ພັດທະນາ ໄດ້ລົງຫຼິ້ນໃຫ້ ຊົນບູລີ ຄົບ 90 ນາທີ ເປັນນັດທຳອິດຢ່າງເປັນທາງການ

    0
    6

          ໃນມື້ວານນີ້ວັນທີ 20/01/2018 ພັດທະນາ ພົມມະເທບ ໄດ້ຮັບໂອກາດດ້ວຍການລົງຫຼິ້ນໃຫ້ກັບທີມ U-19 ຂອງສະໂມສອນ ຊົນບູລີ FC ໃນການແຂ່ງຂັນລາຍການ ໂຄກຄັບ ຄັ້ງທີ 20 ຂອງປະເທດໄທ ໂດຍເຂົາໄດ້ສວມເສື້ອໝາຍເລກ 14. ເກມໃນນັດນີ້ເປັນຝ່າຍ ຊົນບູລີ ເປີດບ້ານເອົາຊະນະ ອັດສຳຊັນ ຢູໄນເຕັດ ຜູ້ມາຢາມໄປ 4-2 ເຮັດໃຫ້ຊົນບູລີຜ່ານເຂົ້າໄປຫຼິ້ນໃນຮອບຮອງຊະນະເລີດ ໂດຍຈະພົບກັບ ບູຣິຣຳ FC ໃນນັດຕໍ່ໄປ.

          ເກມໃນນັດນີ້ ເປັນການລົງສະໜາມ ຢ່າງເປັນທາງການຂອງ ພັດທະນາ ພົມມະເທບ(ເຈົາ) ກອງກາງທີມຊາດລາວ ຊຸດໃຫຍ່ ທີ່ເຄີຍຖືກ ເວັບໄຊກີລາ ຊື່ດັງຂອງໄທ fourfourtwo ຍົກຍ້ອງໃຫ້ເປັນຜູ້ຫຼິ້ນດາວຮຸ່ງທີ່ດີທີ່ສຸດໃນປີ 2017 ຂອງອາຊຽນມາແລ້ວ ແລະໃນນັດນີ້ເຂົາກໍ່ໄດ້ຮັບຄວາມໄວ້ວາງໃຈຈາກຄູຝຶກ ໃຫ້ຫຼິ້ນກອງກາງດ້ານຂວາ ໃນຕຳແໜ່ງທີ່ເຂົາທະນັດ ແລະ ໄດ້ລົງຫຼິ້ນຈົນຄົບ 90 ນາທີ.

           ຫຼັງຈົບເກມ ທາງ Laosportnews ກໍ່ໄດ້ຕິດຕໍ່ສຳພາດ, ແມວມອງຂອງນັກເຕະດາວຮຸ່ງ ແລະທັງເປັນຜູ້ຈັດການທີມໃນໄທລີກ ຜູ້ບໍ່ປະສົງອອກນາມ, ກ່ຽວກັບເກມການຫຼິ້ນຂອງ ເຈົາໃນນັດດັ່ງກ່າວ. ເຊິ່ງແມວມອງຄົນນີ້ກໍ່ໄດ້ມີໂອກາດ ນັ່ງຊົມການແຂ່ງຂັນນັດນີີ້ໃນສະໜາມ ແຕ່ຕົ້ນຈົນຈົບ ແລະໃຫ້ທັດສະນະຕໍ່ການລົງແຂ່ງຂັນຂອງ ເຈົາ ໃນນັດນີ້ວ່າ:

          ໂດຍລາວແລ້ວໃນເກມນີ້ ເຈົ່າກໍ່ຫຼິ້ນໄດ້ດີ.ແຕ່ໃນຊ່ວງເຄິ່ງເວລາທີ 2 ບໍ່ຄ່ອຍໄດ້ມີສ່ວນຮ່ວມກັບເກມເທົ່າທີ່ຄວນ, ໂດຍພື້ນຖານແລ້ວ ເຕັກນິກສະເພາະຕົວຂອງເຈົາແມ່ນດີຫຼາຍ ແຕ່ຄວາມເຂົ້າໃຈໃນເກມ ແລະ ຈັງຫວະການຫຼິ້ນປະສານງານກັບເພື່ອນຮ່ວມທີມ ໂດຍສະເພາະທີມຊົນບູລີ FC ທີ່ມີນັກເຕະທີມຊາດໄທ U-19 ຫຼາຍຄົນຍັງຕ້ອງໄດ້ໃຊ້ເວລາໃນການປັບຕົວ ອີກຫຼາຍ. ແຕ່ກໍ່ເຊື່ອໃນຊັກກະຍະພາບ ຂອງເຈົ່າວ່າຈະສາມາດປັບຕົວເຂົ້າກັບ ເພື່ອນຮ່ວມທີມໄດ້ໄວໆ ນີ້ຢ່າງແນ່ນອນ.

           ພັດທະນາ ພົມມະເທບ​ ຫຼື ເຈົາເປັນນັກເຕະຮຸ້ນທີ 6 ຂອງສະໂມສອນ ເອສຣາ, ກ່ອນຈະຍ້າຍໄປຫຼິ້ນໃຫ້ກັບ ລ້ານຊ້າງ ຢູໄນເຕັດ, ກ່ອນທີ່ຈະຍ້າຍໄປຫຼິ້ນໃຫ້ກັບ ກາລາສິນ FC ໃນໄທລີກ ແລ້ວກັບມາຫຼິ້ນໃຫ້ ທິບສະຫວັນ ໃນລາວພຣີເມຍ ລີກ ແລະລ່າສຸດກໍ່ ຍ້າຍໄປຫຼິ້ນໃຫ້ກັບ ສະໂມສອນ ຊົນບູລີ U-19 ໃນໂຄຕ້ານັກເຕະ ອາຊຽນ

    ພາບຈາກ: ສະໂມສອນ ຊົນບູຣີ FC

     

    ທີ່ມາ LaosportNews