ທຣັມ-ຄິມ ກຽມເຈລະຈາເລື່ອງປົດ ນິວເຄຼຍ ແລະສ້າງສັນຕິພາບ

0
7

ສຳນັກຂ່າວຕ່າງປະເທດລາຍງານຈາກປະເທດສິງກະໂປເມື່ອວັນທີ່ 11 ມິຖຸນາວ່າ ສຳນັກຂ່າວກາງເກົາຫຼີ (ເຄຊີເອັນເອ) ກະບອກສຽງຂອງລັດຖະບານປຽງຢາງລາຍງານເມື່ອວັນຈັນວ່າທ່ານຄິມ ຈອງ-ອຶນ ຜູ້ນຳສູງສຸດຂອງເກົາຫຼີເໜືອ ເດີນທາງຢ້ຽມຢາມສິງກະໂປ ໂດຍມີກຳນົດພົບຫາລືກັບປະທານາທິບໍດີໂດນັລ ທຣັມ ຜູ້ນຳອາເມລິກາ ໃນວັນອັງຄານທີ່ 12 ມິຖຸນານີ້ ເພື່ອແລກປ່ຽນຄວາມຄິດເຫັນໃນປະເດັນທີ່ “ຫຼາກຫຼາຍແລະເລິກເຊິ່ງ” ກ່ຽວກັບການເສີມສ້າງຄວາມສຳພັນລະດັບທະວີພາຄີໃນຮູບແບບໃໜ່ບໍ່ວ່າຈະເປັນກົນໄກການສ້າງສັນຕິພາບທີ່ຖາວອນ ແລະຢັ້ງຢືນເທີງຄາບສະໜຸດເກົາຫຼີ ການເນັ້ນໜັກເຖິງຂະບວນການປົດອາວຸດນິວເຄຼຍເທີງຄາບສະໜຸດເກົາຫຼີ ແລະອີກຫຼາກຫຼາຍປະເດັນທີ່ທັງສອງຝ່າຍມີຄວາມວິຕົກກັງວົນຮ່ວມກັນ


ລາຍງານຂອງເຄຊີເອັນເອລະບຸດ້ວຍວ່າ ໃນບັນດາຄະນະເຈົ້າໜ້າທີ່ລະດັບສູງຂອງລັດຖະບານປຽງຢາງທີ່ຕິດຕາມທ່ານຄິມ ຈອງ-ອຶນ ຢ້ຽມຢາມສິງກະໂປໃນຄັ້ງນີ້ ລວມເຖິງທ່ານຄິມ ຢອງ-ຊອລ ຮອງປະທານຄະນະກຳມະທິການກາງພັກກຳມະກອນເກົາຫຼີ ຊື່ງຢ້ຽມຢາມນະຄອນວໍຊິງຕັນ ແລະພົບກັບທຣັມປະມານ 1 ອາທິດກ່ອນເຖິງສິງກະໂປຊຳມິດ ທ່ານຮີ ຊູ-ຢອງ ຮອງປະທານກິດຈະການວິເທດສຳພັນຂອງພັກກຳມະອນເກົາຫຼີ ທ່ານຣີ ຢອງ-ໂຮ ລັດຖະມົນຕີວ່າການກະຊວງການຕ່າງປະເທດເກົາຫຼີເໜືອ ນາຍພົນໂນ ຄວາງ-ຊອລ ລັດຖະມົນດ້ານກິດຈະການກອງທັບປະຊາຊົນເກົາຫຼີ (ເຄພີເອ) ແລະທ່ານນາງ ຄິມ ໂຢ-ຈອງ ນ້ອງສາວຂອງຜູ້ນຳສູງສຸດ


ທັງນີ້ ທ່ານຄິມ ຈອງ-ອຶນ ໄດ້ຮັບການຕ້ອນຮັບຈາກນາຍົກລັດຖະມົນຕີລີ ຊຽນ ລຸງ ຜູ້ນຳສິງກະໂປທີ່ທຳນຽບອິສຕານາ ໂດຍຜູ້ນຳຂອງເກົາຫຼີເໜືອກ່າວຂອບໃຈລັດຖະບານສິງກະໂປໃນການເປັນເຈົ້າພາບຈັດການປະຊຸມຄັ້ງປະຫວັດສາດທີ່ທົ່ວທັງໂລກຈັບຕາເບີ່ງຢ່າງໃກ້ຊິດ ຂະນະທີ່ທ່ານລີ ຊຽນ ລຸງ ກ່າວວ່າລັດຖະບານສິງກະໂປທຸ່ມງົບປະມານ 20 ລ້ານດອລລາສິງກະໂປຊື່ງເປັນຄ່າໃຊ້ຈ່າຍທີ່ຝ່າຍສິງກະໂປນັ້ນ “ເຕັມໃຈ” ເພື່ອຮ່ວມເປັນສ່ວນໜື່ງຂອງຂະບວນການສ້າງສັນຕິພາບລະຫວ່າງປະເທດ

ສຳລັບມາດຕະການຮັກສາຄວາມປອດໄພຂອງການປະຊຸມຄັ້ງນີ້ເປັນໄປຢ່າງຮັດກຸມ ແລະເຂັ້ມງວດຂັ້ນສູງສຸດ ທ່າມກາງສື່ມວນຊົນຈາກທົ່ວທຸກສາລະທິດຫຼາຍກວ່າ 2,500 ຄົນ ແຕ່ກະຊວງປ້ອງກັນຄວາມສະຫງົບຂອງສິງກະໂປລາຍງານເມື່ອວັນອາທິດ ເລື່ອງການສົ່ງກັບຜູ້ສື່ຂ່າວຊາວເກົາຫຼີໃຕ້ 2 ຄົນຂອງສະຖານີໂທລະພາບເຄບີເອສ ຕັ້ງແຕ່ເມື່ອວັນເສົາທີ່ຜ່ານມາ ຫຼັງຜົນການກວດສອບໂທລະສັບຂອງຜູ້ສື່ຂ່າວທັງສອງຄົນ ພົບວ່າມີການຄົ້ນຫາກ່ຽວກັບ “ລະເບີດຂ້າໂຕຕາຍ” ແລະຄວາມພະຍາຍາມ “ບຸກຮຸກ” ສະຖານເອກອັກຄະລາຊະທູດເກົາຫຼີເໜືອ