ຊາວໜຸ່ມ ລາວ-ກູບາ ຮັດແໜ້ນການພົວພັນຮ່ວມມືຮອບດ້ານ

0
30

ໂດຍ​ຕອບ​ສະໜອງ​ຕາມ​ການ​ເຊື້ອ​ເຊີນ​ຂອງ​ຄະນະ​ບໍລິຫານ​ງານ ສູນ​ກາງ​ຊາວ​ໜຸ່ມ​ປະຊາຊົນ ປະຕິວັດ​ລາວ ຄະນະ​ບໍລິຫານ​ງານ​ສູນ​ກາງ​ຊາວ​ໜຸ່ມ​ກອມ​ມູ​ນິດ​ກູ​ບາ ນຳ​ໂດຍ​ສະຫາຍນາງ ສູ​ເຊລີ ​ມຣໍ​ຟາ ກົງ​ຊາ​ເຣັສ ກຳມະການ​ພັກ ສະມາຊິກ​ສະພາ ເລຂາ​ໜຶ່ງ ຄະນະ​ບໍລິຫານ​ງານ​ສູນ​ກາງ​ຊາວ​ໜຸ່ມ​ກອມ​ມູ​ນິດ​ກູ​ບາ ພ້ອມ​ດ້ວຍ​ຄະນະ ໄດ້​ເດີນທາງ​ມາ​ເຄື່ອນ​ໄຫວ​ຢ້ຽມຢາມ ​ສປປ ລາວ ຢ່າງ​ເປັນ​ທາງ​ການ​ນັບ​ແຕ່​ວັນ​ທີ 23-24 ພຶດສະພານີ້ ແມ່ນ​ເພື່ອ​ສືບຕໍ່​ເສີມ​ຂະຫຍາຍ​ມູນເຊື້ອ​ຄວາມ​ສາມັກຄີ ສາຍ​ພົວພັນ​ຮ່ວມ​ມື​ຂອງ​ສອງ​ພັກ ສອງ​ລັດ ໂດຍ​ສະເພາະແມ່ນ​ສອງ​ອົງ​ການຈັດຕັ້ງ​ຊາວ​ໜຸ່ມ​ໃຫ້​ແໜ້ນ​ແຟ້ນ​ຍິ່ງໆ​ຂຶ້ນ ໃຫ້​ກຽດ​ຕ້ອນຮັບ​ຂອງສະຫາຍ ອາ​ລຸນ​ໄຊ ສູນ​ນະລາດ ເລຂາ​ຄະນະ​ບໍລິຫານ​ງານສູນ​ກາງ​ຊາວ​ໜຸ່ມ ​ປປລ.

ວັນ​ທີ 24 ພຶດສະພາ 2018 ທີ່ນະຄອນຫຼວງ​ວຽງ​ຈັນ ສູນ​ກາງ​ຊາວ​ໜຸ່ມ ​ປປລ ແລະ ສູນ​ກາງ​ຊາວ​ກອມ​ມູ​ນິດ​ກູ​ບາ ຈັດ​ກອງ​ປະຊຸມ​ພົບ​ປະ​ສອງ​ຝ່າຍ ເຊິ່ງ​ບັນຫາ​ທີ່​ນຳ​ມາ​ແລກປ່ຽນ ແລະ ປຶກສາ​ຫາລື ກ່ຽວ​ກັບ​ສະພາບ​ການ​ພັດທະນາ​ຊາວ​ໜຸ່ມ-ເຍົາວະ​ຊົນ ແລະ ຍຸດ​ທະ​ສາດ​ການ​ພັດທະນາ​ຊາວ​ໜຸ່ມ​ໃນ​ໄລຍະ​ໃໝ່ ຕີ​ລາຄາ​ການຈັດຕັ້ງ​ປະຕິບັດ​ກິດຈະກຳ​ການ​ຮ່ວມ​ມື​ຂອງ​ຄະນະ​ຊາວ​ໜຸ່ມ​ລາວ-ກູ​ບາ ໃນ​ຊຸມ​ປີຜ່ານມາ ວາງ​ແຜນ​ການຈັດຕັ້ງ​ປະຕິບັດ​ການ​ຮ່ວມ​ມື​ໃນຕໍ່ໜ້າ ພ້ອມ​ກັນ​ຊຸກຍູ້​ການ​ຮ່ວມ​ມື​ໃນ​ບັນດາ​ຂະແໜງ​ທີ່​ມີ​ທ່າແຮງ ສະໜັບສະໜູນ​ເຊິ່ງ​ກັນ ແລະ ກັນ ໃນ​ເວທີ​ຫຼາຍ​ຝ່າຍ ໂດຍ​ສະເພາະ ໃນ​ຂົງເຂດ​ວຽກ​ງານ​ຊາວ​ໜຸ່ມ​ປະຊາທິປະໄຕ​ໂລກ ການ​ສະໜັບສະໜູນ​ໃຫ້​ສອງ​ຝ່າຍ ໃຫ້​ມີ​ການ​ໄປມາຫາສູ່​ກັນ​ຫຼາຍ​ຂຶ້ນ ໃນ​ໂອກາດ​ນີ້​ ຄະນະ​ຊາວ​ໜຸ່ມ​ສອງຝ່າຍ​ແມ່ນ​ໄດ້​ລົງ​ນາມ​ບົດ​ບັນທຶກ​ການ​ຮ່ວມ​ມື​ສະບັບ​ໃໝ່ ​ເຊິ່ງ​ກຳນົດ 5 ປີ ໃນ​ໄລຍະ 2018-2023.