ທ່ານ ນາຍົກລັດຖະມົນຕີ ເຂົ້າຮ່ວມພິທີສະເຫຼີມສະຫຼອງ ວັນສ້າງຕັ້ງສໍານັກຂ່າວສານປະເທດລາວ ຄົບຮອບ 50 ປີ

0
11

ພິທີສະເຫຼີມສະຫຼອງວັນສ້າງຕັ້ງ ສໍານັກຂ່າວສານປະເທດລາວ ຄົບຮອບ 50 ປີ (06/01/1968-06/01/2018) ໄດ້ຈັດຂຶ້ນໃນວັນທີ 09 ພຶດສະພາ 2018 ຜ່ານມາ ຢູ່ທີ່ສໍານັກຂ່າວສານປະເທດລາວ, ໂດຍການໃຫ້ກຽດເຂົ້າຮ່ວມຂອງ ທ່ານ ທອງລຸນ ສີສຸລິດ ນາຍົກລັດຖະມົນຕີ ແຫ່ງ ສປປ ລາວ, ມີບັນດາທ່ານລັດຖະມົນຕີ, ຮອງລັດຖະມົນຕີ, ບັນດາສື່ມ່ວນຊົນ ທັງພາກລັດ ແລະ ເອກະຊົນ ພ້ອມດ້ວຍແຂກທີ່ຖືກເຊີນ ແລະ ພະນັກງານທີ່ກ່ຽວຂ້ອງເຂົ້າຮ່ວມ.

ໃນພິທີ, ທ່ານ ສູນທອນ ຄັນທະວົງ ຜູ້ອໍານວຍການໃຫຍ່ສໍານັກງານຂ່າວສານປະເທດລາວ ໄດ້ລາຍງານໃຫ້ຊາບ ແລະ ຍົກໃຫ້ເຫັນມູນເຊື້ອແຫ່ງການເຕີບໃຫຍ່ຂະຫຍາຍຕົວຂອງສໍານັກຂ່າວສານປະເທດລາວ ຕະຫຼອດ 50 ປີ ທີ່ຜ່ານມາ ໂດຍຕິດພັນຢ່າງສະໜິດແໜ້ນກັບພາລະກິດການປະຕິວັດໃນແຕ່ລະໄລຍະ, ມູນເຊື້ອແຫ່ງການຕໍ່ສູ້ກູ້ຊາດອັນເດັດດ່ຽວ ແລະ ບຸກບືນຜ່ານຜ່າຄວາມຫຍຸ້ງຍາກນາໆປະການ ຂອງປະຊາຊົນລາວບັນດາເຜົ່າ ພາຍໃຕ້ການນໍາຂອງພັກປະຊາຊົນປະຕິວັດລາວ.

ພາຍຫຼັງປະເທດຊາດໄດ້ຮັບການປົດປ່ອຍ ໂຄງປະກອບການຈັດຕັ້ງຂອງສໍານັກຂ່າວສານປະ ເທດລາວ ໄດ້ມີການປ່ຽນແປງ ແລະ ມີການປັບປຸງໃນຫຼາຍດ້ານແບບກ້າວກະໂດດ, ຈໍານວນພະນັກງານ ມີຈໍານວນເພີ່ມຂຶ້ນທາງດ້ານປະລິດມານ ແລະ ຄຸນນະພາບ. ພ້ອມດຽວກັນນັ້ນ, ກໍ່ໄດ້ມີການສືບຕໍ່ພິມໃບຂ່າວເປັນລາຍວັນ, ໃບຂ່າວຄົ້ນຄວ້າ ທັງເປັນພາສາລາວ ແລະ ພາສາຕ່າງປະເທດ, ເຊິ່ງນັບແຕ່ປີ 2011 ເປັນຕົ້ນມາ ສໍານັກຂ່າວສານປະເທດລາວ ໄດ້ເພີ່ມຜະລິດຕະພັນ ຈັດພິມໜັງສືພິມປະເທດລາວ ແລະ ສືບຕໍ່ປະກອບສ່ວນຢ່າງຕັ້ງໜ້າ ເຂົ້າໃນວຽກງານໂຄສະນາເຜີຍແຜ່ແນວທາງນະໂຍບາຍຂອງພັກ-ລັດ ຢ່າງຕັ້ງໜ້າ ຕາມພາລະບົດບາດ ແລະ ໜ້າທີ່ຂອງຕົນ ຢູ່ໃນເງື່ອນໄຂພາຍໃນ ແລະ ສາກົນ ພວມຜັນແປໄປຢ່າງສະຫຼັບສັບຊ້ອນ ມີທັງກາລະໂອກາດ ແລະ ສິ່ງທ້າທາຍຫຼາຍຢ່າງ ອັນໄດ້ເຮັດໃຫ້ ສຳນັກຂ່າວສານປະເທດລາວ ໄດ້ມີການຍົກສູງຄຸນນະພາບ ແລະ ໄດ້ຮັບການພັດທະນາຕະຫຼອດມາ.

ໂອກາດເຂົ້າຮ່ວມໃນພິທີໃນຄັ້ງນີ້, ທ່ານນາຍົກລັດຖະມົນຕີ ໄດ້ສະແດງຄວາມຍ້ອງຍໍຊົມເຊີຍ ຕໍ່ຜົນງານ ແລະ ໝາກຜົນຂອງການຈັດຕັ້ງປະຕິບັດວຽກງານ ຂອງສຳນັກຂ່າວສານປະເທດລາວ ຕະຫຼອດໄລຍະ 50 ປີ ທີ່ຜ່ານມາ, ອັນເປັນການປະກອບສ່ວນສໍາຄັນ ເຂົ້າໃນການປຸກລະດົມນໍ້າໃຈຮັກຊາດ, ໂຄສະນາເຜີຍແຜ່ແນວທາງນະໂຍບາຍຂອງພັກ, ລັດ ໃຫ້ສັງຄົມໄດ້ຮັບຮູ້ ແລະ ເຂົ້າໃຈຢ່າງຖືກຕ້ອງ. ພ້ອມດຽວກັນນີ້, ທ່ານຍັງໄດ້ເນັ້ນໜັກໃຫ້ສໍານັກຂ່າວສານປະເທດລາວ ສືບຕໍ່ເສີມຂະຫຍາຍມູນເຊື້ອ ແລະ ເອົາໃຈໃສ່ໃນບາງດ້ານ ຄື: ບັນດາສື່ມວນຊົນລາວ ທັງພາກລັດ ແລະ ເອກະຊົນ ຕ້ອງຄໍານຶງ ແລະ ຢຶດຖືເອົາ ສອງລັກສະນະ ຄື:

ລັກສະນະຕໍ່ສູ້ ແລະ ລັກສະນະສຶກສາອົບຮົມ ໃຫ້ຄວາມຮູ້ຄວາມເຂົ້າໃຈທີ່ຖືກຕ້ອງ ໃຫ້ແກ່ຜູ້ບໍລິໂພກຂ່າວ ໂດຍຕິດພັນກັບການປະຕິບັດ 03 ຫຼັກການ ຄື: ຫຼັກການວິທະຍາສາດ; ທັນການ, ທັນຍຸກ ແລະ ທັນສະໄໝ; ຕ້ອງມີວິທີວິທະຍາ, ຫຼາຍຮູບແບບຫຼາຍສີສັນ, ມີສິນລະປະ ເພື່ອໃຫ້ຜູ້ບໍລິໂພກຂ່າວ ມີຄວາມປະທັບໃຈ ແລະ ໃຫ້ຄວາມສົນໃຈຕິດຕາມ. ພ້ອມດຽວກັນນັ້ນ, ທ່ານນາຍົກລັດຖະມົນຕີ ຍັງໄດ້ຮຽກຮ້ອງມາຍັງສຳນັກຂ່າວສານປະເທດລາວ ເອົາໃຈໃສ່ປັບປຸງຄຸນນະພາບ, ການອອກຂ່າວ ມີຄວາມໜັກແໜ້ນ, ທັນຕາມສະພາບການ; ສ້າງໃຫ້ຖັນແຖວພະນັກງານຂ່າວ ມີຄວາມຮູ້, ຄວາມສາມາດ ແລະ ມີຄວາມບຸກບືນໃນການຈັດຕັ້ງປະຕິບັດໜ້າທີ່ວຽກງານຂອງຕົນ ກາຍເປັນກະບອກສຽງອັນແຫຼມຄົມສໍາຄັນຂອງພັກ-ລັດ. ນອກນັ້ນ, ກໍ່ໃຫ້ເອົາໃຈໃສ່ໃນການຍົກລະດັບຄວາມຮູ້ຄວາມສາມາດ ໃນດ້ານພາສາຕ່າງປະເທດ, ສໍາຄັນແມ່ນໃຫ້ມີການພົວພັນຮ່ວມມື ກັບບັນດາປະເທດເພື່ອນມິດຍຸດທະສາດ, ປະເທດສະມາຊິກອາຊຽນ ທັງໃນພາກພື້ນ ແລະ ໃນໂລກ ທັງນີ້ກໍ່ເພື່ອຍາດແຍ່ງເອົາການຮ່ວມມື, ການສະໜັບສະໜູນຊ່ວຍເຫຼືອ ແລະ ການແລກປ່ຽນຂໍ້ມູນຂ່າວສານເຊິ່ງກັນ ແລະ ກັນ ໃຫ້ຫຼາຍຂຶ້ນ.