ໂຄງການກໍ່ສ້າງຊົນລະປະທານຫ້ວຍອາໃກ້ ເມືອງພີນ ແຂວງສະຫວັນນະເຂດ ສຳເລັດແລ້ວ 50%

0
7

ທ່ານ ຄຳຕັນ ແດນສະຫວັນ ຫົວໜ້າວິສາວະກອນທີ່ປຶກສາໂຄງການກໍ່ສ້າງຊົນລະປະທານຫ້ວຍອາໃກ້ເປີດເຜີຍວ່າ: ການກໍ່ສ້າງຊົນລະປະທານຫ້ວຍອາໃກ້ ເມືອງພີນ ແຂວງສະຫວັນນະເຂດ ແມ່ນໄດ້ດຳເນີນເປັນຂັ້ນເປັນຕອນ; ມາຮອດປະຈຸບັນ ໂຄງການດັ່ງກ່າວແມ່ນສຳເລັດແລ້ວ 56% ຂອງໂຄງການ ຊຶ່ງແມ່ນບໍລິສັດພົງຊັບທະວີກໍ່ສ້າງຂົວທາງ ແລະຊົນລະປະທານ ເປັນຜູ້ຮັບເໝົາ ທີ່ໄດ້ລົງມືກໍ່ສ້າງແຕ່ຕົ້ນປີ2013ເປັນຕົ້ນມາ.

ຊຶ່ງໂຄງການດັ່ງກ່າວປະກອບມີ: ການກໍ່ສ້າງຕົວເຂື່ອນດ້ວຍດິນຖົມແມ່ນສຳລັດແລ້ວ 100%, ການກໍ່ສ້າງຄອງເໝືອງ ແລະລະບົບຫົວງານແມ່ນສຳເລັດ 85%, ການກໍ່ສ້າງຄອງເໝືອງແມ່ ທີ່ເຮັດດ້ວຍເບຕົງ ແລະຄອງເໝືອງຊອຍ ທີ່ກໍ່ດ້ວຍດິນຈີ່ ທີ່ມີຄວາມຍາວ 30.000 ກວ່າແມັດ ແມ່ນສຳເລັດແລ້ວ 35%, ການຈັດສັນບ້ານໃໝ່ ໃຫ້ປະຊາຊົນທີ່ຖືກຜົນກະທົບຈາກໂຄງການມີຈໍານວນ 106 ຫລັງ, ປະຕິບັດໄດ້ 75 ຫລັງ, ການບຸກເບີກເນື້ອທີ່ນາທົດແທນທີ່ເກີດຈາກນໍ້າຖ້ວມຂອງໂຄງການໄດ້ 75 ເຮັກຕາ ແລະການກໍ່ສ້າງເສັ້ນທາງເຂົ້າໝູ່ບ້ານປະຊາຊົນ ທີ່ໄດ້ຮັບການຈັດສັນຄືນໃໝ່ປະຕິບັດໄດ້ 50% ເຊິ່ງຖ້າຫາກສ້າງສຳເລັດໂຄງການນີ້ ຕົກເປັນມູນຄ່າທັງໝົດເກືອບ 200 ຕື້ກີບ.

ສຳລັບການກໍ່ສ້າງຕົວເຂື່ອນທີ່ເກັບກັກນໍ້າດ້ວຍດິນຖົມ ແມ່ນສຳເລັດແລ້ວໂດຍພື້ນຖານ ຊຶ່ງຕົວເຂື່ອນມີຂະ ໜາດ 1.300 ແມັດ, ລວງສູງຂອງຕົວເຂື່ອນມີຂະໜາດ 21 ແມັດ, ຫລັງເຂື່ອນກວ້າງ 6,50 ແມັດ, ສາມາດເກັບກັກນໍ້າໄດ້ທັງໝົດ 21 ລ້ານກວ່າແມັດກ້ອນ, ສ່ວນການກໍ່ສ້າງຄອງເໝືອງແມ່ ແລະຄອງເໝືອງຊອຍຂະໜາດຕ່າງໆ ກໍ່ໄດ້ດຳເນີນການຢ່າງເຄັ່ງຮ້ອນ ຊຶ່ງປະຈຸບັນນີ້ ໂຄງການດັ່ງກ່າວແມ່ນເລີ່ມກັກເກັບນໍ້າ ເພື່ອສະໜອງໃຫ້ແກ່ການຜະລິດຂອງພໍ່ແມ່ປະຊາຊົນເມືອງພີນແລ້ວ ໂດຍຕາມບົດວິພາກເສດຖະກິດຖ້າຫາກໂຄງການສຳເລັດແມ່ນຈະສະໜອງນໍ້າໃຫ້ແກ່ການຜະລິດເປັນຕົ້ນແມ່ນຕ້ານແລ້ງໃນນາປີໄດ້ຈຳນວນ 1.200 ເຮັກຕາ ແລະເຮັດນາແຊງ ຈຳນວນ 700 ເຮັກຕາ. ຈາກນີ້ກໍ່ມີພືດຜັກຕ່າງໆຈຳນວນຫລວງຫລາຍ.

ທ່ານ ຄຳຕັນ ແດນສະຫວັນ ກ່າວຕື່ມວ່າ: ໂຄງການນີ້ແມ່ນຈະໃຫ້ສຳເລັດຢ່າງສົມບູນໃນປີ 2019 ຊຶ່ງວ່າເປັນໂຄງການທີ່ໃຫຍ່ໃຊ້ທຶນມະຫາສານ ຈາກການຕີລາຄາປະກົດວ່າ: ການກໍ່ສ້າງມີຄວາມຫລ້າຊ້າ ທັງນີ້ກໍ່ຍ້ອນວ່າການຕອບສະໜອງງົບປະມານຈາກພາກລັດບໍ່ທ່ວງທັນກັບການລົງທຶນກ່ອນ ສະນັ້ນ, ມັນຈຶ່ງເປັນສາເຫດໜຶ່ງ ທີ່ເຮັດໃຫ້ໂຄງການຖືກຢຸດສະງັກເປັນປີ ແຕ່ເຖິງຢ່າງໃດກໍ່ຕາມ ທາງບໍລິສັດຈະພະຍາຍາມສູ້ຊົນໃຫ້ການກໍ່ສ້າງສຳເລັດຕາມແຜນການເພື່ອເຮັດແນວໃດໃຫ້ປະຊາຊົນໄດ້ນຳໃຊ້ນໍ້າເຂົ້າໃນການຜະລິດໃນຊ່ວງລະດູແລ້ງ.

ພາບ-ຂ່າວ: ນສພ ເສດຖະກິດ-ການຄ້າ