ຣັດເຊຍຕັດຄວາມເປັນໄປໄດ້ໃນການກັບເຂົ້າຮ່ວມເປັນ “ຈີ8”

    0
    10

    ສຳນັກຂ່າວຕ່າງປະເທດລາຍງານຈາກນະຄອນມອສໂກວ ປະເທດຣັດເຊຍເມື່ອວັນທີ່ 10 ມິຖຸນາວ່າ ທ່ານເຊີເກ ລາຟຮອຟ ລັດຖະມົນຕີວ່າການກະຊວງການຕ່າງປະເທດຣັດເຊຍ ກ່າວເມື່ອວັນເສົາທີ່ຜ່ານມາວ່າ ລັດຖະບານມອສໂກວບໍ່ເຄີຍ “ຂໍຮ້ອງໃຜ” ໃຫ້ຊ່ວຍຮັບກັບເຂົ້າຮ່ວມກຸ່ມປະເທດອຸດສາຫະກຳຊັ້ນນຳທີ່ປະຈຸບັນມີຢູ່ 7 ປະເທດ ເພື່ອໃຫ້ກັບໄປເປັນກຸ່ມ “ຈີ8” ຕາມເດີມຫຼັງຖືກຂັບອອກຈາກກຸ່ມເມື່ອປີ 2014 ຈາກກໍລະນີຄວາມຂັດແຍ່ເລື່ອງຄາບສະໜຸດໄຄຣເມຍ ແລະສະຖານະການໃນພາກຕະເວັນອອກຂອງຢູເຄຣນ ຂະນະດຽວກັນ ຣັດເຊຍມີຄວາມ “ສະບາຍໃຈ” ໃນການຮ່ວມມືກັບກອບຄວາມຮ່ວມມືຂອງກຸ່ມເສດຖະກິດອື່ນ ອາທິ ກຸ່ມປະເທດເສດຖະກິດຂະໜາດໃຫ່ຍ “ຈີ20”

    ຕໍ່ມາປະທານາທິບໍດີວາລາດີເມຍປູຕິນ ກ່າວເຖິງເລື່ອງນີ້ ນອກຮອບການປະຊຸມອົງການຄວາມຮ່ວມມືຊຽງໄຮ້ (ເອສຊີໂອ) ທີ່ເມືອງຊິງເຕົ່າ ໃນມົນທົນຊານຕົງ ທາງຕະເວັນອອກຂອງຈີນເມື່ອວັນອາທິດວ່າ ຣັດເຊຍບໍ່ໄດ້ເປັນຝ່າຍເດີນອອກຈາກກຸ່ມ ແລະຍັງຄົງຍິນດີຕ້ອນຮັບຜູ້ນຳກຸ່ມຈີ7 ທຸກປະເທດ ທີ່ນະຄອນມອສໂກວ ທັງນີ້ ຜູ້ນຳຣັດເຊຍກ່າວວ່າທ່ານ ຍັງຄົງເຊື່ອໜັ້ນໃນ “ຄວາມຈຳເປັນ” ຂອງການພົບຫາລືຢ່າງເປັນທາງການກັບປະທານາທິບໍດີໂດນັລ ທຣັມ ຜູ້ນຳອາເມລິກາ ຊື່ງເປັນຜູ້ສະເໜີແນວຄິດຮື້ຟື້ນກຸ່ມຈີ8 ແຕ່ໄດ້ຮັບການປະຕິເສດທັນຄວັນຈາກເຢຍລະມັນ ແລະອັງກິດ ແມ່ນວ່າປູຕິນບໍ່ໄດ້ກ່າວຢ່າງຊັດເຈນ ວ່າການພົບຫາລືຈະເກີດຂື້ນທີ່ໃດ ແລະເມື່ອໃດ ແຕ່ທຳນຽບເຄຣມລິນເຜີຍວ່າ ມີຄວາມເປັນໄປໄດ້ທີ່ຈະເປັນນະຄອນວຽນນາ ເມືອງຫຼວງຂອງອອສເຕຣຍ ຊື່ງຜູ້ນຳຣັດເຊຍເດີນທາງຢ້ຽຢຍາມເມື່ອອາທິດຜ່ານມາ