ຍ່າງມິນິມາລາທອນ ເພື່ອສຸຂະພາບ ຄຳນັບຊົມເຊີຍ ວັນກຳມະກອນສາກົນ

0
39

ຕອນ​ເຊົ້າ ​ວັນ​ທີ 30 ເມ​ສາ 2018 ຜ່ານ​ມາຫລາຍ​ແຂວງ ​ເປັນ​ຕົ້ນ ​ແຂວງ​ ຊຽງຂວາງ, ​ໄຊ​ຍະ​ບູລີ ​ແລະ ​ແຂວງ​ອື່ນໆ​ ໃນ​ຂອບ​ເຂດ​ທົ່ວ​ປະ​ເທດ​ໄດ້​ຈັດ​ກິດຈະກຳ ຍ່າງ​ມາ​ລາ​ທອນ ເພື່ອ​ສຸ​ຂະ​ພາບ​ ຂ່ຳ​ນັບ​ຮັບ​ຕ້ອນ ​ແລະ ​ຊົມ​ເຊີຍ​ ວັນ​ກຳ​ມະ​ກອນສາ​ກົນ ຄົບ​ຮອບ 132 ປີ (01 ພຶດ​ສະ​ພາ 1886-01 ພຶດ​ສະ​ພາ 2018) ຢ່າງ​ເປັນ ​ຂະ​ບວນ​ຟົດ​ຟື້ນ. ພ້ອມ​ນີ້ ​ຍັງ​ເປັນ​ການໂຄສະນາ ແລະ ສຶກສາ​ອົບ​ຮົມ​ ໃຫ້​ແກ່​ພະນັກງານ, ລັດຖະກອນ, ສະມາຊິກ​ກຳມະບານ, ກຳມະກອນ ແລະ ຊາວ​ຜູ້​ອອກ​ແຮງ​ງານ ​ບັນ​ດາ​ເຜົ່າ​ໄດ້​ຮັບ​ຮູ້​ ​ແລະ ​ເຂົ້າ​ໃຈ​​ເຖິງ​ມູນ​ເຊື້ອ​ ທາດ​ແທ້ ປະຫວັດ​ຄວາມ​ເປັນ​ມາ​ ຂອງ​ວັນ​ກຳມະກອນ​ສາກົນ, ຜົນງານ​ການ​ເຄື່ອນໄຫວ ​ຂອງ​ກຳມະກອນ​ລາວ ໃນ​ພາລະກິດ​ປະຕິວັດ​ ຕໍ່ສູ້​ປົດ​ປ່ອຍ​ຊາດ ກໍ​ຄື ​ການ​ປົກ​ປັກ​ຮັກສາ ​ແລະ ສ້າງສາ​ພັດທະນາ​ ປະ​ເທດຊາດ, ການ​ເຕີບ​ໃຫຍ່​ຂະ​ຫຍາ​ຍຕົວ​ ຂອງ​ຊົນ​ຊັ້ນ​ກຳມະກອນ​ທົ່ວ​ໂລກ; ​ສ້າງ​ຂະ​ບວນການ​ຕ່າງໆ ​ໃຫ້​ຟົດ​ຟື້ນ​.

​ວັນ​ກຳ​ມະ​ກອນສາ​ກົນ ຄົບ​ຮອບ 132 ປີ ນີ້​ຖື​ວ່າ​ ເປັນ​ປາງ​ບຸນ​ສຳ​ຄັນ ​ຂອງ​ພະ​ນັກ​ງານ, ສະ​ມາ​ຊິກ​ກຳ​ມະ​ບານ, ກຳ​ມະ​ກອນ ແລະ ຜູ້​ອອກ​ແຮງ​ງານ​ ໃນ​ແຕ່ລະ​ຂົງ​ເຂດ ແນ່​ໃສ່​ເພື່ອ​ຜູກ​ແໜ້ນ​ຄວາມ​ສາ​ມັກ​ຄີ​ ຮັກ​ແພງ​ອັນ​ເປັນ​ປຶກ​ແຜ່ນ, ເພື່ອ​ພ້ອມ​ກັນ​ມີ​ສຸ​ຂະ​ພາບ​ພາ​ລະ​ນາ​ໄມ ​ທີ່​ແຂງ​ແຮງ ສຸມ​ຈິດ​ໃຈ​ເຫື່ອ​ແຮງ​ ເຂົ້າ​ໃນ​ການ​ຈັດ​ຕັ້ງ​ປະ​ຕິ​ບັດ​ໜ້າ​ທີ່ ​ວຽກ​ງານ​ດ້ວຍ​ຄວາມ​ຮັບ​ຜິດ​ຊອບສູງ ໃນ​ໜ້າ​ທີ່​ ການ​ເມືອງ​ຂອງ​ຕົນ, ຕັດ​ສິນ​ໃຈ​ຜ່ານ​ຜ່າ​ອຸ​ປະ​ສັກ​ ຄວາມ​ຫຍຸ້ງ​ຍາກ, ປະ​ກອບ​ສ່ວນ​ຢ່າງ​ຕັ້ງ​ໜ້າ ​ເຂົ້າ​ໃນ​ພາ​ລະ​ກິດ​ແຫ່ງ​ການ ​ປົກ​ປັກ​ຮັກ​ສາ ແລະ ສ້າງ​ປະ​ເທດ​ຊາດ​ໃຫ້​ຈະ​ເລີນ ​ຮຸ່ງ​ເຮືອງ ກ້າວ​ຂຶ້ນ​ສູ່​ຈຸດ​ໝາຍ​ສັງ​ຄົມ​ນິ​ຍົມ ​ທີ່​ພັກ​ປະ​ຊາ​ຊົນ​ປະ​ຕິ​ວັດ​ລາວ​ກຳ​ນົດ​ໄວ້.