ງານວາງສະແດງສິນຄ້າໂອດອບ 8 ແຂວງພາກເໜືອ ໄດ້ຮັບຄວາມສົນໃຈ ຈາກມວນຊົນ ຢ່າງຄຶກຄື້ນ

0
29

ງານຕະຫລາດນັດວາງສະແດງ ສິນຄ້າໂອດ໊ອບ (ODOP) 8 ແຂວງພາກເໜືອ ທີ່​ຈັດ​ຂຶ້ນ ​ໃນລະຫວ່າງວັນທີ 20-30 ມີນາ 2018 ຢູ່ສະໜາມກິລາ ​ປ່າ​ອ້ອຍ ​ເມືອງ​ຫ້ວຍ​ຊາຍ ແຂວງບໍ່​ແກ້ວ, ເພື່ອ​ສະ​ເຫລີມ​ສະ​ຫລອງ ວັນ​ສ້າງ​ຕັ້ງ​ແຂວງ​ບໍ່​ແກ້ວ ຄົບ​ຮອບ 35 ປີ ໄດ້​ຮັບ​ຄວາມ​ສົນ​ໃຈ ຈາກມວນ​ຊົນ ຈາກ​ພາຍ​ແຂວງ, ຕ່າງ ​ແຂວງ ແລະ ຕ່າງ​ປະ​ເທດ ທີ່​ເຂົ້າ​ມາ​ເບິ່ງ​ມາ​ຊົມ ຢ່າງ​ຄຶກ​ຄື້ນ.

ງານວາງສະແດງ ສິນຄ້າດັ່ງກ່າວ, ເປັນ​ການສ້າງເງື່ອນໄຂ ໃຫ້ບັນດາຜູ້ປະກອບການ ພາຍໃນ 8 ແຂວງພາກເໜືອ ໄດ້ພົບປະແລກປ່ຽນ ດ້ານການຜະລິດ, ການຄ້າ-ການລົງທຶນ ທັງເປັນການ ໂຄສະນາ, ປັບປຸງຜະລິດຕະພັນ ຂອງຕົນ ໃຫ້ໄດ້ຕາມມາດຕະຖານ ຂອງຕະຫລາດ ກໍຄື ຜູ້ຊົມໃຊ້, ເຊິ່ງມີທັງໝົດ 295 ຫ້ອງ ວາງສະແດງ, ມີ 12 ໝວດສິນຄ້າ ເປັນຕົ້ນ ແມ່ນຜະລິດຕະພັນຈາກ ສັດລ້ຽງ, ເຂົ້າໜົມທີ່ເປັນເອກະລັກ, ເຟີນິເຈີ, ຫັດຖະກຳ ຈັກສານ, ຜະລິດຕະພັນຝ້າຍ ແລະ ເຄື່ອງນຸ່ງພື້ນເມືອງ ຂອງຊົນເຜົ່າຕ່າງໆ,  ຜະລິດຕະພັນກະສິກຳ ແລະ ເຄື່ອງປ່າຂອງດົງ, ປຸຍຊີວະພາບ, ວັດສະດຸຮັບໃຊ້ການກໍ່ສ້າງ, ອັນຍະມະນີແຮ່ທາດ, ອຸປະກອນການສຶກສາ, ເຄື່ອງໃຊ້ສອຍ ແລະ ບັນດາ ສິນຄ້າສຳເລັດຮູບອື່ນໆ. ງານວາງສະແດງ ຄັ້ງນີ້, ມີຜະລິດຕະພັນ ຈາກແຂວງ ບໍ່ແກ້ວ, ຫົວພັນ, ຫລວງນ້ຳທາ, ຊຽງຂວາງ, ຫລວງພະບາງ, ແຂວງໄຊຍະບູລີ ແລະ ນະຄອນຫລວງວຽງຈັນ. ນອກຈາກນີ້, ຍັງມີສິນຄ້າ ຈາກປະເທດໄທ, ສສ ຫວຽດນາມ ແລະ ສປ ຈີນ ເຂົ້າຮ່ວມວາງສະແດງ ຕື່ມອີກ.

ນອກ​ຈາກ​ ງານ​ວາງ​ສະ​ແດງ​ສິນ​ຄ້າ​ແລ້ວ, ຍັງ​ມີ​ກິດ​ຈະ​ກຳ ທີ່​ສ້າງ​ຄວາມ​ຕື່ນ​ຕາ​ຕື່ນ​ໃຈ ໃຫ້​ກັບ​ມວນ​ຊົນ ຊາວ ​ແຂວງບໍ່​ແກ້ວ, ໂດຍ​ສະ​ເພາະ ກິດ​ຈະ​ກຳ​ໂດດ​ຈ້ອງ, ຈູດ​ບັ້ງ​ໄຟ​ດອກ, ຕີ​ມວຍ, ສະ​ແດງ​ສິ​ລະ​ປະ​ວັນ​ນະ​ຄະ​ດີ, ສະ​ແດງ​ກາຍ​ຍະ​ສິນ, ມາ​ຍາ​ກົນ ຈາກ​ ປະ​ເທດ​ເພື່ອນ​ບ້ານ ແລະ ​ນັກ​ຮ້ອງ​ທີ່​ມີ​ສື່​ສຽງຈາກ ​ນະ​ຄອນ​ຫລວງວຽງ​ຈັນ ມາ​ຮ່ວມ​ສ້າງ​ ຄວາມ​ມ່ວນ​ຊື່ນ ໃຫ້​ໄດ້​ເບິ່ງ​ໄດ້​ຊົມ​ຢ່າງ​ຄຶກ​ຄື້ນ.