ພະແນກ ອຄ ແຂວງຈຳປາສັກ ຊຸກຍູ້ການຜະລິດເປັນສິນຄ້າ 2 ບໍລິສັດກະສິກຳ

0
27

ເມື່ອບໍ່ດົນຜ່ານມານີ້, ຄະນະນຳຂອງພະແນກອຸດສາຫະກຳ ແລະ ການຄ້າ ແຂວງຈຳປາສັກ ນຳໂດຍທ່ານ ຄຳໝັ້ນ ພັນທະລາ ຮອງຫົວໜ້າພະແນກອຸດສາຫະກຳ ແລະ ການຄ້າແຂວງ, ມີຜູ້ຕາງໜ້າຈາກຂະແໜງນໍາເຂົ້າ-ສົ່ງອອກ, ບັນດາຜູ້ປະກອບການ ແລະ ສື່ມວນຊົນຮ່ວມລົງຕິດຕາມການຊຸກຍູ້ສົ່ງເສີມຜະລິດເປັນສິນຄ້າຂອງບໍລິສັດ ສຸກຮຸ່ງເຮືອງ (SHH) ຈຳກັດ ແລະ ບໍລິສັດ ພັດທະນາກຳສິກຳ ດ້າຍຖັງ ຈຳກັດຜູ້ດຽວ ເຊິ່ງທັງສອງບໍລິສັດຕັ້ງຢູ່ເມືອງປາກຊ່ອງ ແຂວງຈຳປາສັກ.

ສຳລັບ ບໍລິສັດ ສຸກຮຸ່ງເຮືອງ (SHH) ຈຳກັດເປັນການລົງທຶນ 100% ຂອງນັກທຸລະກິດຫວຽດນາມ ທີ່ເຂົ້າມາລົງທຶນປູກໝາກໜ໋ອດ ເພື່ອສົ່ງຂາຍໄປຍັງປະເທດຫວຽດນາມ, ສປ ຈີນ ແລະ ພາຍໃນ ສປປ ລາວ ເຊິ່ງມີເນື້ອທີ່ການຜະລິດທັງໝົດ 300 ເຮັກຕາ.

ໂອກາດດຽວກັນ, ທ່ານຮອງຫົວໜ້າພະແນກ ອຄ ແຂວງຈຳປາສັກ ກໍ່ໄດ້ສະແດງຄວາມຍ້ອງຍໍຊົມເຊີຍຕໍ່ຜູ້ບໍລິຫານຂອງບໍລິສັດທີ່ເຂົ້າມາລົງທຶນດ້ານກະສິກຳເພື່ອສົ່ງອອກໄປ ອັນເປັນຂີດໝາຍສຳຄັນໃນການສ້າງສິນຄ້າປະເພດກະສິກຳຈາກລາວໄປຍັງຕະຫຼາດຕ່າງປະເທດ ແລະ ທີ່ສຳຄັນຍັງສ້າງວຽກເຮັດງານທຳໃຫ້ກັບພໍ່ແມ່ປະຊາຊົນທີ່ອາໃສຢູ່ບໍລິເວນໃກ້ຄຽງມີລາຍຮັບຈາກການອອກແຮງງານໃນສວນກະສິກຳຂອງບໍລິສັດນຳອີກ.

ຂະນະທີ່, ບໍລິສັດ ພັດທະນາກຳສິກຳ ດ້າຍຖັງ ຈຳກັດຜູ້ດຽວ ເປັນບໍລິສັດລົງທຶນຈາກ ສສ ຫວຽດນາມເຊັ່ນກັນ ເຊິ່ງເປັນບໍລິສັດໃນເຄືອຂອງກຸ່ມບໍລິສັດຮວງແອງຢາລາຍ ທີ່ເຂົ້າມາພັດທະນາກະສິກຳນັບແຕ່ເດືອນ 3 ປີ 2016 ເປັນຕົ້ນມາ ໃນເນື້ອທີ່ສຳປະທານທັງໝົດ 1.389 ເຮັກຕາ. ໃນນີ້, ລົງທຶນປູກໝາກໜ໋ອດ 500 ເຮັກຕາ, ປູກມັກດ້າງ 200 ເຮັກຕາ, ປູກໝາກເຜັດ 70 ເຮັກຕາ; ນອກນັ້ນ, ຍັງມີປູກໝາກສົ້ມໂອຈຳນວນໜຶ່ງ ແລະ ກຳລັງປູກໝາກຖົ່ວລຽນ ຕື່ມອີກ.

ສຳລັບ, ຕະຫຼາດສົ່ງອອກຫຼັກຍັງແມ່ນຫວຽດນາມ, ສປ ຈີນ, ຣາຊອານາຈັກໄທ ແລະ ຈຳໜ່າຍພາຍໃນ ສປປ ລາວ ໂດຍສະເພາະແມ່ນໝາກເຜັດ ມື້ໜຶ່ງສາມາດສົ່ງອອກໄດ້ 3 ໂຕນ ແລະ ໝາກໜ໋ອດແມ່ນສົ່ງອອກເປັນງວດ, ງວດລະ 25 ຄັນລົດ (ລົດໜຶ່ງສາມາດບັນຈຸໄດ້ 3 ໂຕນ) ໂດຍມີກໍາມະກອນລວມທັງໂຮງງານ ແລະ ຢູ່ສວນທັງໝົດປະມານ 800-1.000 ຄົນ.

ໃນການລົງຊຸກຍູ້ການຜະລິດເປັນສິນຄ້າໃນຄັ້ງນີ້, ທາງຄະນຳຂອງພະແນກອຸດສາຫະກຳ ແລະ ການຄ້າ ຍັງໄດ້ໄປເບິ່ງສວນປູກຕົວຈິງ ແລະ ໂຮງງານຜະລິດຕື່ມອີກ ເພື່ອເບິ່ງຂັ້ນຕອນການຜະລິດຂອງໂຮງງານລວມທັງການແພັກຄິງສິນຄ້າສຳເລັດຮູບກ່ອນຈະສົ່ງອອກ ຕື່ມອີກ.