ນາໂຕ້ປະຕິເສດຮັບກາຕາຣເຂົ້າເປັນສະມາຊິກ

0
12

ສຳນັກຂ່າວເອເອຟພີລາຍງານຈາກນະຄອນບຣັສເຊລປະເທດເບລຍ້ຽມເມື່ອວັນທີ່ 6 ມິຖຸນາວ່າ ນາໂຕ້ຕອບສະໜອງຄວາມເຫັນຂອງລັດຖະມົນຕີປ້ອງກັນປະເທດກາຕາຣທີ່ກ່າວເມື່ອວັນອັງຄານວ່າ ເປົ້າໜາຍສຳຄັນ ໃນແຜນຍຸດທະສາດໄລຍະຍາວຂອງກາຕາຣຄືເຂົ້າຮ່ວມເປັນສະມາຊິກຂອງອົງການນາໂຕ້

ເຈົ້າໜ້າທີ່ຂອງກຸ່ມພັນທະມິດທາງທະຫານ 29 ປະເທດ ກ່າວເມື່ອວັນພຸດວ່າ ຕາມມາດຕາ 10 ຂອງສົນທິສັນຍາວໍຊິງຕັນ ສະເພາະກຸ່ມປະເທດໃນທະວີບຢູໂຣບເທົ່ານັ້ນ ທີ່ຈະເປັນສະມາຊິກຂອງນາໂຕ້ໄດ້ ແລະວ່າ ກາຕາຣເປັນປະເທດຮຸ້ນສ່ວນທີ່ມີຄຸນຄ່າ ແລະຍາວນານຂອງນາໂຕ້

ຄາຫລິດ ບິນ ໂມຣາເຫມັດ ອັລ-ອັດຕິຍາ ລັດຖະມົນຕີກະຊວງປ້ອງກັນປະເທດກາຕາຣ ກ່າວໃນວາລະຄົບຮອບ 1 ປີ ຄວາມຂັດແຍ່ງທາງການທູດທີ່ເຈັບປວດກັບ 4 ປະເທດເພື່ອນບ້ານເມື່ອວັນອັງຄານວ່າ ກາຕາຣຕ້ອງການເປັນສະມາຊິກໂດຍສົມບູນຂອງນາໂຕ້ “ທຸກມື້ນີ້ກາຕາຣໄດ້ກາຍເປັນໜື່ງໃນປະເທດທີ່ສຳຄັນທີ່ສຸດໃນພູມມີພາກ ໃນແງ່ຄຸນນະພາບຂອງອາວຸດຍຸດໂທປະກອນ “ອັດຕິຍາ ກ່າວ” ໃນແງ່ຂອງສະມາຊິກກະພາບ ເຮົາເປັນພັນທະມິດລາຍສຳຄັນຈາກນອກນາໂຕ້ ຄວາມໄຝ່ຝັນສູງສຸດຂອງພວກເຮົາຄືສະມາຊິກໂດຍສົມບູນ ຫາກຮຸ້ນສ່ວນຂອງເຮົາກັບນາໂຕ້ພັດທະນາ ແລະວິໄສທັດຂອງເຮົາຊັດເຈນ”

ຄວາມເຫັນຂອງລັດຖະມົນຕີປ້ອງກັນປະເທດກາຕາຣມີຂື້ນຂະນະທີ່ກຳລັງເກີດຄວາມອ່ອນໄຫວທາງການເມືອງໃນພູມມີພາກ
ວັນທີ່ 5 ມິຖຸນາ 2017 ຊາອຸດິອາຣາເບຍ ສະຫະລັດອາຣັບເອມິເຣດ (ຢູເອອີ) ບາເຮນ ແລະອີຢິບປະກາດຕັດຄວາມສຳພັນກັບກາຕາຣ ໂດຍກ່າວຫາໂດຣາສະໜັບສະໜູນກຸ່ມກໍ່ການຮ້າຍ ແລະມີຄວາມໃກ້ຊິດກັບອີຣ່ານຫຼາຍເກີນໄປ ທັງ 4 ປະເທດຂັບໄລ່ຊາວກາຕາຣອອກນອກປະເທດ ແລະເຂດແດນທາງບົກຢ່າງດຽວຂອງກາຕາຣດ້ານຕິດຊາອຸດິອາຣາເບຍຖືກປິດຕະຫຼອດປີທີ່ຜ່ານມາ ຄວາມພະຍາຍາມທາງການທູດເພື່ອສະຫລາຍຄວາມຂັດແຍ້ງບໍ່ປະສົບຄວາມສຳເລັດໃນພູມມີພາກທີ່ເຄີຍໜັ້ນຄົງທີ່ສຸດແຫ່ງໜື່ງຂອງໂລກອາຣັບ