ຄຳມ່ວນ ໃຫ້ເອກະຊົນ ລົງທຶນກໍ່ສ້າງຕຶກ 3 ຊັ້ນ 40 ຫ້ອງນອນ ຢູ່ໂຮງໝໍແຂວງ

0
16

ທ້າຍ​ອາທິດ​ຜ່ານ​ມາ ​ໄດ້​ມີພິທີ ເຊັນສັນຍາ ວ່າດ້ວຍ ການສໍາປະທານເນື້ອທີ່ດິນ ເພື່ອລົງທຶນ ກໍ່ສ້າງຕຶກ 3 ຊັ້ນ 40 ຫ້ອງນອນ, ຫ້ອງອອກກໍາລັງກາຍ ແລະ ຮ້ານມິນິມາກ ຢູ່ຂອບເຂດໂຮງໝໍ ແຂວງຄໍາມ່ວນ, ບ້ານເລົ່າໂພໄຊ, ເມືອງທ່າແຂກ ​ໂດຍ​ການ ​ຮ່ວມ​ລົງ​ນາມ ລະຫວ່າງ ຝ່າຍຜູ້ລົງທຶນ ແມ່ນທ່ານ ພົງສະຫວັນ ໄຊຍະແສງ ຜູ້ອໍານວຍການບໍລິສັດ ຈະເລີນພັດທະນາ ກໍ່ສ້າງຂົວທາງ ແລະ ຊົນລະປະທານຈໍາກັດຜູ້ດຽວ ແລະ ຝ່າຍລັດ ຕາງໜ້າ ໂດຍທ່ານ ດາວໄຫລ ແກ້ວດວງດີ ຫົວໜ້າພະແນກ ແຜນການ ແລະ ການລົງທຶນ ແຂວງ ​ໂດຍ​ມີ ທ່ານ ທອນລະຂັນ ໄຊປັນຍາ ຫົວໜ້າພະແນກ ສາທາລະນະສຸກແຂວງ ພ້ອມດ້ວຍພາກສ່ວນກ່ຽວຂ້ອງ 2 ຝ່າຍ ​ເຂົ້າ​ຮ່ວມ.

ທັງຝ່າຍຜູ້ລົງທຶນ ແລະ ຝ່າຍລັດ ກໍ​ຄື ອົງການ ປົກຄອງແຂວງ ແມ່ນມີຄວາມເປັນ ເອກະພາບກັນດ້ານສັນຍາຄື: ຝ່າຍລັດໄດ້ມອບໃຫ້ຝ່າຍບໍລິສັດ ລົງທຶນສໍາປະທານກໍ່ສ້າງຕຶກ 3 ຊັ້ນ 40 ຫ້ອງນອນເຊິ່ງມີເນື້ອທີ່ 800 ຕາແມັດ, ມີອາຍຸການລົງທຶນເປັນເວລາ 50 ປີ ຕາມກົດໝາຍສົ່ງເສີມ ການລົງທຶນ ແລະ ສາມາດຕໍ່ໄດ້ 25 ປີ ໂດຍບາດກ້າວດໍາເນີນໂຄງການ ຈັດແບ່ງເປັນແຕ່ລະໄລຍະຕົວຈິງຄື: ໄລຍະບຸກເບີກສະຖານທີ່ກໍ່ສ້າງ, ໄລຍະເລີ່ມລົງມື ກໍ່ສ້າງໂຄງການ, ໄລຍະຕິດຕັ້ງອຸປະກອນ-ເຟີນີເຈີ ແລະ ໄລຍະດໍາເນີນກິດຈະການ ທີ່ຕິດພັນກັບການຮັບໃຊ້ບໍລິການ. ​ໂດຍ​ມີ​ມູນ​ຄ່າ​ ການ​ລົງທຶນ​ທັງ​ໝົດ 15 ຕື້ກີບ, ສໍາລັບການປະຕິບັດພັນທະດ້ານ ພາສີອາກອນ, ຄ່າສໍາປະທານ, ນະໂຍບາຍຍົກເວັ້ນຄ່າ ເຊົ່າສໍາປະທານ ແລະ ຍົກເວັ້ນອາກອນກໍາໄລ ແມ່ນຕ້ອງປະຕິບັດຕາມກົດໝາຍວ່າດ້ວຍ ສ່ວຍສາອາກອນຂອງ ສປປ ລາວ.

ທີ່ມາ ສຳນັກຂ່າວສານປະເທດລາວ