ນະຄອນຫລວງ​ວຽງຈັນ ເຕືອນໂຮງງານຂ້າສັດຫລາຍແຫ່ງປັບປຸງ ມາດຕະຖານ ຫາກຝ່າຝືນອາດຖືກປິດທັນທີ

0
18

ພະ​ແນ​ກອຸດສາຫະກຳ ​ແລະ ການ​ຄ້າ ນະຄອນຫລວງ​ວຽງຈັນ, ​ໄດ້​ມີ​ການ​ດຳ​ເນີນ​ກອງ​ປະຊຸມ​ປຶກສາຫາລືຂຶ້ນ ໃນ​ວັນ​ທີ 10 ພຶດສະພາ 2018 ​ເພື່ອ​ກະກຽມດຳ​ເນີນດັດສົມ ບັນດາ​ໂຮງງານ​ຂ້າ​ສັດ ​ແລະ ບ່ອນ​ຂ້າ​ສັດ​ຍ່ອຍ​, ພາຍຫລັງ​​ໄດ້​ລົງ​ກວດກາ​ພົບວ່າ​ ມີ​ໂຮງງານ​ຂ້າ​ສັດ​ຫລາຍ​ແຫ່ງ​ ບໍ່ມີ​ຄຸນ​ນະພາ​ບ ​ແລະ ບໍ່​ໄດ້ມາດຕະຖານ, ທັງບໍ່​ຮັບປະກັນ​ສຸ​ຂະ​ນາ​ໄມ, ​ເຊິ່ງ​ເປັນ​ອັນຕະລາຍ​ແກ່​ຜູ້​ບໍລິ​ໂພ​ກ. ຢ່າງ​ໃດ​ກໍ​ຕາມ ​ເຈົ້າໜ້າທີ່​ ໄດ້ມີ​ການ​ ແນະນຳ​ໃຫ້​ບັນດາ​ໂຮງງານ​ດັ່ງກ່າວ​ ປັບປຸງ​ມາດຕະຖານ​ໃຫ້​ດີ​ຂຶ້ນ, ໂດຍ​ໃຫ້​ເວລາ 3 ​ເດືອນ, ຖ້າຫາກ​ຍັງ​ຝ່າຝືນ ​ແມ່ນ​ຈະ​ຖືກສັ່ງ​ປິດ​ທັນທີ, ​ໂດຍອີງ​ຕາມ​ຄຳ​ສັ່ງ​ເຈົ້າ​ຄອງ​ນະຄອນຫລວງ​ວຽງຈັນ.

ທ່ານ ນາງ ວັນ​ມະນີ ພິມ​ມະ​ສານ ຮອງ​ຫົວ​ໜ້າ ພະ​ແນ​ກອຸດສາຫະກຳ ​ແລະ ການ​ຄ້າ ນະຄອນ ຫລວງ​ວຽງຈັນ, ​ເປີດ​ເຜີຍ​ຕໍ່ກອງ​ປະຊຸມ​ວ່າ: ປັດຈຸບັນ ​ທົ່ວ​ນະ​ຄອນ​ຫລວງ​ວຽງ​ຈັນ ມີ​ໂຮງງານ​ຂ້າ​ສັດ ​ແລະ ບ່ອນ​ຂ້າ​ສັດ​ຍ່ອຍ ທີ່​ໄດ້​ຮັບ​ອະນຸຍາດ ດຳ​ເນີນ​ກິດຈະການ​ທັງ​ໝົດ​ 28 ​​ແຫ່ງ, ອັດຕາ​ການ​ຂ້າ​ສັດ​ຕໍ່​ວັນ​ສະ​ເລັ່ຍ ໝູ 560 ​ໂຕ, ງົວ, ຄວາຍ 58 ​ໂຕ. ​ໃນ​ນີ້, ມີ​ໂຮງງານຕັ້ງ​ຢູ່ ​ເມືອງ​ຈັນທະ​ບູລີ 1 ​​ແຫ່ງ, ສີ​ໂຄດ​ຕະບອງ 3 ​ແຫ່ງ, ​ໄຊ​ເສດ​ດຖາ 1 ​ແຫ່ງ, ນາ​ຊາຍ​ທອງ 3 ​ແຫ່ງ, ​ໄຊ​ທານີ 8 ​ແຫ່ງ, ຫາດ​ຊາຍ​ຟອງ, ​ເມືອງສັງ​ທອງ ​ແລະ ​ເມືອງປາກງື່ມ ​ເມືອງ​ລະ 4 ​ແຫ່ງ. ຜ່ານ​ການ​ລົງ​ຕິດຕາມ​ກວດກາ​​ ເຫັນ​ວ່າ ການ​ດຳ​ເນີນ​ກິດຈະການ​ໂຮງຂ້າ​ສັດ ​ແລະ ບ່ອນ​ຂາຍ​ສັດ​ຍ່ອຍ​ ຈຳນວນ 13 ​​ແຫ່ງ ແມ່ນ​ບໍ່​ໄດ້​ຕາມ​ມາດຕະຖານ​ໂຮງງານ​ຂ້າ​ສັດ ​ ​ແລະ ຂໍ້ຕົກລົງ ​ຂອງ​ທ່ານເຈົ້າ​ຄອງນະຄອນຫລວງ ເຊັ່ນ: ມາດຕະຖານ​ດ້ານ​ອາຄານ​ໂຮ​ງງານ, ເຄື່ອງ​ຈັກ, ມາດຕະຖານ​ດ້ານ​ຄວາມ​ປອດ​ໄພ ສຸຂະ​ອະນາ​ໄມ​ໂຮງງານ​ ບໍ່​ມີ​ຫ້ອງການ, ບໍ່ມີ​ບ່ອນ​ພັກ​ສັດ, ​ເປັນ​ອາຄານ​ເປີດ ການຈັດ​ສັນ​ພື້ນ​ທີ່​ບໍ່​ເປັນ​ລະບຽບ, ບໍ່ຮັບປະກັນຄວາມ​ສະອາດ, ບໍ່​ມີ​ສາງ​ເຢັນ, ພາ​ຊະນະ​ບັນຈຸ​ຊີ້​ນບໍ່​ໄດ້​ມາດຕະຖານ, ບໍ່​ມີ​ເຄື່ອງ​ຍົກ​ນ້ຳໜັກ​ເພື່ອ​ຍົກ​ຊາກ​ສັດ ​ແລະ ບໍ່​ມີ​ໝາກລ໋ອກສະຫວັນ​ ເພື່ອ​ລຳລຽງ​ຊາກ​ສັດ ​ໄປ​ຕາມ​ຂັ້ນ​ຕອນ​ການ​ຜະລິດ. ພ້ອມ​ນັ້ນ, ຍັງບໍ່​ມີ​ລະບົບ​ເຕືອນ​ໄພ, ບໍ່​ມີ​ລະບົບ​ປ້ອງ​ກັນອັນຕະລາຍ​ ຈາກ​ເຄື່ອງ​ຈັກ, ອຸປະກອນ​ປ້ອງ​ກັນ​ຝຸ່ນ, ກິ່ນ ​ແລະ ຕູ້​ຢາ​ສຸກ​ເສີນ​ປະຈຳ​ໂຮງງານ.

ຮອງ​ຫົວ​ໜ້າ ພະ​ແນ​ກອຸດສາຫະກຳ ​ແລະ ການ​ຄ້າ ກ່າວ​ຕື່ມ​ວ່າ: ການ​ປັບປຸງບັນດາ​ໂຮງງານ​ຂ້າ​ສັດ ​ແລະ ບ່ອນ​ຂ້າ​ສັດ​ຍ່ອຍ ​ເພື່ອຫັນ​ສູ່​ການ​ບໍລິການ ມີ​ການ​ພັດທະນາ​ໄປ​ສູ່​ຄຸນນະພາບ​ ​​ແລະ ​ເຮັດ​ໃຫ້​ພາກ​ສ່ວນທຸລະ​ກິດ​ເຂົ້າ​ໃຈ​ ນະ​ໂຍບາຍ ​ແລະ ທິດ​ທາງ​ຂອງ​ລັດຖະບານ ​​ໂດຍສະ​ເພາະ​ແມ່ນ​ວິ​ໃສ​ທັດ​ ຂອງ​ນະ​ຄອນ​ຫລວງ​ວຽງຈັນ, ພ້ອມ​ທັງ​ ເປັນ​ການ​ຍົກ​ລະດັບ​ຄວາມ​ຮູ້, ຄວາມ​ສາມາ​ດ ​ແລະ ​ເຕັກ​ນິກ​​ໃນ​ການ​ຜະລິດ​ໃຫ້​ແກ່​ຜູ້​ປະກອບ​ການ ​ໃຫ້​ຖືກຕ້ອງ​ຕາມ​ຫລັກ​ສຸຂະ​ອະນາ​ໄມ ຮັບປະກັນ​ໄດ້​ຄວາມ​ສະອາດ​ຕໍ່​ຜູ້​ບໍລິ​ໂພ​ກ.

ທີ່ມາ: ຂປລ