ມາບໍ່ເສຍຖ້ຽວ ! ທຣັມ-ຄິມ ຕົກລົງສະຖາປະນາສຳພັນ-ປົດອາວຸດນິວເຄຼຍ

0
6

ເມື່ອວັນທີ 12 ມິຖຸນາ ສຳນັກຂ່າວຮອຍເຕີ ເຜີຍແຜ່ເນື່້ອຫາໃນຖະແຫຼງການຮ່ວມລະຫວ່າງປະທານາທິບໍດີໂດນັລ ທຣັມ ແຫ່ງອາເມລິກາກັບ ທ່ານຄິມ ຈອງ-ອຶນ ຜູ້ນຳສູງສຸດເກົາຫຼີເໜືອ ຫຼັງສຳເລັດການປະຊຸມສຸດຍອດຄັ້ງປະຫວັດສາດທີ່ສິງກະໂປເມື່ອ 12 ມິຖຸນາ ແລະຜູ້ນຳທັງສອງໄດ້ລົງນາມໃນຂໍ້ຕົກລົງຮ່ວມກັນມີໃຈຄວາມວ່າ ຜູ້ນຳອາເມລິກາ ແລະເກົາຫຼີເໜືອໄດ້ມີການ ແລກປ່ຽນຄວາມຄິດເຫັນທີ່ຄວບຄຸມມີຄວາມເລິກ ແລະມີຄວາມຈິງໃຈໃນປະເດັນທີ່ກ່ຽວຂ້ອງກັບການສະຖາປະນາສຳພັນທະໄມຕີໃໜ່ລະຫວ່າງອາເມລິກາ ກັບສາທາລະນະລັດປະຊາທິປະໄຕປະຊາຊົນເກົາຫຼີ (DPRK) ແລະການເສີມສ້າງສັນຕິພາບເທີງຄາບສະໜຸດເກົາຫຼີ


ປະທານາທິບໍດີ ທຣັມ ໄດ້ໃຫ້ຄຳໜັ້ນທີ່ຈະຮັບປະກັນດ້ານຄວາມປອດໄພແກ່ເກົາຫຼີເໜືອຂະນະທີ່ທ່ານ ຄິມ ຈອງ-ອຶນ ຜູ້ນຳເກົາຫຼີເໜືອຢືນຢັນຈຸດຢືນທີ່ບໍ່ປ່ຽນແປງຄືການປົດອາວຸດນິວເຄຼຍຢ່າງສົມບູນເທີງຄາບສະໜຸດເກົາຫຼີ ດັ່ງນັ້ນເພື່ອເປັນການສ້າງຄວາມເຊື່ອໜັ້ນຂອງສຳພັນໄມຕີໃໜ່ໃນຄັ້ງນີ້ຂອງອາເມລິກາ-ເກົາຫຼີເໜືອເພື່ອຈະເສີມສ້າງສັນຕິພາບເທີງຄາບສະໜຸດເກົາຫຼີ ແລະສັນຕິພາບໃນໂລກ ຈື່ງໄດ້ຮັບຮອງຕໍ່ຄວາມເຊື່ອໜັ້ນຂອງກັນ ແລະກັນທີ່ຈະນຳໄປສູ່ການປົດອາວຸດນິວເຄຼຍເທີງຄາບສະໜຸດເກົາຫຼີດັ່ງຕໍ່ໄປນີ້


1. ອາເມລິກາ ແລະເກົາຫຼີເໜືອໃຫ້ຄຳໜັ້ນທີ່ຈະສະຖາປະນາສຳພັນໄມຕີໃໜ່ຕໍ່ກັນເພື່ອໃຫ້ເປັນໄປຕາມຄວາມປາດຖະໜາຂອງປະຊາຊົນທັງສອງຊາດ ເພື່ອສັນຕິພາບ ແລະຄວາມຈະເລີນຮຸ່ງເຮື່ອງ

2. ອາເມລິກາ ແລະເກົາຫຼີເໜືອຈະຮ່ວມມືກັນໃນຄວາມພະຍາຍາມທີ່ຈະສ້າງສັນຕິພາບທີ່ໜັ້ນຄົງ ແລະຢັ້ງຍືນເທີງຄາບສະໜຸດເກົາຫຼີ

3. ເພື່ອເປັນການຕອກຢ້ຳຕໍ່ ຖະແຫລງການປັນມຸນຈອມ ທີ່ຜູ້ນຳເກົາຫຼີເໜືອ ແລະໃຕ້ໄດ້ລົງນາມຮ່ວມກັນເມື່ອ 27 ເມສາ 2018 ເກົາຫຼີເໜືອໃຫ້ຄຳໜັ້ນຈະມຸ່ງໄປສູ່ການປົດອາວຸດນິວເຄຼຍຢ່າງສົມບູນເທີງຄາບສະໜຸດເກົາຫຼີ

4. ອາເມລິກາ ແລະເກົາຫຼີເໜືອໃຫ້ຄຳໜັ້ນວ່າຈະຮ່ວມຄົ້ນຫາສະເລີຍເສິກຜູ້ທີ່ສູນຫາຍລະຫວ່າງປະຕິບັດໜ້າທີ່ ລວມທັງສົ່ງຄືນ ຄົນຫຼືຮ່າງທີ່ເຫຼືອຢູ່ຂອງຜູ້ທີ່ລະບຸໂຕຕົນໄດ້ແລ້ວໂດຍທັນທີ


ຂ່າວແຈ້ງວ່າ ຫຼັງຈາກປະທານາທິບໍດີທຣັມກັບຜູ້ນຳເກົາຫຼີເໜືອໄດ້ຮ່ວມລົງນາມໃນຂໍ້ຕົກລົງຮ່ວມກັນແລ້ວ ປະທານາທິບໍດີ ທຣັມ ໄດ້ມີການຖະແຫຼງຂ່າວຕໍ່ສື່ມວນຊົນທີ່ໂຮງແຮມຄາເປລລາເທີງເກາະເຊນໂຕຊາ ໃນຂະນະທີ່ຄິມ ຈອງ-ອຶນ ບໍ່ໄດ້ຖະແຫຼງຂ່າວແຕ່ຢ່າງໃດຈາກນັ້ນ ປະທານາທິບໍດີທຣັມ ໄດ້ຂື້ນເຮືອບິນປະຈຳຕຳແໜ່ງ “ແອຣຟອຣ ວັນ” ເດີນທາງອອກຈາກສິງກະໂປມຸ່ງໜ້າກັບສູ່ປະເທດອາເມລິກາໃນຊ່ວງແລງວັນທີ່ 12 ມິຖຸນາ