4 ເດືອນຕົ້ນປີ ມີຜູ້ເສຍຊີວິດຫຼາຍກວ່າ 400 ຄົນ ຈາກອຸບັດເຫດທາງຖະໜົນ

0
21

ທ່ານ ພົນຕີ ສົມແກ້ວ ສີລາວົງ ລັດຖະມົນຕີກະຊວງປ້ອງກັນ ຄວາມສະຫງົບ ໄດ້ລາຍງານບັນຫາອຸບັດເຫດຕາມທ້ອງຖະໜົນຕໍ່ກອງປະຊຸມສະໄໝສາມັນເທື່ອທີ 5 ຂອງສະພາແຫ່ງຊາດຊຸດທີ VIII ວ່າ: ສະເພາະການອຸບັດເຫດທີ່ເກີດຂຶ້ນ ໃນ 4 ເດືອນຕົ້ນປີ 2018 ມີທັງໝົດ 2,341 ເລື່ອງ, ມີພາຫະນະເປ່ເພ 4,067 ຄັນ, ຄົນຖືກບາດ ເຈັບ 3,816 ຄົນ ແລະ ຄົນເສຍຊີວິດ 429 ຄົນ. ສ່ວນຫຼາຍແມ່ນເກີດຂຶ້ນຢູ່ບັນດາຕົວເມືອງໃຫຍ່ ຄື: ນະຄອນຫຼວງວຽງຈັນ, ຈຳປາສັກ ແລະ ສະຫວັນນະເຂດ.

ສາເຫດຫຼັກໆ ແມ່ນຈາກການເພີ່ມຂຶ້ນຢ່າງຫຼວງຫຼາຍຂອງຍວດຍານພາຫະນະ ໂດຍປັດຈຸບັນໃນທົ່ວປະເທດມີພາຫະນະຈຳນວນທັງໝົດເກືອບ 2 ລ້ານຄັນ, ແຕ່ການເພີ່ມເສັ້ນທາງສັນຈອນພັດຍັງມີໜ້ອຍ, ເຮັດໃຫ້ການສັນຈອນ ມີຄວາມແອອັດ, ສັບສົນ.

ອີກດ້ານ ໜຶ່ງຜູ້ຂັບຂີ່ຍັງຂາດສະຕິ, ບໍ່ເຄົາລົບກົດໝາຍ ແລະ ລະເມີດກົດລະບຽບຈະລາຈອນເປັນຕົ້ນແມ່ນ: ການດື່ມສິ່ງມຶນເມົາແລ້ວຂັບຂີ່ລົດເຊິ່ງກວມເອົາ 26.6%; ໃຊ້ຄວາມໄວເກີນກຳນົດກວມ 19.6%; ປ່ຽນທິດທາງກະທັນຫັນກວມ 12.8%; ແຊງບໍ່ຮັບປະກັນກວມ 12.7%; ບໍ່ປ່ອຍສິດກວມ 12.4%; ເຕັກນິກລົດບໍ່ຮັບປະກັນກວມ 2.4%; ລ່ວງປ້າຍເຕັກນິກກວມ 1.5%; ການຂີດເສັ້ນແບ່ງຈະລາຈອນບໍ່ຈະແຈ້ງ, ປ້າຍສັນຍານ, ໄປເຍືອງທາງ ແລະ ອື່ນໆກວມ 11.7%, ທ່ານ ພົນຕີ ສົມແກ້ວ ສີລາວົງ ກ່າວ.

ສຳລັບມາດຕະການ ແລະ ວິທີແກ້ໄຂໃນຕໍ່ໜ້າທ່ານ ລັດຖະມົນຕີກະຊວງປ້ອງກັນຄວາມສະຫງົບກ່າວວ່າ: ຕ້ອງໄດ້ສຸມໃສ່ຈັດຕັ້ງປະຕິບັດ, ໂຄສະນາດຳລັດສະບັບເລກທີ 188/ນຍ ວ່າດ້ວຍ ການປັບໃໝ ແລະ ມາດຕະການຕ່າງໆຕໍ່ຜູ້ລະເມີດລະບຽບກົດໝາຍກ່ຽວກັບການສັນຈອນທາງບົກ, ການຂົນສົ່ງທາງບົກ ແລະ ການປົກປັກຮັກສາທາງຫຼວງ ເພື່ອປູກຈິດສຳນຶກໃຫ້ກັບຜູ້ຂັບຂີ່ໃນການໃຊ້ ລົດ-ໃຊ້ຖະໜົນ; ປັບປຸງກຳລັງຕຳຫຼວດຈະລາຈອນ ແລະ ເຄື່ອງຮັບໃຊ້ໃຫ້ແກ່ວຽກງານດັ່ງກ່າວໃຫ້ເໝາະສົມຕົວຈິງ ເປັນຕົ້ນແມ່ນ: ລະບົບກ້ອງວົງຈອນປິດ, ລະບົບໄຟອຳນາດ, ເຄື່ອງກວດທາດເຫຼົ້າ, ເຄື່ອງຈັບລະດັບຄວາມໄວຂອງລົດ ແລະ ອື່ນໆ.

ສຸມໃສ່ ໂຄງການຫຼຸດຜ່ອນອຸບັດເຫດຈະລາຈອນຢ່າງແຂງແຮງ, ເຮັດໃຫ້ອຸບັດເຫດຫຼຸດລົງເທື່ອລະກ້າວ; ເອົາໃຈໃສ່ລະບາຍການສັນ ຈອນທີ່ແອອັດ ໃນໂມງເຂົ້າການ-ເລີກການຕາມເສັ້ນທາງທີ່ສຳຄັນໃຫ້ມີຄວາມສະດວກ, ວ່ອງໄວ ແລະ ປອດໄພ, ນຳເອົາຫຼັກສູດຄວາມປອດໄພເຂົ້າໃນຫຼັກສູດການຮຽນ-ການສອນ ເພື່ອປູກຈິດສຳນຶກໃຫ້ ຄວາມຮູ້, ຄວາມເຂົ້າໃຈແກ່ນັກຮຽນຢູ່ຕາມໂຮງຮຽນຕ່າງໆ ແລະ ອື່ນໆ.

ໃນປີ 2017 ທົ່ວປະເທດມີອຸບັດເຫດເກີດຂຶ້ນ 5,868 ເລື່ອງ, ພາຫະນະເປ່ເພ 10,739 ຄັນ, ຄົນຖືກບາດເຈັບ 9,640 ຄົນ ແລະ ເສຍຊີວິດ 1,053 ຄົນ ສະເລ່ຍຄົນ ເສຍຊີວິດ 3.9 ຄົນຕໍ່ມື້.

ຂໍຂອບໃຈ
ຂໍ້ມູນ : ໜັງສືພິມເສດຖະກິດ-ການຄ້າ