ເຂື່ອນໄຟຟ້ານ້ຳງຽບ 1 ມີຄວາມຄືບໜ້າ 95% ເລີ່ມກັກເກັບນ້ຳໄວ້

0
38

ບໍລິສັດ ໄຟຟ້າ​ນ້ຳ​ງຽບ 1 ຈຳກັດ ຮ່ວມ​ກັບບໍລິສັດ ໂອ​ບາ​ຢາ​ຊິ Corporation ເຊິ່ງ​ແມ່ນ​ບໍລິສັດ​ຮັບຜິດຊອບ​ວຽກ​ງານ​ກໍ່ສ້າງ​ຂອງ​ໂຄງການ ຈັດ​ພິທີ​ສະເຫຼີມສະຫຼອງ​ການ​ກັກ​ເກັບ​ນ້ຳ​ທີ່​ເຂື່ອນ​ໃຫຍ່​ຂອງ​ໂຄງການ​ເຂື່ອນ​ໄຟຟ້າ​ນ້ຳ​ງຽບ 1 ຂຶ້ນ​ໃນ​ວັນ​ທີ 25 ພຶດສະພາ 2018 ທີ່​ສະໂມສອນ​ບ້ານ​ພູ​ໂຮມ​ໄຊ (ບ້ານ​ຈັດ​ສັນ​ໃໝ່) ເມືອງ​ບໍ​ລິ​ຄັນ​ໄຊ ແຊວງ​ບໍ​ລິ​ຄຳ​ໄຊ ໃຫ້​ກຽດ​ເຂົ້າ​ຮ່ວມ​ມີ​ທ່ານ ທອງ​ລອຍ ສີ​ລິ​ວົງ ເຈົ້າແຂວງ​ໄຊ​ສົມບູນ ທ່ານ​ ບຸນ​ມາ ບຸ​ຈະເລີນ ຮອງ​ເຈົ້າແຂວງ​ບໍ​ລິ​ຄຳ​ໄຊ ທ່ານ ທາ​ເຄ​ຊີ ຮິ​ກິ​ຮາ​ຣະ ເອກ​ອັກ​ຄະ​ຣາ​ຊາ​ທູດຢີ່​ປຸ່ນ ປະຈຳ ສປປ ລາວ ພ້ອມ​ດ້ວຍ​ຕາງໜ້າ​ສະຖານທູດ​ໄທ ຫວຽດນາມ ປະຈຳ​ລາວ ກາ​ນຳ​ຈາກ​ກະຊວງ​ກ່ຽວຂ້ອງ ຄະນະ​ນຳ​ເມືອງ ບ້ານ ຕາງໜ້າ​ຜູ້​ຖື​ຮຸ້ນ ຜູ້​ຮັບ​ເໝົາ ແລະ ພາກສ່ວນ​ກ່ຽວຂ້ອງ.

ທ່ານ ໂຢ​ຊິ​ຮີ​ໂຣ ຢາ​ມາ​ບາ​ຢາ​ຊິ ຜູ້ອຳນວຍການ​ບໍລິສັດ ໄຟຟ້າ​ນ້ຳ​ງຽບ 1 ກ່າວ​ວ່າ: ໂຄງການ​ເຂື່ອນ​ໄຟຟ້າ​ນ້ຳ​ງຽບ 1 ໄດ້​ເລີ່ມ​ການ​ກັກ​ເກັບ​ນ້ຳ​ທີ່​ອ່າງເກັບນ້ຳ​ຂອງ​ເຂື່ອນ​ໃຫຍ່ ໃນ​ວັນ​ທີ 15 ພຶດສະພາ 2018 ຜ່ານ​ມາ ໃນ​ອ່າງເກັບນ້ຳ​ຈະ​ບັນລຸ​ໃນ​ເດືອນ​ທັນວາ 2018 ການ​ກັກ​ເກັບ​ນ້ຳ​ໃນ​ເຂື່ອນ​ຄອນ​ກີດ​ອັດ​ແໜ້ນ​ທີ່​ສຸດ​ໃນ​ປະເທດ​ລາວ.

ໂຄງການ​ເຂື່ອນ​ນ້ຳ​ງຽບ 1 ມີ​ຄວາມ​ສູງ 167 ແມັດ ຍາວ 530 ແມັດ ມີ​ກຳລັງ​ຕິດ​ຕັ້ງ 290 ເມ​ກາ​ວັດ ແລະ ປະກອບ​ມີ​ສອງ​ເຂື່ອນ ແລະ ສອງ​ເຮືອນ​ຈັກ​ທີ່​ຕັ້ງ​ຢູ່​ແມ່ນ້ຳ​ງຽບ ຢູ່​ແຂວງ​ບໍ​ລິ​ຄຳ​ໄຊ ນັບ​ແຕ່​ໄດ້​ເລີ່ມ​ຕົ້ນ​ກໍ່ສ້າງ​ມາ ໃນ​ເດືອນ​ສິງຫາ 2014 ປັດຈຸບັນ​ມີ​ຄວາມ​ຄືບ​ໜ້າ​ປະມານ 95%.

ທ່ານ ບຸນ​ມາ ບຸ​ຈະເລີນ ກ່າວ​ວ່າ: ໂຄງການ​ເຂື່ອນ​ໄຟຟ້າ​ນ້ຳ​ງຽບ 1 ແມ່ນ​ໜຶ່ງ​ໃນ​ບັນດາ​ໂຄງການ​ບຸລິມະສິດ​ອັນ​ສຳຄັນ​ຂອງ​ລັດຖະບານ​ລາວ ແລະ ຈະ​ປະກອບສ່ວນ​ອັນ​ໃຫຍ່​ຫຼວງ​ຕໍ່​ການ​ພັດທະນາຂອງ ​ສປປ ລາວ ແລະ ທ່ານ ທາ​ເຄ​ຊີ ຮິ​ກິ​ຮາ​ຣະ ກ່າວ​ວ່າ: ຂ້າພະເຈົ້າ​ເຊື່ອ​ໝັ້ນ​ວ່າ ໂຄ​ການ​ເຂື່ອນ​ນ້ຳ​ງຽບ 1 ຈະ​ຊ່ວຍ​ສ້າງ​ພື້ນຖານ​ທີ່​ເຂັ້ມແຂງ​ສຳລັບ​ການ​ພັດທະນາ​ແບບ​ຍືນ​ຍົງ​ຂອງ ​ສປປ ລາວ ໃນ​ການ​ຫຼຸດຜ່ອນ​ອອກ​ຈາກ​ປະເທດ​ທີ່​ດ້ອຍ​ພັດທະນາ.

ສ່ວນ​ການ​ຍົກຍ້າຍ​ຈັດ​ສັນ​ປະຊາຊົນ​ປະມານ 520 ຄົວ​ເຮືອນ​ ຈາກ​ຈຸດ​ໜຶ່ງ​ໝູ່​ບ້ານ​ໃນ​ເມືອງ​ບໍ​ລິ​ຄັນ ແຂວງ​ບໍ​ລິ​ຄຳ​ໄຊ ແລະ 4 ບ້ານ​ໃນ​ເມືອງ​ຮົ່ມ ແຂວງ​ໄຊ​ສົມບູນ ໄດ້​ສຳເລັດ​ໃນ​ເດືອນເມສາ 2018 ປັດຈຸບັນມີ 75 ຄົວ​ເຮືອນ ທີ່​ຖືກ​ຜົນ​ກະທົບ​ຈາກ​ໂຄງການທີ່​ແຂວງ​ບໍ​ລິ​ຄຳ​ໄຊ ແລະ ແຂວງ​ໄຊ​ສົມບູນ ໄດ້​ຍົກຍ້າຍ​ມາ​ອາໄສ​ໃນ​ບ້ານ​ຈັດ​ສັນພູ​ໂຮມ​ໄຊ ທີ່​ເມືອງ​ບໍ​ລິ​ຄັນ ເຊິ່ງ​ແມ່ນ​ບ້ານ​ທີ່​ຈັນ​ສັນ​ປະກອບ​ດ້ວຍ​ສິ່ງ​ອຳນວຍ​ຄວາມ​ສະດວກ​ຕ່າງໆ ພ້ອມ​ດ້ວຍ​ພື້ນ​ທີ່​ກະສິກຳ ແລະ ລະບົບ​ຊົນລະປະທານ​ທີ່​ໂຄງການ​ເຂື່ອນ​ໄຟຟ້າ​ນ້ຳ​ງຽບ 1 ໄດ້​ພັດທະນາ​ຂຶ້ນ​ເພື່ອ​ຮອງ​ຮັບ​ໃຫ້​ປະຊາຊົນ​ທີ່​ຖືກ​ຜົນ​ກະທົບ​ຈາກ​ໂຄງການ.

ໂຄງການ​ເຂື່ອນ​ໄຟຟ້າ​ນ້ຳ​ງຽບ 1 ກຳລັງ​ດຳເນີນ​ການ​ກໍ່ສ້າງ ແລະ ການ​ບໍລິຫານ​ງານ​ໂດຍ​ບໍລິສັດ ​ໄຟຟ້າ​ນ້ຳ​ງຽບ 1 ຈຳກັດ ທີ່​ປະກອບ​ມີ​ສາຂາ​ຮຸ້ນ​ຄື: ບໍລິສັດ ຄັນ​ໄຊ​ການ​ໄຟຟ້າ ຍີ່ປຸ່ນ ແລະ ການ​ໄຟຟ້າ​ຝ່າຍ​ຜະລິດ​ສາກົນ​ແຫ່ງ​ປະເທດ​ໄທ ແລະ ລັດ​ວິ​ສາ​ຫະ​ກິດ​ຖືກ​ຮຸ້ນ​ລາວ ການ​ຜະລິດ​ໄຟຟ້າ​ຄາດ​ວ່າ​ຈະ​ເລີ່ມ​ຂຶ້ນ​ໃນ​ທ້າຍ​ປີ 2018 ແລະ ປະມານ 95% ຂອງ​ໄຟຟ້າ​ທັງ​ໝົດ​ຈະ​ສົ່ງ​ໃຫ້​ຣາ​ຊາ​ອານາຈັກ​ໄທ ສ່ວນ​ທີ​ເຫຼືອ​ແມ່ນ​ຊົມໃຊ້​ພາຍ​ໃນ​ປະເທດ ເຊິ່ງ​ໂຄງການ​ຄາດ​ວ່າ​ຈະ​ສ້າ​ລາຍ​ຮັບ​ໃຫ້​ແກ່​ລັດຖະບານ​ລາວ​ຫຼາຍ​ກວ່າ 600 ລ້ານ​ໂດ​ລາ​ສະຫະລັດ ຫຼື ປະມານ 4.800 ຕື້​ກີບ ພ້ອມ​ທັງ​ຜົນ​ປະໂຫຍດ​ທາງ​ອ້ອມ​ຈຳນວນ​ໜຶ່ງ​ອີກ​ໃນ​ໄລຍະ​ສຳ​ປະທານ 27 ປີ

ພາບ-ຂ່າວ: ນສພ ວຽງຈັນໃຫ່ມ