ກຸ່ມບໍລິສັດ ຄົມມະນາຄົມ-ຂົນສົ່ງ ນົກຢຸງຄໍາ ຢຸນານ ມອບເງິນພັດທະນາ ແຂວງບໍ່ແກ້ວ 1,3 ຕື້ກວ່າກີບ

0
30

ເມື່ອ​ບໍ່​ດົນ​ມາ​ນີ້, ກຸ່ມບໍລິສັດ ຄົມມະນາຄົມ ແລະ ຂົນສົ່ງ ນົກຢຸງຄໍາ ຢູນນານ ນໍາໂດຍທ່ານ ຕາວັນຢັງ ຮອງຜູ້ຈັດການກຸ່ມບໍລິສັດ ພ້ອມດ້ວຍຄະນະ ຕາງໜ້າກຸ່ມບໍລິສັດ ​ໄດ້​ມອບ​ເງິນຈໍານວນ 1.048.000 ຢວນ (ສະກຸນເງິນຈີນ) ຫລື ປະມານ 1,3 ຕື້​ກວ່າກີບ ໃຫ້ແຂວງບໍ່ແກ້ວ ເພື່ອເປັນການປະກອບສ່ວນ ເຂົ້າໃນການສ້າງສາພັດທະນາແຂວງບໍ່ແກ້ວ ເປັນ ຕົ້ນແມ່ນ ການປຸກສ້າງອາຄານຮຽນ 2 ຊັ້ນ, 6 ຫ້ອງຮຽນ ພ້ອມດ້ວຍໂຕະຕັ່ງ ແລະ ອຸປະກອນອື່ນໆ ໃຫ້ແກ່ໂຮງຮຽນມັດທະຍົມສຶກສາສົມບູນ ທົ່ງແສງຈັນ ເມືອງຫ້ວຍຊາຍ ແຂວງບໍ່ແກ້ວ.

​ໂອກາດ​ນີ້, ທ່ານ ຈອມສີ ລັດຕະນະປັນ ຮອງເຈົ້າແຂວງບໍ່​ແກ້ວ ກໍໄດ້ສະແດງ ຄວາມຍ້ອງຍໍຊົມເຊີຍ ແລະ ຮູ້ບຸນຄຸນອັນລົ້ນເຫລືອ ຕໍ່ກຸ່ມບໍລິສັດ ຄົມມະນາຄົມ ແລະ ຂົນສົ່ງ ນົກຢຸງຄໍາ ຢູນນານ ທີ່ເຫັນໄດ້ຄວາມສໍາຄັນ ໃນການສ້າງສາພັດທະນາແຂວງບໍ່ແກ້ວ ໂດຍສະເພາະ ແມ່ນພາຍໃນຂະແໜງການສຶກສາທິການ ແລະ ກິລາ ແລະ ຫວັງຢ່າງຍິ່ງວ່າ ໂອກາດໜ້າແຂວງບໍ່ແກ້ວ ຈະໄດ້ຮັບການສະໜັບສະໜູນ ແລະ ຊ່ວຍເຫລືອຈາກກຸ່ມ​ບໍລິສັດ​ດັ່ງກ່າວ ຕາມ​ຄວາມ​ເໝາະ​ສົມ.

ຂ່າວໂດຍ: ບຸນຄົງ ວັນນະສິດ