ຊາວຫວຽດນາມປະທ້ວງ ກໍລະນີ ລັດຖະບານ ໃຫ້ຕ່າງປະເທດສຳປະທານດິນ 99 ປີ

0
17

ສຳນັກຂ່າວເອເອຟພີລາຍງານຈາກນະຄອນຮາໂນ້ຍປະເທດຫວຽດນາມເມື່ອວັນທີ່ 10 ມິຖຸນາວ່າ ຮ່າງກົດໜາຍທີ່ເປັນສູນກາງຄວາມບໍ່ພໍໃຈຂອງປະຊາຊົນຈະໃຫ້ສັນຍາເຊົ່າເປັນເວລາ 99 ປີ ໃນເຂດເສດຖະກິດພິເສດຫຼາຍແຫ່ງຂອງຫວຽດນາມຊື່ງນັກສັງເກດການບາງສ່ວນເບີ່ງວ່າເປັນສັນຍາທີ່ເອື້ອປະໂຫຍດຕໍ່ຕ່າງຊາດ ໂດຍສະເພາະບໍລິສັດຕ່າງໆຂອງຈີນ


ແມ່ນວ່າຫວຽດນາມ ແລະຈີນຈະມີປັນຫາກະທົບກະທັ່ງກັນເໜືອພື້ນທີ່ພິພາດໃນທະເລຈີນໃຕ້ແຕ່ທາງການຮາໂນ້ຍມັກສະຫລາຍການຊຸມນຸມປະທ້ວງຈີນໃນປະເທດ
ເພື່ອເປັນການຕອບສະໜອງຕໍ່ກະແສວິຈານຮ່າງກົດໜາຍສະບັບນີ້ຫຼາຍຂື້ນ ລັດຖະບານຄອມມູນິດຫວຽດນາມກ່າວເມື່ອວັນເສົາວ່າ ຈະຮ້ອງຂໍຕໍ່ລັດສະພາໃຫ້ເລື່ອນການອະນຸມັດໄປຈົນເຖິງທ້າຍປີນີ້ ແຕ່ນັ່ນບໍ່ໄດ້ເຮັດໃຫ້ຄວາມໂກດເຄືອງຂອງປະຊາຊົນສະຫງົບລົງ ຜູ້ປະທ້ວງປະມານ 40-50 ຄົນລວມໂຕກັນແຄມທະເລສາບຣວ່ານກ໋ຽມໃນນະຄອນຮ່າໂນ້ຍ ເມື່ອວັນອາທິດ ຊູປ້າຍຂໍ້ຄວາມຄັດຄ້ານຮ່າງກົດໜາຍຊື່ງຂຽນວ່າ “ຄັດຄ້ານຮ່າງກົດໜາຍເຂດເສດຖະກິດພິເສດ” ແລະ “ຄັດຄ້ານໃຫ້ຈີນເຊົ່າທີ່ດິນ”


ຜູ້ສື່ຂ່າວເອເອຟພີເຫັນຕຳຫຼວດນອກເຄື່ອງແບບລາກໂຕປະຊາຊົນປະມານ 20 ຄົນ ຂື້ນໄປເທີງລົດບັດທີ່ຈອດຢູ່ບໍ່ໄກ ເຫດການເກີດຂື້ນຫຼັງການຈັບກຸມຜູ້ປະທ້ວງ 2 ຄົນເມື່ອວັນເສົາທີ່ເມືອງໂຮຈິມິນທາງພາກໃຕ້ ຖານແຈກຢາຍເຈ້ຍໃບປິວຮຽກຮ້ອງປະຊາຊົນອອກມາປະທ້ວງຮ່າງກົດໜາຍ


ການລວມໂຕສະແດງຄວາມບໍ່ພໍໃຈຂອງປະຊາຊົນໃນທີ່ສາທາລະນະເກີດຂື້ນໄດ້ຍາກໃນຫວຽດນາມປະເທດທີ່ປົກຄອງດ້ວຍພັກຄອມມູນິດພັກດຽວ ຊື່ງກຸ່ມຜູ້ນຳອານຸຮັກນິຍົມທີ່ຄອງອຳນາດຕັ້ງແຕ່ປີ 2016 ໃຊ້ມາດຕະການເຂັ້ມງວດຫຼາຍຂື້ນໃນການຈັດການກັບກຸ່ມຜູ້ປະທ້ວງຫຼືກຸ່ມເຄື່ອນໄຫວ


ນັກເຄື່ອນໄຫວດ້ານສິ່ງແວດລ້ອມຊາວຫວຽດນາມລາຍໜື່ງຖືກສານຕັດສິນຈຳຄຸກ 14 ປີໃນເດືອນກຸມພາທີ່ຜ່ານມາ ຈາກການປະທ້ວງຕໍ່ຕ້ານການຖິ້ມຂີ້ເຫຍື້ອເປັນພິດລົງທະເລຊື່ງເຮັດໃຫ້ປາຕາຍລອຍເຕັມໜ້າທະເລຫຼາຍໂຕນເມື່ອປີ 2016