ການຮັກສາສຸຂະພາບໄລຍະຖືພາ ຊ່ວຍຫລຸດອັດຕາການຕາຍ ຂອງແມ່ໄດ້ 25%

0
78

ການ​ດູ​ແລ​ສຸຂະພາບ ໃນ​ໄລຍະ​ຖືພາ​ ເປັນ​ການ​ຊ່ວຍຫລຸດ ​ອັດຕາ​ການ​ຕາຍ​ຂອງ​ແມ່​ໄດ້​ເຖິງ 25%. ນອກຈາກ​ນີ້, ຍັງສາມາດ ​ບົ່ງມະຕິ​​ໄວ, ປິ່ນປົວ​ ແລະ ປ້ອງ​ກັນ​ ບັນດາ​ສາ​ເຫດ​ໂດຍ​ກົງ​ ທີ່​ພາ​ໃຫ້​ແມ່​ຕາຍ ​ເຊັ່ນ: ​ເລືອດ​ໄຫລ​ກ່ອນ​ເກີດ, ຄວາມດັນ​ເລືອດ​ສູງ, ຊັກ​ກະຕຸກ, ຂາດ​ເລືອດ, ​ໄຂ້ຍຸງ, ພະຍາດ​ຕິດ​ຕໍ່​ທາງ​ເພດ​ສຳພັນ, ​ເອດ, ​ແມ່​ຕິດ​ເຊື້ອ ​ແລະ ອື່ນໆ ພ້ອມທັງຍັງປ້ອງກັນ ເດັກຕາຍໃນທ້ອງ ແລະ ເດັກເກີດໃໝ່ຕາຍ, ຊຶ່ງ ແມ່ຍິງ​ທຸກ​ຄົນ ມີ​ສິດ​ຄາດ​ຫວັງ​ ຢາກ​ໃຫ້​ລູກ​ຂອງ​ຕົນເກີດ​ມາມີ​ຊີວິດ ​ແລະ ມີ​ສຸຂະພາບ​ແຂງ​ແຮງ ​ເຊັ່ນ​ດຽວ​ກັບ​ທຸກ​ຄົນ ມີ​ສິດ​ຢາກ​ຈະ​ຢູ່​ກັບ​ແມ່​ ທີ່​ມີ​ສຸຂະພາບ​ ແຂງ​ແຮງ​ເໝືອນ​ກັນ.

​ໃນ​ວັນ​ທີ 13 ມີນາ 2018 ທີ່​ ກະຊວງ​ການ​ຕ່າງປະ​ເທດ, ​ຄະນະ​ກຳມາ​ທິການ ເພື່ອ​ຄວາມ​ກ້າວ ໜ້າ​ຂອງ​ແມ່ຍິງ ​ແລະ​ ​ແມ່-ເດັກ ກະຊວງ​ການ​ຕ່າງປະ​ເທດ ​ໄດ້​ຈັດ ​ກອງ​ປະຊຸມ​ສຳ​ມະ​ນາ ພາຍ​ໃຕ້​ຫົວ​ຂໍ້ “ ການ​ຮັກສາ​ສຸຂະພາບ ​ໄວ​ຈະ​ເລີ​ນພັນ”,​​ໂດຍ​ໃຫ້​ກຽດ​ ເປັນ​ປະທານ​ຂອງ ​ທ່ານ ທອງ​ຜ່ານ ສະຫວັນ​ເພັດ ຮອງ​ລັດຖະມົນຕີ, ທັງ​ເປັນ​ປະທານ ຄະນະ​ກຳມາ​ທິການ ​ເພື່ອ​ຄວາມ​ກ້າວໜ້າ​ຂອງ​ ແມ່ຍິງ ​ແລະ​ ​ແມ່-ເດັກ ກະຊວງ ​ການ​ຕ່າງປະ​ເທດ, ທ່ານ ດຣ ກອບ​ແກ້ວ ສຸພັນ​ທອງ ຮອງ​ຫົວໜ້າ​ ສູນສຸຂະພາບ​ແມ່ ​ແລະ ​ເດັກ ກະຊວງ​ ສາທາລະນະ​ສຸກ, ພ້ອມດ້ວຍ​ພະນັກງານ​ ​ກະຊວງການຕ່າງປະ​ເທດ ​ເຂົ້າ​ຮ່ວມ.

ທ່ານ ທອງ​ຜ່ານ ສະຫວັນ​ເພັດ ​ໄດ້​ກ່າວ​ວ່າ: ​ແມ່ຍິງ ​ທີ່​ກຽມພ້ອມ​ຈະ​ຖືພາ ​ແລະ ​ແມ່ຍິງ ​ທີ່​ກຳລັງ​ຈະ​ຖືພາ​ເອງ ກໍ​ຍິ່ງ​ຈຳ​ເປັນ​ຕ້ອງ​ໄດ້​ເອົາ​ໃຈ​ໃສ່ ​ເບິ່ງ​ແຍງ​ສຸຂະພາບ​ໃຫ້​ແຂງ​ແຮງ, ຄຽງ​ຄູ່​ກັບ​ການ​ເບິ່ງ​ແຍງ​ຕົນ​ເອງ. ​ເພດ​ຊາຍ​ໂດຍ​ສະ​ເພາະ​ ຜູ້​ທີ່​ເປັນ​ພໍ່, ​ເປັນ​ເພື່ອ​ນຮ່ວມ​ງານ ກໍ​ຈຳ ​ເປັນ​ຕ້ອງ​ໄດ້​ເອົາ​ໃຈ​ໃສ່ ປະຕິບັດ​ຕໍ່​ແມ່ຍິງ​ ໃຫ້​ຖືກຕ້ອງ ເພື່ອ​ຮັບປະກັນ​ທາງ​ດ້ານ​ສຸຂະພາບ​ ​ແລະ ຫລຸດຜ່ອນ​ຄວາມ​ສ່ຽງ​ ທີ່​ເປັນ​ອັນຕະລາຍ ຫລື ຜົນ​ກະທົບ​ຕໍ່​ສຸຂະພາບ ​ຂອງ​ແມ່ ​ແລະ ​ເດັກ​ ທີ່​ອາດ​ເກີດ​ຂຶ້ນ.

ທ່ານ​ ທອງ​ຜ່ານ ສະຫວັນ​ເພັດ ກ່າວ​ຕື່ມ​ວ່າ: ສະພາບ​ ປັດຈຸ​ບັນ ​ເຫັນ​ໄດ້​ວ່າ ບັນຫາ​ສັງຄົມ​ທີ່​ເກີດ​ຂຶ້ນ​ຫລາຍ​ກວ່າ​ໝູ່ ​ແມ່ນ​​ຄວາມ​ບໍ່​ພ້ອມ ໃນ​ການ​ເປັນ​ພໍ່-​ແມ່, ຊຶ່ງ​ເປັນ​ສາເຫດພື້ນຖານ ​ໃນ​ການ​ສ້າງ​ບັນຫາ​ຂອງ​ສັງຄົມ ​ໄປ​ໃນ​ຕົວ. ກອງ​ປະຊຸມ​ຄັ້ງ​ນີ້, ຜູ້​ເຂົ້າ​ຮ່ວມ​ ຍັງ​ໄດ້​ຮັບ​ຟັງການ​ບັນຍາຍ ​ກ່ຽວ​ກັບ​ວຽກ​ງານ ​ບົດບາດ​ຍິງ-ຊາຍ ​ແລະ ການວາງ​ແຜນ​ຄອບຄົວ​, ​ ​ແລກປ່ຽນ​ຄຳ​ຄິດ​ເຫັນ, ປະສົບ​ການ ​ໃນ​ການ​ດູ​ແລ​ຕົນ​ເອງ ​ແລະ ສະມາຊິກ​ໃນ​ຄອບຄົວ, ການ​ຮັກສາ​ສຸຂະພາບ ​ຂອງ​ແມ່ຍິງ​ ໃນ​ໄລຍະ​ຖືພາ​ ແຕ່ 01-09 ​ເດືອນ ​ແລະ ການ​ດູ​ແລ​ສຸຂະພາບ​ເດັກ​ ລຸ່ມ 01 ​ປີ.

ທີ່ມາ ສຳນັກຂ່າວສານປະເທດລາວ