ເຊັນສັນຍາ ໂຄງການກໍ່ສ້າງໂຮງຮຽນ ມສ ເຂດພູນ ເມືອງວຽງໄຊ

0
85

ທ້າຍ ເດືອນເມສາ 2018 ຜ່ານມາ, ພະແນກສຶກສາທິການ ແລະ ກິລາ ແຂວງຫົວພັນໄດ້ຈັດພິທີເຊັນສັນຍາ ໂຄງການກໍ່ສ້າງໂຮງຮຽນ ມັດທະຍົມສົມ ບູນເຂດພູນ ເມືອງວຽງໄຊ ລະຫວ່າງ ທ່ານ ດຣ ກິໂດ ແຄບເປີລີ ກົງສູນກິຕິມະສັກ ສປປ ລາວ ປະຈຳ ປະເທດສະວິດເຊີແລນ, ທ່ານ ດວງມະນີ ຍອດສີອຸດົມ ຫ້ອງການຊາຍແດນຊາດກະຊວງ ການຕ່າງປະເທດ ແລະ ທ່ານ ອານຸໄຊ ຜູ້ຕ່າງໜ້າບໍລິສັດ ແສງທອງກໍ່ສ້າງ ໂດຍມີ ທ່ານ ວັນໄຊ ແພງຊຸມມາ ເຈົ້າແຂວງ ຫົວພັນ, ທ່ານ ມົນທອງ ລຽນຕິຄຸນ ຫົວໜ້າພະແນກ ສຶກສາທິການ ແລະ ກິລາແຂວງ ແລະ ພາກສ່ວນກ່ຽວຂ້ອງຂັ້ນແຂວງ ເຂົ້າຮ່ວມ.

ໂຄງການກໍ່ສ້າງດັ່ງກ່າວ ປະກອບ​ມີ ອາຄານ 2 ຫລັງຄື: ຫລັງທີ 1 ປະກອບມີ 3 ຫ້ອງຮຽນ ແລະ 1 ຫ້ອງການຄູ, ຫລັງທີ 2 ປະກອບມີ 3 ຫ້ອງຮຽນ, 1 ຫ້ອງທົດລອງ, 1 ຫ້ອງຄອມພີວເຕີ ແລະ 1 ຫ້ອງສະໝຸດ, ທັງສອງຫລັງ ມີຂະໜາດ 47X9 ແມັດ ແລະ ກໍ່ສ້າງຫໍພັກນັກຮຽນ 1 ຫລັງຂະໜາດ 28X6,5 ແມັດ, ຈະໄດ້ເລີ່ມລົງມືກໍ່ສ້າງ ນັບແຕ່ວັນທີ 1 ມິຖຸນາ 2018 ຫາ 1 ມິຖຸນາ 2019 ໃຫ້ສຳເລັດ ລວມມູນຄ່າ ການກໍ່ສ້າງທັງໝົດ 326.000 ໂດລາສະຫະລັດ, ໂດຍແມ່ນທຶນຊ່ວຍເຫລືອລ້າ ຈາກທ່ານ ດຣ ກິໂດ ແຄບເປີລີ ກົງສູນກິຕິມະສັກ ສປປ ລາວ ປະຈຳປະເທດສະວິດເຊີແລນ.

ທີ່ມາ ສຳນັກຂ່າວສານປະເທດລາວ