ຈໍາປາສັກເປີດການແຂ່ງຂັນສິລະປະ ແລະ ແຕ່ງກາບກອນຂອງຊາວໜຸ່ມ-ເຍົາວະຊົນ

0
2

ວັນທີ 11 ພຶດສະພາ 2018, ຄະນະບໍລິຫານງານຊາວໜຸ່ມປະຊາຊົນ ປະຕິວັດລາວ ແຂວງຈໍາປາສັກ ໄດ້ເປີດການແຂ່ງຂັນສິລະປະ ແລະ ແຕ່ງກາບກອນ ຂອງຊາວໜຸ່ມ-ເຍົາວະຊົນທົ່ວແຂວງ. ພິທີເປີດງານດັ່ງກ່າວ ຈັດຂຶ້ນຢູ່ຫໍວັດທະນະທໍາບັນດາເຜົ່າ ຈໍາປາສັກ ຫຼັກ 7 ເມືອງປາກເຊ ໂດຍການເຂົ້າຮ່ວມຂອງທ່ານ ປອ.ບຸນຖອງ ດີວິໄຊ ກໍາມະການສູນກາງພັກ ເລຂາພັກແຂວງ ເຈົ້າແຂວງໆຈໍາປາສັກ. ມີບັນດາທ່ານໃນຄະນະປະຈໍາພັກແຂວງ, ກໍາມະການພັກແຂວງ, ຫົວໜ້າພະແນກການກົມກອງອ້ອມຂ້າງແຂວງ, ເລຂາພັກເມືອງ, ເຈົ້າເມືອງ 10 ເມືອງ, ການນໍາຈາກສະຖາບັນການສຶກສາຕ່າງໆພາຍໃນແຂວງ, ຄະນະ ແລະ ສະມາຊິກຊາວໜຸ່ມຈາກຮາກຖານຊາວໜຸ່ມຕ່າງໆພາຍໃນແຂວງເຂົ້າຮ່ວມ.


ໃນພິທີ ທ່ານ ອຸດົມສັກ ດີວິໄຊ ກໍາມະການພັກແຂວງ ເລຂາຄະນະບໍລິຫານງານຊາວໜຸ່ມປະຊາຊົນ ປະຕິວັດລາວ ປະຈໍາແຂວງຕາງໜ້າຄະນະຮັບຜິດຊອບຈັດງານ ໄດ້ຂຶ້ນຜ່ານບົດລາຍງານການກະກຽມເປີດງານ, ເນື້ອໃນບາງຕອນ ທ່ານ ກ່າວວ່າ: ໃນງານຄັ້ງນີ້ ມີກິດຈະກໍາແຂ່ງຂັນສິລະປະ, ເສັງເພງ ແລະ ກິດຈະກໍາແຂ່ງຂັນແຕ່ງກາບກອນຂອງຊາວໜຸ່ມ-ເຍົາວະຊົນທົ່ວແຂວງ ເພື່ອຊິງລາງວັນເງິນສົດຂອງທ່ານເຈົ້າແຂວງໆຈໍາປາສັກ ທັງເປັນການຕ້ານ ແລະ ສະກັດກັ້ນປາກົດການຫຍໍ້ທໍ້ຕ່າງໆທີ່ເກີດຂຶ້ນໃນຖັນແຖວຊາວໜຸ່ມ-ເຍົາວະຊົນ, ຊຸກຍູ້ສົ່ງເສີມໃຫ້ຊາວໜຸ່ມ-ເຍົາວະຊົນ ມີຄວາມສົນໃຈ ແລະ ຮັກສາວັດທະນະທໍາ ແລະ ຮີດຄອງປະເພນີອັນດີງານຂອງຊາດ, ທ້ອງຖິ່ນ ທັງຊອກໃຫ້ເຫັນບຸດຄົນດີເດັ່ນ, ກົມກອງດີເດັ່ນຫ້າວຫັນ ເພື່ອສ້າງເປັນຜູ້ສືບທອດທີ່ດີຂອງພັກ ແລະ ຂອງຊາດ. ການແຂ່ງຂັນຮອບຄັດເລືອກຈະດໍາເນີນໄປຮອດວັນທີ 25 ພຶດສະພາ 2018 ແລະ ຈະຈັດການແຂ່ງຂັນຊິງຊະນະເລີດ ໃນວັນທີ 30 ພຶດສະພາ 2018.


ທ່ານ ອຸດົມສັກ ດີວິໄຊ ກ່າວຕໍ່ອີກວ່າ: ນອກຈາກກິດຈະກໍາແຂ່ງຂັນສິລະປະ ຮ້ອງເພງ ແລະ ແຂ່ງຂັນແຕ່ງກາບກອນແລ້ວກໍ່ຍັງຈະໄດ້ຈັດຄາລະວານຂັບຂີ່ປອດໄພຕາມທ້ອງຖະໜົນຂອງຊາວໜຸ່ມທົ່ວແຂວງ ເຊິ່ງຈະຈັດຂຶ້ນໃນຕອນເຊົ້າວັນທີ 30 ພຶດສະພາ 2018, ຈຸດເລີ່ມຂອງຄາລະວານ ແມ່ນສະໜາມກິລາຫຼັກ 2 ແລ້ວຂີ່ເປັນຂະບວນໄປຮອດຫຼັກ 9 ເໜືອ ແລ້ວກັບມາຫຼັກ 9 ໃຕ້ ແລະ ມາຊິ້ນສຸດຢູ່ສະໜາມກິລາຫຼັກ 2 ຄືເກົ່າ. ຊາວໜຸ່ມທີ່ເຂົ້າຮ່ວແຂ່ງຂັນ ຈະໄດ້ຮັບເສື້ອຍືດ 1 ຜືນ ພ້ອມບັດປ່ຽນຖ່າຍນໍ້າມັນເຄື່ອງ ໂດຍບໍ່ເສຍຄ່າ 1 ຊຸດ ຈາກບໍລິສັດ ຮອນດາ ປາກເຊ. ຈຸດປະສົງກໍ່ເພື່ອສ້າງຜົນງານ, ສ້າງຂະບວນການຂໍ່ານັບຮັບຕ້ອນ ງານປະກາດເມືອງປາກເຊ ເປັນນະຄອນປາກເຊ ທີ່ຈະຈັດຂຶ້ນໃນວັນທີ 31 ພຶດສະພາ 2018 ນີ້ ໃຫ້ມີບັນຍາກາດຟົດຟື້ນ ແລະ ມີເນື້ອໃນຄວາມໝາຍເລິກເຊິ່ງ.


ຂ່າວ-ພາບ: ທູນທອງໃຈ -ໜັງສືພິມຈຳປາໃໝ່