ນາຍົກ ເປີດເຜີຍ! ວິທີເຮັດໃຫ້ລາຍຮັບບໍ່ຮົ່ວ ຕ້ອງປະຕິຮູບພະນັກງານຂະແໜງພາສີ-ອາກອນ

0
11

ນສພ ເສດຖະກິດ-ການຄ້າລາຍງານວ່າ: ໃນວາລະການດຳເນີນກອງປະຊຸມສະໄໝສາມັນເທື່ອທີ 5 ຂອງສະພາແຫ່ງຊາດ ຊຸທີ VIII ໃນທ້າຍອາທິດທີ່ຜ່ານມາ ທ່ານນາຍົກລັດຖະມົນຕີ ໄດ້ຊີ້ແຈງຕໍ່ສະມາຊິກສະພາແຫ່ງຊາດກ່ຽວກັບ ມາດຕະການເກັບລາຍຮັບ ແລະ ການຄຸ້ມຄອງລາຍຈ່າຍໃນຕໍ່ໜ້າຈະມີທິດທາງໄປທາງໃດ?

ຕໍ່ປະເດັນດັ່ງກ່າວ, ທ່ານ ທອງລຸນ ສີສຸລິດ ນາຍົກລັດຖະມົນຕີ ຊີ້ແຈງວ່າ: ການເກັບລາຍຮັບໃນຕໍ່ໜ້າລັດຖະບານຈະຕັດສິນໃຈຫັນໄປສູ່ຄວາມໂປ່ງໃສ, ຫັນໄປສູ່ລະບຽບກົດໝາຍ, ບໍ່ໃຫ້ຍົກເວັ້ນສິນຄ້າທີ່ບໍ່ເປັນລະບົບລະບຽບອື່ນໆ ພວກເຮົາໄດ້ມີມາດຕະການມາດົນແລ້ວ ແລະ ພະຍາຍາມຈັດຕັ້ງປະຕິບັດບັນດາມາຕະການຕ່າງໆ ໂດຍສະເພາະນ້ຳມັນເຊື້ອໄຟ ທີ່ໄດ້ປະກາດບໍ່ໃຫ້ຍົກເວັ້ນພາສີໃນໄລຍະຜ່ານມາ ເຮັດໃຫ້ພາສີຕົວເລກລາຍດ້ານຮັບດ້ານນີ້ສູງຂຶ້ນກວ່າເກົ່າຫຼາຍ.

ສ່ວນການເກັບລາຍຮັບຕ້ອງຫັນໄປສູ່ທັນສະໄໝ ເຊິ່ງເປັນນະໂຍບາຍຫຼັກຂອງລັດຖະບານ ຂໍໃຫ້ທຸກພາກສ່ວນເອົາໃຈໃສ່ຊ່ວຍກັນ ແລະ ຮ່ວມກັນສະໜັບສະໜູນຕ້ອງສ້າງໃຫ້ເປັນລະບຽບ ແລະ ກົດໝາຍ ພ້ອມກັນປະຕິບັດໃຫ້ໄດ້, ຖ້າບໍ່ຫັນໄປສູ່ທັນສະໄໝກໍຈະຮົ່ວໄຫຼຄືເກົ່າ. ນອກນັ້ນ, ຈະເຂັ້ມງວດຜູ້ໃດຜິດ ຈະຕ້ອງລົງໂທດ ຫຼື ຜູ້ໃດຖືກກໍ່ຕ້ອງໄດ້ຮັບການຍ້ອງຍໍ; ຂະນະທີ່ ພະນັກງານໃນຂະ ແໜງພາສີ-ອາກອນ ຕ້ອງໄດ້ປະຕິຮູບຄືນໃໝ່ ເພາະໃນປັດຈຸບັນໃຊ້ຄົນຫຼາຍເກີນໄປ ແລະ ຂາດຈັນຍາບັນ ຕ້ອງເອົາຄົນດີມາເຮັດ. ດັ່ງນັ້ນ, ຈຶ່ງຂໍໃຫ້ສະມາຊິກສະພາແຫ່ງຊາດຊ່ວຍສະໜັບສະໜູນ ແລະ ຂໍໃຫ້ປະຊາຊົນເປັນຫູເປັນຕາຊ່ວຍ.

ທ່ານ ນາຍົກລັດຖະມົນຕີ ກ່າວຕື່ມວ່າ: ສ່ວນການຄຸ້ມຄອງລາຍຈ່າຍຕ້ອງກວດກາຢ່າງເຂັ້ມງວດ, ຕ້ອງປະຢັດ, ຕ້ອງຮັດກຸມກວ່າເກົ່າ ໂດຍສະເພາະແມ່ນໂຄງການຕ່າງໆ ບໍ່ຕ້ອງແລ່ນຕາມຄວາມຢາກໄດ້ ເພາະພວກເຮົາຈະກວດກາກ່ອນ ວ່າຈະຈ່າຍໂຄງການໃດ? ຈະໄດ້ກວດກາແຕ່ເລີ່ມບໍ່ທັນເຮັດ, ກວດກາເຖິງຄວາມຈຳເປັນ ແລະ ຄວາມຕ້ອງການ, ກວດກາຄຸນນະພາບ, ກວດກາຕົ້ນທຶນ ແລະ ກວດກາລາຄາອີກດ້ວຍ.

ສຳລັບ ໂຄງການທີ່ຈັດຕັ້ງປະຕິບັດໄປແລ້ວ ຕ້ອງກວດກາຄວາມເໝາະສົມ, ຄວາມສົມເຫດສົມຜົນຂອງມູນຄ່າ, ຫົວໜ່ວຍ ແລະ ຄຸນນະພາບໃນການຈັດຕັ້ງປະຕິບັດໂຄງການນັ້ນຈຶ່ງຈ່າຍໃຫ້ ເພາະລັດຖະບານພະຍາຍາມທີ່ສຸດບໍ່ໃຫ້ມີຊ່ອງວ່າງໃນແຕ່ລະດ້ານ ແລະ ຮັດແຄບລົງ ເພື່ອປະຢັດຕົ້ນທຶນ