜາຍການຂະຫຍາຍໂຕຂອງເສດຖະກິດ ແລະການຈ້າງງານຂອງຫວຽດນາມ
ສະມາຄົມການສື່ສານດິຈິທອລຫວຽດນາມກ່າວວ່າ ກົດໜາຍສະບັບນີ້ອາດເຮັດໃຫ້ການເຕີບໂຕຂອງຈີດີພີຫວຽດນາມຫລຸດລົງ 1.7 % ແລະການລົງທືນຂອງຕ່າງຊາດລົດລົງ 3.1 %