ບາດກ້າວໃໝ່ ຂອງກິລາບານເຕະ ຄວກ ກຽມເປີດຫຼັກສູດ ປ.ຕີ ສາຂາ ຄູຝຶກບານເຕະ ສົກຮຽນ 2018-2019

0
33

      ຫຼັງຈາກຄະນະວິທະຍາສາດການກິລາ-ກາຍະກຳ(ຄວກ) ມະຫາວິທະຍາໄລແຫ່ງຊາດ ໄດ້ຮັບການອະນຸມັດຫຼັກສູດລະດັບປະລິນຍາຕີ ສາຂາຄູຝຶກບານເຕະໃນ ທ້າຍເດືອນມັງກອນທີ່ຜ່ານມາ, ກໍ່ໄດ້ມີການກະກຽມຄວາມພ້ອມກ່ອນການເປີດການຮຽນ-ການສອນ ວັນສົກສຶກສາ 2018-2019 ນີ້ ໃນຫຼາຍໆດ້ານ ໂດຍສະເພາະການພັດທະນາບຸກຄະລາກອນ ແລະການຮ່ວມມື. ດັ່ງນັ້ນ, ໃນຕອນເຊົ້າຂອງວັນທີ 12/02/2018 ຄະນະນຳ ຂອງ ຄວກ ນຳໂດຍ ທ່ານ ຮສ.ປອ. ອານຸລົມ ວິໄລພອນ ວ່າການຄະນະບໍດີ ຄວກ, ບັນຫົວໜ້າພາກວິຊາ ແລະພະແນກໄດ້ຕ້ອນຮັບ ທ່ານ ໄມວ່ອງ(ຄົນສິງກະໂປ) ຄູຝຶກທີມຊາດລາວ, ທັງເປັນ ຜູ້ຝຶກສອນ (Instructor) ຄູຝຶກບານເຕະລະດັບ A License ຂອງ AFC ທີ່ມາຢຽ້ມຢາມຄະນະວິຊາ ພ້ອມທັງພົບປະແລກປ່ຽນ ເພື່ອຫາຊ່ອງທາງໃນການເປັນຄູ່ຮ່ວມພັດທະນາທີ່.

       ການພົບປະໃນຄັ້ງນີ້ ທາງ ຄວກ ໄດ້ສະເໜີຂໍ້ມູນກ່ຽວກັບ ຄະນະວິຊາ ແລະ ການພັດທະນາກິລາບານເຕະ ຂອງ ມຊໂດຍຫຍໍ້ໃຫ້ແກ່ ທ່ານໄມວ່ອງໄດ້ຮັບຊາບ, ໂດຍມີເນື້ອໃນດັ່ງນີ້: ປັດຈຸບັນ ຄວກ ມີຄູຝຶກລະດັບ C ທັງໝົດ 4 ທ່ານ ເປັນຍິງ 1 ທ່ານ, ກຳມະການລະດັບ FIFA 2 ທ່ານ, ກຳມະການລະດັບ AFF 1 ທ່ານ ແລະ ກຳມະການລະດັບ AFF ຫຼາຍກວ່າ 10 ທ່ານ, ນອກຈາກນີ້: ຍັງມີ ທີມເຕະບານ ເຍົາວະຊົນທີ່ຢູ່ພາຍໃຕ້ການດູແລຂອງ ຄູ ອາຈານ ພາຍໃນ ຄວກ ປະກອບດ້ວຍ U-14, U-16, U18, ທີມບານເຕະລະດັບ ກ, ທີມຂອງມະຫາວິທະຍາໄລ ແລະ ໃນແຕ່ລະປີແມ່ນໄດ້ເຂົ້າຮ່ວມແຂ່ງຂັນ ໃນບັນດາລາຍການແຂ່ງຂັນ ຕ່າງໆ ທັງພາຍໃນແລະ ຕ່າງປະເທດເປັນປະຈຳ.

       ຈາກນັ້ນ ທ່ານໄມວ່ອງກໍ່ໄດ້ເລົ່າປະສົບການໃນການພັດທະນາບານເຕະ ໃນລະດັບການສຶກສາລະດັບສູງໃນປະເທດສິງກະໂປ ແລະ ໃນປະເທດບຣູໄນ ໃນເວລາທີ່ທ່ານໄດ້ໄປເຮັດວຽກຢູ່ທີ່ນັ້ນ. ນອກຈາກນັ້ນກໍ່ຍັງໄດ້ປຶກສາຫາລືກັນໃນການດຳເນີນການຝຶກອົບຮົບ ຄູຝຶກບານເຕະລະດັບ C ໃຫ້ ກັບພະນັກງານ ແລະນັກສຶກສາ ຄວກ, ພ້ອມທັງການຝຶກອົບຮົມໃຫ້ກັບກຳມະການນຳອີກ.

      ສຳລັບຜູ້ທີ່ສົນໃຈກ່ຽວກັບ ຫຼັກສູດ ແລະການເຄື່ອນໄຫວຂອງຄະນະວິທະຍາສາດການກີລາ-ກາຍະກຳ ສາມາດຕິດຕາມໄດ້ ທີ່ ເວັບໄຊ www.fsp.nuol.edu.la ແລະ ແຟນເພສ ຄະນະວິທະຍາສາດການກີລາ-ກາຍະກຳ Faculty of Sport Science and Physical Education

 

ທີ່ມາ LaosportNews